Sanna Magdalenu Mörtudóttir, borgarfulltrúi Vinstrisins, setur spurningamerki við að útvista verkefnum sem upplýsingafulltrúar, og annað starfsfólk sem sagt var upp störfum í dag, sinnti.
„Maður veltir því fyrir sér hvort þetta muni skila einhverju eða hagræða til lengri tíma þegar verið er að treysta á utanaðkomandi aðila til þess að sjá um verkefni sem starfsfólk innan borgarinnar hefur sinnt og hefur byggt upp reynslu og þekkingu á þessum málefnum.“
Sanna segir skamman fyrirvara hafa verið á uppsögnunum. Hún óskaði eftir „smá andrými“ til að lesa gögn fyrir fund borgarráðs í morgun.
Hún er efins um árangur uppsagnanna.
„Ég sé ekki að þetta sé einhver niðurstaða sem skili góðri niðurstöðu fyrir Reykjavík eða borgarbúa,“ segir Sanna. Henni finnst skorta heildasýn á tilgang uppsagnanna.
Mannréttindaskrifstofa og mannréttindaráð verða lögð niður og lögbundin verkefni áfram tryggð og færð nær þeim sviðum sem sinna viðkomandi þjónustu.
Borgarráð mun fara með jafnréttismál sveitarfélagsins. Verkefni sem tengjast innflytjendum, fólki af erlendum uppruna, ofbeldisvörnum og Bjarkarhlíð verða færð til velferðarsviðs.
Verkefni sem snúa að hinsegin fræðslu og stuðningi við hinsegin börn og ungmenni verða færð til skóla- og frístundasviðs.
Jafnframt verður stofnað öldunga- og aðgengisráð Reykjavíkurborgar sem sinnir lögbundnu samráðs- og ráðgjafarhlutverki gagnvart eldra fólki og fötluðu fólki.
Stefnumótunar- og þróunarteymi á skrifstofu borgarstjóra og borgarritara verður lagt niður. Helstu verkefnum á borð við rannsóknarþjónustu, verkefnastýringu lýðheilsumála og Græna plani verður hætt.
Atvinnuþróun mun færast til umhverfis- og skipulagssviðs og ytri nýsköpun til þjónustu- og nýsköpunarsviðs. Verkefni á borð við samhæfingu stefnumótunar, persónuvernd og alþjóðamál verða áfram á skrifstofunni en með breyttum áherslum.
Eftirfarandi er haft eftir Hildi Björnsdóttur borgarstjóra í tilkynningu Reykjavíkurborgar.
Ég hét því að gera breytingar og taka til hendinni í rekstri borgarinnar. Það er eðlilegt að ég horfi fyrst til þeirra verkefna sem standa mér næst í þeim efnum, hér á skrifstofu borgarstjóra og borgarritara.
Þessar ákvarðanir eru hvorki einfaldar né teknar af léttúð. Rekstur borgarinnar stendur hins vegar að óbreyttu ekki undir lögbundinni þjónustu, nauðsynlegum fjárfestingum og mikilvægu viðhaldi innviða. Þess vegna reynast þessar aðgerðir nauðsynlegar. Nýr meirihluti mun halda áfram að velta við öllum steinum til að ná fram markmiðum okkar um hagræðingu og bætta þjónustu við íbúa.
Samhliða breytingum á skrifstofu borgarstjóra og borgarritara, sem kynntar voru í dag, verður skerpt á ráðningarbanni og viðveruskyldu innan miðlægrar stjórnsýslu, segir í tilkynningu frá Reykjavíkurborg.
Dregið verður úr ferðalögum borgarstarfsmanna og nýtt verklag innleitt þar sem ferðaheimildir skulu samþykktar af skrifstofu borgarstjóra og borgarritara.
Gert er ráð fyrir að breytingarnar taki gildi frá og með 1. júlí. Á næstu vikum og mánuðum verða frekari tillögur er snúa að rekstri borgarinnar kynntar af hagræðingarhópi borgarstjóra sem er að störfum.
Uppsagnir á skrifstofu borgarstjóra og borgarritara eru liður í markmiðum hagræðingarhóps meirihlutans.
Áætlað er að breytingarnarnar geti lækkað rekstrarkostnað borgarinnar um 280 til 330 milljónir króna á ársgrundvelli þegar innleiðingu skipulagsbreytinganna er að fullu lokið.
Skipulagsbreytingar á skrifstofu borgarstjóra og borgarritara hafa áhrif á 27 stöðugildi af 42 á skrifstofunum. Tillaga borgarstjóra var samþykkt á fundi borgarráðs í dag.
Þetta kemur fram í tilkynningu frá borginni.
18 störf verða lögð niður en gert er ráð fyrir að ráðið verði í einhver ný störf eftir því sem innleiðingunni vindur fram auk þess sem verkefnum verður útvistað. Níu starfsmenn verða fluttir milli sviða.
Starfsfólki skrifstofunnar mun eftir að breytingar hafa að fullu komist til framkvæmda, hafa fækkað um minnst 40% samkvæmt tilkynningunni.
Talsvert hefur verið fjallað um störf – og einkum fjölda – upplýsingafulltrúa hjá borginni á undanförnum árum.
Árið 2023 var fjallað um að alls væru þeir 17 talsins, þar af átta í upplýsingadeild Ráðhússins og níu til viðbótar sem skiptust á sjö svið borgarinnar.
Marta Guðjónsdóttir, þáverandi borgarfulltrúi Sjálfstæðisflokks, lagði fram hagræðingartillögu um að skrifstofa samskiptateymisins yrði lögð niður árið 2023. Kostnaður við skrifstofuna hafi þá numið um 190 milljónum króna á ári.
