Páll Vilhjálmsson skrifar:

Samkeppni er á milli formanns og varaformanns Viðreisnar um hvor þeirra geti valdið ríkisstjórninni mestu tjóni. Formaðurinn er Þorgerður Katrín utanríkisráðherra en varaformaður Daði Már fjármálaráðherra.

Stærsta og verðmætasta fyrirtæki ríkisins, Landsvirkjun, er löðrandi í spillingarumræðu. Daði Már er í krafti ráðherradóms í fjármálaráðuneytinu æðsti yfirmaður Landsvirkjunar. Daði Már sagði þingi og þjóð ósatt er hann kvaðst hvergi hafa komið nærri átökum milli stjórnar Landsvirkjunar og forstjóra. Hörður Arnarson, forstjóri til 17 ára, var flæmdur úr starfi. Stjórn Landsvirkjunar bruggaði Herði launráð í samráði við Daða Má fjármálaráðherra.

Á meðan varaformaður Viðreisnar böðlast á Landsvirkjun er formaðurinn upptekinn við að kveikja pólitíska elda á alþjóðavísu.

Þorgerður Katrín notaði Grænlandsáhuga Trump Bandaríkjaforseta sem átyllu til að etja þjóðinni á ESB-foraðið. Er utanríkisráðherra sá fram á ósigur í þjóðaratkvæðagreiðslunni sakaði Þorgerður Katrín Pútín Rússlandsforseta um afskipti af kosningabaráttunni. Þegar hvorki Trump né Pútín reyndust utanríkisráðherra skálkaskjól læsti Þorgerður Katrín klónum í Ólaf Ragnar Grímsson fráfarandi forseta.

Ólafur Ragnar svarar pent dylgjum og ósannindum utanríkisráðherra:

Það var mikið lán fyrir lýðveldið að þjóðin skyldi hafna því að svona veruleikafirrtur ráðherra fengi umboð til að semja um framtíð Íslands við Evrópusambandið

Í stjórnmálum gildir að ljúga ekki meira en svo að alþjóð hafi undan að trúa. Pólitískt kapítal nefnist trúverðugleikinn sem stjórnmálamenn eiga er þeir komast í valdastöðu, verða ráðherrar. Blekkingar, undanfærslur og óheilindi ganga á pólitíska kapítalið. Forysta Viðreisnar – í hroka sínum – vildi ekki skilja að pólitískt kapítal þeirra hvarf á einni nóttu.

Strax eftir ósigurinn í þjóðaratkvæðagreiðslunni 29. ágúst tóku þau Þorgerður Katrín og Daði Már höndum saman um að sópa undir teppið stærsta verkefni ríkisstjórnarinnar, Viðreisnar sérstaklega. Evrópusambandsaðild var aldrei markmiðið, sögðu skötuhjúin í sameiginlegri yfirlýsingu. Samfelld tveggja mánaða hörmungarsaga forystu Viðreisnar hefst með þeim þvergirðingshætti að horfast ekki í augu við pólitískan veruleika.

Viðreisn er að þrotum komin í stjórnarsamstarfinu. Þau Þorgerður Katrín og Daði Már munu þó ekki axla sín skinn heldur böðlast áfram. Forysta Viðreisnar er einbeitt í þeim ásetningi að taka ríkisstjórnina með sér í fallinu.