Lögregla telur sig komna með nokkuð skýra mynd af atburðarásinni í Austurbergi umrædda nótt. Fullorðnir feðgar, sonurinn á miðjum fertugsaldri og faðirinn um sextugt, sem höfðu brugðið sér á sportbarinn Álfinn í Hólagarði voru á leið af barnum þegar þeir mættu karlmanni sem taldi sig eiga erindi við soninn.
Samkvæmt heimildum fréttastofu mun maðurinn, sem er sá sem lést umrædda nótt og var jafnaldri sonarins, hafa ógnað syninum og í framhaldi ráðist á hann. Kona var í för með manninum og er meðal lykilvitna í málinu. Feðgarnir munu í sameiningu hafa losað soninn undan manninum og hörfað í framhaldinu suður Austurbergið.
Annar karlmaður bættist í hópinn og voru þau þrjú sem eltu feðgana eftir suður Austurbergið. Þar skýrist atburðarásin til muna vegna myndefnis úr öryggismyndavél við Fjölbrautaskólann í Breiðholti sem er meðal lykilsönnunargagna í málinu. Á gatnamótum Austurbergs og Hraunbergs urðu aftur orðaskipti á milli mannanna og feðganna.
Eins og Vísir greindi frá í gær sést karlmaðurinn sem lést reiða til höggs með stein í hönd þannig að faðirinn féll til jarðar.
Þá mun sonurinn hafa gripið til vasahnífs sem hann var með á sér, sært karlmanninn sem hafði bæst í hópinn nokkru fyrr og réðst á karlmanninn sem hafði ráðist á föður hans. Afleiðingarnar voru þær að árásarmaðurinn lét lífið og hinn særðist alvarlega með nokkur alvarleg stungusár.
Feðgarnir voru svo handteknir ásamt þriðja manni á heimili sonarins í fjölbýlishúsi í Fellahverfinu skömmu síðar. Vasahnífurinn fannst í íbúð sonarins. Feðgarnir voru handteknir ásamt þriðja manni sem er kunningi sonarins. Hann er, eins og konan, lykilvitni í málinu og gaf skýrslu áður en honum var sleppt á sunnudeginum.
Samkvæmt heimildum Vísis hafði karlmaðurinn sem lést verið ágengur gagnvart syninum í nokkurn tíma og krafið hann um peningagreiðslu. Í daglegu máli er talað um handrukkun og í þessu tilfelli var syninum sagt að hann stæði í skuld sem þyrfti að greiða. Talið er að ástæða þess að dró til tíðinda umrædda nótt með hörmulegum afleiðingum hafi verið sú að sonurinn átti von á örorkubótum um mánaðamótin og var því greiðslufær.
Sonurinn sætir gæsluvarðhaldi á grundvelli almannahagsmuna til 7. desember. Föðurnum var sleppt úr haldi lögreglu nokkrum dögum eftir atburðina en hafði mátt sæta einangrun í nokkra daga líkt og sonurinn. Samkvæmt heimildum Vísis ber sonurinn fyrir sig neyðarvörn og að hann hafi verið að verjast árásum hins látna og samverkamanns.