Sex upplýsingafulltrúar störfuðu hjá borginni þegar tilkynnt var um uppsagnir í dag, auk samskiptastjóra. Þeir störfuðu allir á skrifstofu samskipta og viðburða í ráðhúsinu, sem nú hefur verið lögð niður. Á sviðinu störfuðu tveir almennir upplýsingafulltrúar, einn á velferðarsviði, tveir hjá umhverfis- og skipulagssviði og einn hjá skóla- og frístundasviði.
Ef þú ert með upplýsingar eða ábendingar um málið máttu gjarnan senda á frettir@ruv.is eða hafa samband í síma 515-3030.
Skrifstofa samskipta og viðburða hjá Reykjavíkurborg hefur verið lögð niður og öllum upplýsingafulltrúum verið sagt upp.
Ekki var óskað eftir því að þeir ynnu uppsagnarfrest.
Á skrifstofu samskipta og viðburða störfuðu alls 14 manns, samkvæmt vef Reykjavíkurborgar: samskiptastjóri, sex upplýsingafulltrúar, þrír verkefnastjórar viðburða, verkefnastjóri miðlunar, ljósmyndari og tveir myndbandsgerðarmenn. Samkvæmt heimildum fréttastofu var tíu manns sagt upp
Ekki liggur fyrir hve mörgum hefur verið sagt upp í Ráðhúsi Reykjavíkur í dag. Formaður Sameykis staðfestir að félaginu hafi verið tilkynnt um uppsögnina fyrirfram samkvæmt lögum um hópuppsagnir sem tilkynntar eru til Vinnumálastofnunar.
Skilgreining Vinnumálastofnunar á hópuppsögn er eftirfarandi:
- að minnsta kosti 10 starfsmenn í fyrirtæki sem venjulega hafa fleiri en 20 og færri en 100 starfsmenn í vinnu,
- að minnsta kosti 10% starfsmanna í fyrirtæki sem venjulega hefur hið minnsta 100 starfsmenn, en færri en 300 starfsmenn í vinnu.
- að minnsta kosti 30 starfsmenn í fyrirtæki sem venjulega hafa 300 starfsmenn eða fleiri í vinnu.
Uppsagnir hjá fyrirtæki með 19 starfsmenn eða færri falla því ekki undir reglur um hópuppsagnir, jafnvel þótt 10 starfsmönnum eða fleiri sé sagt upp.
Frekari upplýsinga um uppsagnirnar er að vænta síðdegis. Borgarstjóri og þeir borgarfulltrúar sem fréttastofa hefur náð tali af ætla ekki að tjá sig fyrr en eftir að fundargerð borgarráðs hefur verið birt, en borgarráð samþykkti skipulagsbreytingarnar á fundi sínum í morgun.
Þá verður einnig send út fréttatilkynning um málið eftir að fundargerðin hefur verið birt.
Hildur Björnsdóttir borgarstjóri hefur ítrekað lagt til að Mannréttindaskrifstofa Reykjavíkurborgar verði lögð niður.
Á verkefnalista meirihlutans kemur fram að meirihluti Sjálfstæðisflokks, Viðreisnar og Framsóknarflokks ætli að „færa nauðsynleg verkefni mannréttindaskrifstofu yfir á velferðarsvið og ráðast í skipulagsbreytingar á skrifstofu borgarstjóra“ innan 100 daga í meirihlutastarfi.
„Þangað fara nokkur hundruð milljónir á ári hverju og við erum eina sveitarfélagið sem rekur mannréttindaskrifstofu. Ég veit ekki til þess að mannréttindi séu fótum troðin í Garðabæ eða Hafnarfirði eða Mosfellsbæ þótt þar sé ekki starfrækt slík skrifstofa,“ sagði Hildur í Silfrinu í mars.
Kári Sigurðsson, formaður Sameykis, sem sumir af starfsmönnum Reykjavíkurborgar eru skráðir í, segir dæmi um fyrrverandi starfsmenn borgarinnar sem hafa þegar hafa haft samband við stéttarfélagið.
Hann staðfestir að Sameyki hafi verið tilkynnt um uppsögnina fyrirfram samkvæmt lögum um hópuppsagnir sem tilkynntar eru til Vinnumálastofnunar.
Hann kvaðst þó ekki geta veitt upplýsingar um umfang uppsagnanna.
Ekki hefur náðst í fulltrúa í borgarráði, borgarritara né borgarfulltrúa Viðreisnar, Róbert Ragnarsson, sem leiðir hagræðingarhóp meirihlutans.
Fjölda starfsfólks Ráðhúss Reykjavíkurborgar hefur verið sagt upp eða fært til í starfi.
- Samkvæmt heimildum fréttastofu hefur skrifstofa samskipta og viðburða verið lögð niður. Starfsfólki var ýmist sagt upp eða það fært undir aðrar deildir.
- Öllum upplýsingafulltrúum borgarinnar var sagt upp.
- Þá herma heimildir fréttastofu einnig að Mannréttindaskrifstofa Reykjavíkurborgar hafi verið lögð niður. Heimildir herma að nokkrum hafi verið sagt upp og þrír færðir til í starfi.
- Stefnumótunar- og þróunarteymis skrifstofu borgarstjóra hefur einnig verið lagt niður samkvæmt heimildum.
- Þetta var samþykkt á fundi borgarráðs í morgun.
- Ekki liggur fyrir hvort fleiri breytingar á innri starfsemi borgarinnar hafi verið samþykktar í dag.
Ég heiti Iðunn Andrésdóttir og mun færa ykkur nýjustu fregnir af nýjustu vendingum hér í þessari fréttavakt.
