Til skoðunar er að setja upp sjö stafa símanúmer í Neyðarlínuna á meðan enn eru tæki í umferð sem ekki ná sambandi við hana. Þegar slökkt var á 2G- og 3G-sendum á landinu lentu nokkrir farsímaeigendur í því að geta ekki hringt neyðarsímtöl þrátt fyrir að geta hringt annað. Það er vegna þess að sumir símar eru þannig forritaðir að þeir leita í neyðarham og á 3G-senda þegar þeir hringja neyðarsímtöl. Þar sem búið er að slökkva á sendunum á Íslandi ná eigendur þessara síma ekki í gegn í 112.
Neyðarlínan er með númerið 112. Neyðarlínan er líka með númerið 570-2112 sem Íslendingum erlendis er bent á að hringja í ef þeir þurfa að ná sambandi við Neyðarlínuna. Þá er einnig hægt að hafa samband í gegnum gervihnött í síma 809-0112.
Þetta kemur fram í upplýsingum frá Elko til viðskiptavina 16. júní. Ólafur Aðalsteinsson, sviðsstjóri hjá Fjarskiptastofu, segir að það sé í skoðun að virkja sjö stafa neyðarnúmer fyrir þá sem þurfi á því að halda. Enn séu um 6.000 tæki á landinu sem ekki ná sambandi við 112.
Mögulega verður bætt við neyðarnúmeri
„Það var tekið fyrir á fundi í síðustu viku með fjarskiptafélögunum og Neyðarlínunni að Fjarskiptastofa myndi skoða það hvort væri nokkuð lagalega því til fyrirstöðu að nota sjö stafa númer til bráðabirgða fyrir þessa aðila með þessi tæki sem eru rauðmerkt, eða rétt um 6000 talsins. Það er í skoðun eins og staðan er núna,“ segir Ólafur. Einhverjir annmarkar gætu þó verið á því að vera með sjö stafa neyðarnúmer.
„Hindrunin í sjálfu sér væri að menn þurfa að gera sér grein fyrir því að það er töluverður munur á að vera með sjö stafa númer og hefðbundið neyðarnúmer sem er 112, á þann hátt að sjö stafa númerið mun ekki geta skilað sömu upplýsingum og almennt er þegar hringt er í 112 eins og staðsetningu símtækis og fleira. Menn þurfa þá að vita af þessum annmörkum áður en farið er af stað.“
Fréttastofa hefur undanfarið fjallað um fólk sem nær ekki sambandi við 112 þrátt fyrir að sími þeirra virki að öðru leyti. Einn þeirra sagði að hann ætlaði ekki að kaupa sér nýjan síma þrátt fyrir þetta og að hans fjarskiptafélag hefði sagt honum að hann yrði hreinlega að kaupa sér nýjan síma. Honum hafi ekki verið bent á hin tvö símanúmerin. Þar sem þetta eru sjö stafa símanúmer ætti hann að geta náð sambandi í gegnum þau.
