Bandarísk stjórnmál voru á dagskrá Heimsgluggans. Sigríður Rut Júlíusdóttir héraðsdómari, Þórunn Elísabet Bogadóttir og Bogi Ágústsson ræddu stöðu og horfur vestra. Sigríður Rut stundaði framhaldsnám í lögfræði í Bandaríkjunum og fylgist afar vel með stjórnmálum þar í landi.
Þau ræddu meðal annars deilur innan Repúblikanaflokksins, afleiðingar Íransstríðsins, kosningarnar í nóvember, mögulega vinstri sveiflu innan Demókrataflokksins og óvinsældir Trumps forseta.
Neitaði að skrifa undir lög
Öldungadeild Bandaríkjaþings samþykkti fyrr í vikunni frumvarp sem á að auðvelda fólki að eignast húsnæði, The 21st Century Road to Housing Act. Samþykkt laganna er eitt fárra dæma á núverandi þingi þar sem demókratar og repúblikanar hafa náð samkomulagi þvert á flokka. Allt var tilbúið fyrir undirritun laganna þegar Trump forseti tilkynnti á samfélagsmiðli sínum að hann ætlaði ekki að staðfesta lögin fyrr en þingið afgreiddi frumvarp hans um kosningalög. Sigríður Rut segir að samkvæmt því frumvarpi yrði erfiðara að nýta kosningaréttinn og það njóti ekki nægilegs stuðnings Repúblikana, flokks forsetans.
Stormasamur fundur með öldungadeildarþingmönnum
Trump hitti öldungadeildarþingmenn Repúblikanaflokksins í þinginu í gærkvöld og herma miðlar að þar hafi verið hnakkrifist og Trump hafi brýnt raustina mjög. Hann var reiður vegna ályktunar sem öldungadeildin samþykkti á þriðjudag um stríðsreksturinn í Íran. Fyrr um daginn hafði slegið í brýnu með forsetanum og Bill Cassidy, öldungadeildarþingmanni Repúblikana frá Louisiana, á hádegisverðarfundi í Hvíta húsinu. Eftir fundinn í gærkvöld felldi öldungadeildin aðra tillögu þar sem framganga forsetans í Íransátökunum var gagnrýnd.
Stríðið við Íran ein stór katastrófa
Sigríður Rut segir að samningar við Írani séu uppgjafarsamningar, samningsstaða Trumps sé afar veik, hann hafi verið búinn að sýna á öll spilin, hann hafi sagt að ef stríðinu verði ekki hætt verði kreppa í Bandaríkjunum og heimskreppa, endurnýja þurfi skotfærabirgðir Bandaríkjahers sem kosti milljarðar dolara, aðeins fjórar séu vikur eftir af varabirgðum af bensíni. Stríðreksturinn sé búinn að vera ein stór katastrófa. Það hafi verið gerður vopnahléssamningur, ekki friðarsamningur, og ekki sé hægt að kalla þetta neitt annað en uppgjafasamning. Bandaríkjamenn hafi ekki fengið neitt af óljósum stríðsmarkmiðum.
Spegiltjörnin heiðbláa
Sigríður Rut segir að Trump hafi fengið þá flugu í höfuðið að laga þyrfti tjörn sem er á milli Lincoln og Washington minnismerkjanna í höfuðborginni. Laugin heitir „The Reflecting Pool“ (Spegilstjörnin) af því að minnismerkin eiga að speglast í henni. Trump hefði látið tæma tjörnina, skrapa botninn og mála hann bláan. Þetta hefði Trump falið vini sínum án þess að verkið væri boðið út og kostað 14 milljónir dollara, um 1,8 milljarður íslenskra króna. Þegar verkinu var lokið hitnaði vatnið vegna bláu málningarinnar og upp spratt mikill þörungablómi sem gerði tjörnina flúorgræna. Þá hefði klór verið hellt í tjörnina og hann hefði eyðilagt málninguna á botninum sem fór að flagna og flygsast upp á yfirborðið.
Athyglisverð úrslit í forkosningum Demókrata í New York
Demókratar völdu á þriðjudag frambjóðendur fyrir kosningarnar til fulltrúadeildar Bandaríkjaþings í nóvember. Segja má að Zohran Mamdani borgarstjóri New York-borgar hafi verið sigurvegarinn því allir frambjóðendur sem hann studdi sigruðu og felldu meðal annarra tvo núverandi þingmenn. Allir sigurvegararnir teljast vera á vinstri væng Demókrataflokksins eins og Mamdani. Sigríður Rut segir það ekki endilega vera merki um almenna vinstri sveiflu í flokknum, Demókratar velji frambjóðendur sem líklegir séu til að falla kjósendum í geð á hverjum stað. Það væri þýðingarlaust að bjóða róttæklinginn Alexandriu Ocasio-Cortez fram í Mississippi.
