Töluverðar umræður um utanvegaakstur á Suðurlandi hafa myndat yfir helgina, til dæmis í Facebook-hópunum Færð á fjöllum og Bakland ferðaþjónustunnar. Í hópunum er ríkjandi sú kenning að ökufantarnir, sem beri ábyrgð á umhverfisspjöllunum, séu hópur franskra ferðamanna. Þeir hafa meðal annars spænt upp landslag á lokuðu svæði við Kötlujökul, Einhyrning og í Hvanngili.
Ökufantarnir eru á Land Rover-jeppum með frönsk bílnúmer.
Þorsteinn M. Kristinsson, aðalvarðstjóri hjá Lögreglunni á Suðurlandi, staðfestir að málið sé á borði lögreglu sem líti það alvarlegum augum.
Hvaða leiðir hafið þið til að koma í veg fyrir svona utanvegaakstur?
„Það er kannski að það sé varsla víðs vegar um landið og á hálendinu, sem er nú víða. Þegar kemur að sumri þá er landvarsla víða. Svo er spurningin hvernig við náum í hnakkadrambið, ef maður orðar það þannig, á þeim sem eru að gera þetta. Það getur stundum verið býsna flókið og oft þarf samstarf margra lögregluembætta til að ná þessum mönnum. Ég ítreka það að ef menn verða áskynja um svona lagað að hafa samband við 112 sem fyrst. Ef það líður langur tími er erfiðara að eiga við þetta,“ segir Þorsteinn.
Aðalvarðstjórinn segir það einkum vera landverði og fólk sem starfar við ferðaþjónustu sem sendi ábendingar um viðlíka mál.
„Nú veit ég ekki nákvæmlega hver þessi tiltekni hópur er en það er náttúrulega alvarlegt ef það er verið að skemma landið okkar og aka utan vegar. Á þessum tíma er náttúran okkar viðkvæm. Margir hálendisvegir, ef ekki flestir, eru ennþá lokaðir og menn eru að fara inn fyrir lokanir. Svo dæmi sé tekið, Fjallabak syðri hún er lokuð núna,“ segir aðalvarðstjórinn.
Enginn eigi að fara inn á þessi svæði á ökutækjum.
„Viðurlögin við svona akstri utan vegar eru sektir, og þær geta skipt hundruðum þúsunda. Það bítur í ef þannig ber undir,“ segir Þorsteinn, spurður um hvernig lögregla geti beitt sér í málum sem þessum.
„Til að koma í veg fyrir svona utanvegaakstur þarf góðar merkingar, gott upplýsingaflæði til ferðamanna og annað slíkt og góða landvörslu. Forvarnargildið er í því en það er okkar að taka á því og ef brot er um að ræða þá eru það sektir.“
Þorsteinn segir að erfitt hafi verið að fylgja málinu eftir um helgina sökum mikilla anna. Í því skyni nefnir hann alvarlegt umferðarslys á Suðurlandi og fjölsótta tónlistarhátíð á Þingvöllum í gær. Mikill fjöldi lögreglumanna kom að hátíðinni.
„Við forgangsröðum gagnvart fólki og lífi og limum. Það er búið að vera þannig, verkefni um helgina, að það gengur fyrir en við vinnum að öllum málum og erum að vinna að þessu máli alveg eins og öðrum.“
