„Það fylgir auðvitað mínu starfi að taka erfiðar ákvarðanir,“ segir Hildur Björnsdóttir borgarstjóri um umfangsmiklar uppsagnir á skrifstofu hennar og borgarritara í dag.
Í samtali við fréttastofu segir hún ákvörðun um hagræðingaraðgerðir ekki hafa verið tekna af léttúð. Hún hafi aftur á móti verið nauðsynleg. Borgin hafi gert kröfu til sviðstjóra um hagræðingar og því sé eðlilegt að hún sem borgarstjóri sýni gott fordæmi og taki af skarið.
„Þegar breytingin hefur komist til framkvæmda að fullu og ráðið hefur verið inn í einhver ný hlutverk þá mun skrifstofan hafa minnkað um að minnsta kosti 40 prósent,“ segir Hildur.
Aðallega launakostnaður
Áætlað er að breytingarnar geti lækkað rekstrarkostnað borgarinnar um 280 til 330 milljónir króna á ársgrundvelli þegar innleiðingu skipulagsbreytinganna er að fullu lokið.
„Það er aðallega launakostnaður.“
Skipulagsbreytingarnar í dag hafa áhrif á 27 stöðugildi af 42 á skrifstofum borgarstjóra og borgarritara. Átján stöðugildi hafa verið lögð niður og níu hafa verið færð til í starfi. Öllum upplýsingafulltrúum borgarinnar var sagt upp.
Leggja áherslu á markaðssetningu borgarinnar
Aðspurð segir Hildur ekki standa til að útvista öllum kynningarmálum borgarinnar, þó að samskiptateymið hafi verið lagt niður. Ekki sé búið að semja við neinn um slík verkefni.
„Við ætlum að byggja upp nýtt, mun minna teymi miðlunar með nýjum hlutverkum þar sem við leggjum meiri áherslu á markaðssetningu borgarinnar og ímynd borgarinnar. Við gætum hugsanlega útvistað einhverjum tilfallandi verkefnum, en það verður engin viðvarandi útvistun verkefna.“
Mannréttindi og jafnréttismál enn í heiðri höfð
Þá segir Hildur að verkefnum mannréttindaskrifstofu verði ekki útvistað heldur verði þau færð nær þjónustuþegum. Hún vísar gagnrýni Vinstrisins og Samfylkingarinnar á bug. Málaflokkar mannréttindaskrifstofu skipti borgarstjórn ekki minna máli.
„Mannréttindi og jafnréttismál og þau mál sem hafa heyrt undir mannréttindaskrifstofuna verða enn í heiðri höfð og varin hér í borgarkerfinu. Eins og ég segi þá erum við að færa verkefnin nær fólkinu þar sem það nýtur þjónustunnar,“ segir Hildur.
„Við erum til að mynda að færa hinsegin fræðsluna inn á skóla- og frístundasvið. Við erum að færa ofbeldisvarnamálin undir velferðarsvið og ég gæti áfram talið. Þannig að það var vel vandað til verka að hýsa mikilvæg verkefni og ekki síst lögbundin verkefni á þeim stöðum þar sem best er að þau séu hýst.“
