Fyrsti reikningur Nebraska ehf., félags Heiðu Kristínar Helgadóttur, til utanríkisráðuneytisins vegna ráðgjafar hennar við Þorgerði Katrínu Gunnarsdóttur utanríkisráðherra er dagsettur 1. mars 2026. Það er þremur dögum áður en skriflegur verksamningur var undirritaður og tók gildi.
Samningurinn átti að gilda þar til þjóðaratkvæðagreiðslan um áframhald aðildarviðræðna við Evrópusambandið hefði farið fram. Hún fór fram 29. ágúst. Engu að síður voru tveir reikningar til viðbótar gefnir út eftir hana, 31. ágúst og 21. september, hvor upp á fullt mánaðargjald. Í þeim gögnum sem Nútíminn hefur fengið frá utanríkisráðuneytinu er hvorki að finna skriflega framlengingu né viðauka við samninginn.

Reikningur fyrir „ritstörf og ræðuskrif“
Á fyrsta reikningnum, númer 101, segir að hann sé vegna „Ráðgjöf, ritstörf og ræðuskrif“ og „Vinna í mars 2026“. Þar stendur einnig: „Unnið af Heiðu Kristínu Helgadóttur að beiðni ÞKG.“
Verksamningurinn var undirritaður 4. mars og í honum segir að hann taki gildi við undirritun. Martin Eyjólfsson ráðuneytisstjóri undirritaði hann fyrir hönd ráðuneytisins og Heiða Kristín fyrir hönd Nebraska. Af reikningnum verður ekki ráðið hvenær hann var greiddur.
Samkvæmt samningnum fékk Nebraska fast mánaðargjald, 1.750.000 krónur án virðisaukaskatts, „fyrir allt að 25 klst á viku“. Það er hámark en gögnin sýna ekki hversu margar klukkustundir voru unnar.

Tveir reikningar eftir atkvæðagreiðsluna
Reikningur númer 123 var gefinn út 31. ágúst og reikningur númer 129 þann 21. september. Hvor um sig hljóðar upp á 1.750.000 krónur án virðisaukaskatts vegna ráðgjafar. Á þeim kemur ekki fram hvort þeir eru vegna vinnu í september og október eða uppgjör vegna meiri vinnu fyrr á tímabilinu.
Morgunblaðið greindi frá því 18. nóvember að ráðherra og Heiða Kristín hefðu gert munnlegt samkomulag um meiri greiðslur, þar sem vinnan hefði reynst umfangsmeiri, bæði fyrir og eftir atkvæðagreiðsluna. Sex mánaðargjöld hefðu numið 10,5 milljónum króna en greiðslurnar urðu 14 milljónir án virðisaukaskatts.
Reikningarnir átta nema samtals 17.360.000 krónum með virðisaukaskatti þegar kreditreikningur hefur verið dreginn frá. Á rafrænum reikningi númer 107 var fjárhæðin 37.200 krónum hærri en mánaðargjaldið. Það var leiðrétt með kreditreikningi sem dagsettur er 9. september.
Skrifaði sjálf samningsdrögin
Heiða Kristín sendi ráðuneytisstjóranum sín eigin samningsdrög 18. febrúar. Í þeim var ákvæði um að ráðuneytið greiddi allan útlagðan kostnað, „þar með talinn ferðakostnaður“. Það ákvæði er ekki í undirritaða samningnum og enginn ferðakostnaður kemur fram á reikningunum. Stjórnmálin.is hafa áður fjallað um tölvupóstinn sem fylgdi drögunum.
Þegar Martin sendi henni drög til undirritunar 3. mars svaraði hún: „Takk fyrir þetta. Ég bætti við allt að 25 klst á viku. Annars er þetta flott.“ Í þeim drögum var ákvæði um eins mánaðar gagnkvæman uppsagnarfrest. Í samningnum sem undirritaður var daginn eftir var það horfið og gildistíminn bundinn við þjóðaratkvæðagreiðsluna. Málið er skráð í málaskrá ráðuneytisins undir málalyklinum „Ráðningar“.

„Ekki aukin útgjöld“
Í tilkynningu ráðuneytisins 10. mars sagði að ráðningin væri tímabundin og að ráðherra hygðist ekki ráða sér annan aðstoðarmann meðan á verkefninu stæði.
Þorgerður Katrín sagði á Alþingi 15. október: „Það var ekki ráðinn annar aðstoðarmaður inn í ráðuneytið meðan á ráðgjöf Heiðu Kristínar stóð, þannig að það sé alveg skýrt, og ekki aukin útgjöld fyrir ríkissjóð.“