Kvika banki tilkynnti ellefu starfsmönnum í gær um uppsögn þeirra. Í tilkynningu frá Kviku segir að uppsagnirnar séu hluti af hagræðingaraðgerðum. Á hlutahafafundi bankans, sem einnig var í gær, var samþykkt að greiða sérstakar viðbótararðgreiðslur sem nema 10 milljörðum króna. Þegar hafði Kvika banki greitt 1,6 milljarða í arð á árinu.
Vísir hefur fjallað um málið.
„Maður getur svo sem sagt að það sé ákveðið taktleysi,“ segir Ari Skúlason, formaður Samtaka starfsmanna fjármálafyrirtækja, í viðtali við fréttastofu.
„En líka að það sé ákveðin hreinskilni í því. Það er ekki verið að reyna að fela neitt, þetta er bara svona. Þeir eru með mjög góða afkomu og þeir ákveða það að öll sú afkoma hún fari í hendur fjárfesta og þar með er sagan sögð.“
Engin tenging milli uppsagna og sérstakrar arðgreiðslu
Í tilkynningu Kviku segir að þrátt fyrir umtalsverðan vöxt á flestum sviðum bankans kalli breytt og krefjandi umhverfi á stöðugt aðhald í rekstri. Stöðugildum hjá bankanum hafi fækkað um samtals átján á árinu, sem gert er ráð fyrir að leiði til kostnaðarlækkunar um tæplega 400 milljónir króna á ári.
Ármann Þorvaldsson, forstjóri Kviku, segir í svari við fyrirspurn fréttastofu að engin tenging sé á milli viðbótararðgreiðslu og uppsagna.
„Þessi sérstaka arðgreiðsla sem samþykkt var í gær er vegna þess að eiginfjárstaða bankans hefur verið langt umfram kröfur eftirlitsaðila í kjölfar sölu Kviku á TM í fyrra (hluti af söluverðinu var greiddur út sem arður í fyrra en hluti núna) og minni eiginfjárbindingar lánasafns bankans í kjölfar svokallaðrar CRR3 lagasetningar. Engin tenging er því milli uppsagna gærdagsins og þessarar arðgreiðslu,“ segir Ármann.
Arðgreiðslan sé ekki tengd rekstrarafkomu heldur sé um að ræða umfram eigið fé.
„Bankinn greiddi á aðalfundi 25% af rekstrarhagnaði síðasta árs sem arðgreiðslu en það er í samræmi við markmið okkar um að 75% af hagnaði sé áfram nýttur af bankanum til að stækka lánabækur og vaxa, sem er grundvöllur þess að geta haldið fólki og ráðið nýtt til lengri tíma. Samtöl við starfsfólk í framhaldi af erfiðum uppsögnum er engu að síður alltaf erfið, en almennt hefur fólk skilning á því að ekki sé ráðist í svona sársaukafullar aðgerðir nema að vel ígrunduðu máli,“ segir forstjóri bankans.
„Þetta er bara skýrt og skorinort“
Ari Skúlason segir uppsagnirnar um sumt óvanalegar fyrir fjármálafyrirtæki eða banka. Á Íslandi og í nágrannalöndum hafi upp á síðkastið ítrekað verið bent á gervigreind sem ástæðu fyrir uppsögnum.
„Eins og að fyrirtækin telji að það sé bara fullkomlega eðlilegt að segja fólki upp vegna þess að það er eitthvað sem heitir gervigreind sem er til staðar,“ segir Ari og bendir á að Rapyd hafi stuðst við þá skýringu í síðustu viku.
„En Kvika er ekki að gera þetta með þeim hætti. Þetta er bara skýrt og skorinort.“
Einhverjir starfsmanna Kviku sem sagt var upp í gær eru búnir að hafa samband við Samtök starfsmanna fjármálafyrirtækja til að kanna rétt sinn. Ari segir fólkinu brugðið. Hann telur uppsagnirnar lögmætar þó að tímasetningin skjóti skökku við.
„Þó að þetta sé ekki skilgreint sem hópuppsögn þá eru þetta náttúrulega margir og þá beinast ástæðurnar ekki að einstaklingunum sem slíkum. Það náttúrulega er einhver skipulagsbreyting í gangi. Það er verið að breyta starfseminni, leggja niður eitthvað og svo framvegis. Þannig að það er ekki verið að segja þér upp af því að þú hafir staðið þig illa,“ segir Ari.
