Þriggja ára barn lést í Frakklandi eftir að hafa lokast inni í heitum bíl, að sögn saksóknara í dag. Þetta er eitt af mörgum dauðsföllum og neyðartilvikum sem hitabylgjan í Evrópu hefur valdið.

Í gær var heitasti dagur sem mælst hefur í Frakklandi frá upphafi mælinga árið 1947, en meðalhitinn náði 30°C.

Hitamælar í höfuðborginni sýndu allt að 40,3°C.

Drengurinn lést í gærkvöldi þegar foreldrum hans og slökkviliðsmönnum tókst ekki að endurlífga hann í bænum Saint-Gratien, að sögn Guirec Le Bras, saksóknara.

Móðirin var að fá sér lúr með hinu barni hjónanna, 18 mánaða gömlu, á meðan faðirinn var að vinna í skúr í garðinum, sagði hann og vísaði til fyrstu niðurstaðna rannsóknar.

Faðirinn sagði syni sínum að leggja sig, en barnið slapp undan eftirliti foreldra sinna í að minnsta kosti 45 mínútur og klifraði inn í bílinn, þar sem barnalæsingin var virkjuð.

„Hann virðist síðan hafa lokað sig inni og festist í bílnum áður en foreldrar hans fundu hann meðvitundarlausan,“ sagði Le Bras.

Móðir drengsins var flutt á sjúkrahús í áfalli.

Á mánudag fundust lík tveggja barna, tveggja og fjögurra ára, í bíl fjölskyldu þeirra á bílastæði í íbúðahverfi í bænum Carpentras í suðurhluta landsins.

Veðurfræðingar hafa varað við því að hitabylgjan sem hófst í síðustu viku gæti orðið jafn slæm og hitabylgjan árið 2003 sem kostaði nærri 15.000 manns lífið á landsvísu.

Óljóst er hversu margir hafa látist í Frakklandi frá síðustu viku vegna hitans.

Emmanuel Gregoire, borgarstjóri Parísar, sagði fyrr í dag að dauðsföllum fjölgaði í höfuðborginni, en gaf ekki upp nákvæma tölu.

Fjölgun tilfella hjartastopps

Um 63 milljónir manna í Frakklandi máttu búast við að svitna í yfir 30°C hita á fimmtudag, samkvæmt útreikningum AFP.

Landið upplifði í nótt heitustu nótt sem mælst hefur frá upphafi mælinga.

Á landsvísu hafa heilbrigðisyfirvöld tekið eftir fjórfaldri aukningu á komum á bráðamóttöku vegna „hitatengdra ástæðna“.

Tuttugu og fimm tilfelli hjartastopps voru skráð í París á 24 klukkustunda tímabili í gær, samanborið við „venjulega færri en 10“, að sögn heilbrigðisráðuneytisins.

Ungt fólk var meðal þeirra sem urðu fyrir áhrifum, sagði ráðuneytið, án þess að tilgreina hvort öll tilfellin hefðu leitt til dauða.

Hitinn hefur valdið því að milljónir manna í Frakklandi eiga í erfiðleikum með að halda heimilum sínum svölum. Ríkisstjórnin segir að þriðjungur heimila sé ekki aðlagaður miklum hita.

Hitinn neyddi þúsundir grunnskóla víðs vegar um Frakkland til að loka eða stytta kennslutíma.

Frönsk kennarasamtök boðuðu í gær til verkfalls til að mótmæla „óásættanlegum vinnuaðstæðum“ í hitabylgjunni.

„Heilsu starfsfólks og nemenda, sem og vinnuaðstæðum þeirra, er stefnt í hættu,“ sögðu samtökin í sameiginlegri yfirlýsingu og fordæmdu „augljósan skort á undirbúningi“.