Verð á vinsælum súkkulaði- og sælgætisvörum hefur hækkað um tæp 33% að meðaltali frá júní 2024 til júní 2026 samkvæmt verðkönnun ASÍ.
Í tilkynningu frá ASÍ segir að miklar verðlækkanir á kakó og sykri undanfarið virðist ekki hafa skilað sér í smásöluverð og að hækkanir á þessum vörum hafi því verið mun meiri en almenn verðbólga á tímabilinu.
Þessi könnun sýnir að neytendur greiða nú umtalsvert meira fyrir vörur sem lengi hafa verið fastur liður í innkaupakörfu íslenskra heimila.
Samkvæmt könnuninni eru verðhækkanirnar víðtækar. Flestar vörurnar í þessum vöruflokkum sem til skoðunar eru hafa hækkað um 20–40% á síðustu tveimur árum og nokkrar um meira en 40%. Engin þeirra vara sem skoðaðar voru lækkaði í verði á tímabilinu.
Hækkanir hjá öllum vörumerkjum
Þegar litið er til einstakra vörumerkja mældist meðalhækkunin á bilinu 31–35%.
Mest var hækkunin hjá Freyju, þar sem þær vörur sem skoðaðar voru hækkuðu að meðaltali um 34,5%, en meðalhækkun á vörum Góu og Lindu var 32,5% og 30,8% á vörum frá Nóa Síríus.
Verð á vörum frá Sanbó og Kólus hækkuðu minnst eða um 4,2% frá 2024.
Niðurstöðurnar benda því til þess að verðhækkanirnar séu ekki bundnar við einstaka framleiðendur eða vörur heldur endurspegli almenna þróun á markaðnum.
Nói Síríus steig nýlega fram og tilkynnti 10% lækkun á verðum frá 1. júní 2026, engar slíkar verðlækkanir hafa verið boðaðar af Freyju eða Góu.
Ólík þróun milli ára
Þótt heildarhækkunin sé svipuð milli vörumerkja var þróunin ólík eftir tímabilum. Hjá Nóa Síríus og Freyju varð stærstur hluti hækkananna á tímabilinu frá 2024 til 2025, en hjá Góu og Linda komu meiri hækkanir fram á síðari hluta tímabilsins, frá 2025 til 2026.
Þetta sýnir að verðhækkanir á markaðnum hafa ekki komið fram á sama tíma hjá öllum fyrirtækjum heldur dreifst yfir lengra tímabil.
Miklar lækkanir á kakóverði undanfarið
Hækkanir á sælgæti komu fram í kjölfar fordæmalausra hækkana á kakóverði á heimsmarkaði á árinu 2024 og þegar toppnum var náð og nam hækkunin um 140%.
Frá þeim tíma hefur kakóverð hins vegar lækkað talsvert frá hæstu gildum sínum og er verðið nú lægra en áður en verðhækkunarhrinan hófst.
Niðurstöður verðkönnunar ASÍ sýna hins vegar að verð á súkkulaði- og sælgætisvörum hér á landi hefur haldið áfram að hækka, meðal annars á tímabilinu 2025–2026. Það bendir til þess að áhrif hækkana á hrávörumörkuðum hafi enn ekki gengið að fullu til baka í verði til neytenda.
Afkoma flestra fyrirtækjanna hefur styrkst
Á sama tíma og verð á súkkulaði og sælgæti hefur hækkað um 32,7% að meðaltali frá júní 2024 hafa stærstu framleiðendur landsins almennt skilað bættri afkomu.
Í ársreikningum fyrirtækjanna kemur fram að hækkandi kakóverð á heimsmarkaði hafi haft veruleg áhrif á reksturinn og að gripið hafi verið til verðhækkana til að mæta auknum kostnaði.
Þrátt fyrir þær áskoranir jókst hagnaður Freyju um 548% árið 2024. Hagnaður Góu-Lindu jókst um 50% og hagnaður Nóa-Síríusar um 71% á síðasta rekstrarári, á meðan hagnaður Kólus ehf. dróst saman um 41% árið 2024.
Afkoma fyrirtækjanna og verðþróun til neytenda séu ekki sambærilegar stærðir sýna niðurstöðurnar þó að á sama tíma og neytendur hafa þurft að greiða sífellt hærra verð fyrir súkkulaði- og sælgætisvörur hefur afkoma stærstu fyrirtækjanna í greininni almennt styrkst.
Neytendur enn að greiða hærra verð
„Þrátt fyrir að mesti óróinn á kakómarkaði sé að baki og afkoma fyrirtækjanna hafi almennt styrkst sýnir verðkönnun ASÍ að neytendur greiða enn sífellt hærra verð fyrir súkkulaði og sælgæti. Það undirstrikar mikilvægi þess að fylgjast með því hvernig breytingar á kostnaði og hrávöruverði skila sér í verði til neytenda – bæði þegar kostnaður hækkar og ekki síður þegar hann lækkar,“ segir í tilkynningu ASÍ.
