Maður sem The Telegraph lýsir sem nýnasista og segist vera transkona hefur verið sendur í kvennafangelsi í Þýskalandi eftir að hafa verið framseldur frá Tékklandi. Málið hefur vakið mikla umræðu í Þýskalandi þar sem margir telja að viðkomandi hafi skráð sig sem konu til að hæðast að nýjum lögum um kynvitund þar í landi og sýna fram á hvernig hægt er að misnota þau.
Marla-Svenja Liebich, áður Sven Liebich, var á miðvikudag framseldur frá Tékklandi. Liebich hafði verið eftirlýstur frá því í ágúst á síðasta ári eftir að hafa ekki mætt til að hefja afplánun á eins og hálfs árs fangelsisdómi.
Dómurinn var kveðinn upp árið 2023 vegna brota sem meðal annars vörðuðu meiðyrði og hvatningu til haturs.
Skráði sig sem konu eftir lagabreytingar
Á meðan á áfrýjun dómsins stóð skráði Liebich sig sem konu samkvæmt nýjum lögum sem ríkisstjórn Olaf Scholz innleiddi og einfalda verulega breytingar á skráðu kyni og nafni í opinberum gögnum.
Liebich hefur síðan komið fram opinberlega í kvenfatnaði og með yfirvaraskegg. Hann hefur sjálfur sagt að ákvörðunin hafi meðal annars verið tekin til að forðast mismunun af hálfu karlkyns fanga.
Margir í Þýskalandi hafa hins vegar litið svo á að kynskiptin séu pólitísk ádeila á lögin og tilraun til að sýna fram á að hægt sé að misnota þau.
Sendur í kvennafangelsi vegna skráðs kyns
Þýsk fangelsisyfirvöld staðfestu þegar árið 2025 að ákvörðunin um að vista Liebich í kvennafangelsi byggðist á skráðu kyni en ekki líffræðilegu kyni.
Liebich hefur um árabil verið áberandi persóna í hægri hreyfingum í austurhluta Þýskalands og hefur verið skilgreindur sem hægri öfgamaður af þýsku leyniþjónustunni í Saxlandi.
Hann vakti athygli á tímum Covid faraldursins sem einn af leiðtogum mótmæla gegn bólusetningum og er sagður hafa sést á mótmælafundum klæddur einkennisbúningum sem minna á búninga nasista.
Árið 2022 truflaði Liebich gleðigöngu hinsegin fólks í borginni Halle og kallaði þátttakendur meðal annars „sníkjudýr samfélagsins“, samkvæmt fréttum þýskra fjölmiðla.
Lögin verða endurskoðuð
Þegar lögin voru samþykkt sagði Olaf Scholz að þau væru mikilvægt skref í átt að aukinni virðingu fyrir transfólki, intersex einstaklingum og kynsegin fólki.
Málið hefur hins vegar orðið eitt umdeildasta dæmið um mögulega misnotkun laganna og ríkisstjórn Friedrich Merz kanslara hefur þegar lýst því yfir að hún hyggist endurskoða lögin um sjálfsákvörðun kyns.
