Vindorka felld undir rammaáætlun
Frumvarp Jóhanns Páls Jóhannssonar umhverfis-, orku- og loftslagsráðherra um heildræn lög um vindorku var samþykkt á síðasta degi þingsins. Markmiðið segir hann vera „að standa vörð um náttúru Íslands og tryggja að vindorkunýting fari einvörðungu fram á örfáum afmörkuðum svæðum í sátt við nærsamfélagið“.
Heildræn lög um vindorku voru í fyrsta skipti sett þegar frumvarp Jóhanns Páls Jóhannssonar umhverfis-, orku- og loftslagsráðherra var samþykkt á síðasta degi 157. löggjafarþingsins fyrir helgi.
„Markmið ríkisstjórnarinnar er skýrt: að standa vörð um náttúru Íslands og tryggja að vindorkunýting fari einvörðungu fram á örfáum afmörkuðum svæðum í sátt við nærsamfélagið, þar sem hún er til þess fallin að styðja við atvinnu- og byggðaþróun og hagkvæma uppbyggingu raforkuflutningskerfisins,“ sagði Jóhann Páll um málið.
43 svæði um allt land hafa verið lögð til sem möguleg svæði fyrir vindorkuver á síðastliðnum árum en vindorkan hefur verið verulega umdeild. Í Silfrinu undir lok apríl tókust umhverfis-, orku- og loftslagsráðherra og Halla Hrund Logadóttir, þingmaður Framsóknarflokksins, um vindorkumálin en Halla Hrund taldi vindorkuna vera tifandi tímasprengju. Ráðherra sagði að það væri „ævintýralegur hræðsluáróður“ að allar 43 tillögurnar að vindorkuverum yrðu að veruleika.
