Páll Vilhjálmsson skrifar:

Í viðtali við Tómas Arnar Þorláksson blaðamann Vísis 9. júlí vísaði Þorgerður Katrín utanríkisráðherra í samtal við Rob Jetten forsætisráðherra Hollands. Í fréttinnisegir:

Þorgerður Katrín utanríkisráðherra segir að ekki komi til greina að veita afslátt af kröfu Íslands um undanþágu og segir orð forsætisráðherra Hollands ekki í samræmi við hennar samtöl við hann. (feitletr. pv)

Tilefni viðtals blaðamanns Vísis við Þorgerði Katrínu voru orð Rob Jetten á hollenska þinginu um að Ísland fengi ekki undanþágu frá sjávarútvegsstefnu ESB.

Augljóst er af fréttinni í Vísi 9. júlí að tveir ESB-sinnar, ráðherra og blaðamaður, leggja á ráðin um að bjarga ESB-umsókninni. Það sést m.a. á fyrirsögninni og myndskreytingu fréttarinnar þar sem sneitt er að Miðflokknum.

Lykilsetningin í fréttinni, feitletruð hér að ofan, er að Þorgerður Katrín segist hafa átt samtal við hollenska forsætisráðherrann. En það samtal fór aldrei fram, líkt og Þorgerður Katrín játar í viðtengdri frétt Morgunblaðsins.

Í tvær vikur vissu bæði Þorgerður Katrín og ritstjórn Vísis að sameiginlega höfðu þau komið falsfrétt á framfæri um mikilsvert atriði í umræðunni um ESB-umsókn. Tíminn var notaður til að samræma framburð og lágmarka skaða, líkt og tíðkast hjá brotamönnum sem staðnir eru að verki.

Eftir að hafa neitað blaðamönnum Morgunblaðsins um viðtal í nokkra daga gaf Þorgerður Katrín færi á sér og játaði að hafa aldrei rætt við Jetten, hvorki um undanþágur né annað:

„Ég sagði það aldrei, ég hef ekki talað við Rob Jetten,“ segir Þorgerður í samtali við Morgunblaðið en ráðherrann hefur uppskorið mikla gagnrýni fyrir þau ummæli sem hún þvertekur nú fyrir.

Ráðherra varpar sökinni á lygara með blaðamannaskírteini, Tómas Arnar Þorláksson á Vísi. Eftir játningu Þorgerðar Katrínar í Morgunblaðinu skrifar falsfréttamaðurinn leiðréttingu. Hann tekur á sig hluta brotsins með þessari setningu:

Fréttamaður virðist hafa túlkað orð Þorgerðar með röngum hætti en hún átti þá við samtöl sín við ónefnda Hollendinga sem starfa innan Evrópusambandsins.

Þorgerður Katrín og Tómas Arnar munu eiga sameiginlegt móðurmál, íslensku. Samtal tveggja ESB-sinna kemst engu að síður á slíkt flækjustig að starfsmaður Evrópusambandsins, með hollenskt ríkisfang, verður að forsætisráðherra Hollands. Er upp kemst leggja trúgjarn blaðamaður og ósvífinn ráðherra í púkk og úr verður froða til að fela lygi.

Tómas handhafi blaðamannaskírteinis freistar þess að milda sekt sína og skrifar:

Það má taka fram að fréttastofu [Vísis] bárust engar ábendingar frá utanríkisráðuneytinu um að rangt væri farið með mál eftir að fréttin var birt fyrir tveimur vikum. Brugðist hefði verið við því umsvifalaust.

Lygin hentaði Þorgerði Katrínu í tvær vikur. Er þrýstingur óx á ráðherra að gera grein fyrir ímynduðu samtali við Rob Jetten forsætisráðherra Hollands afturkallaði Þorgerður Katrín lygina. Ekki fyrr.

Utanríkisráðherra er óheiðarlegri en hversdagslegur ósannindamaður. Lygari veit sannleikann en kýs ósannindi. Þorgerður Katrín greinir ekki á milli sanninda og lygi. Málugi ráðherrann skáldar samtöl, fundi og atburði eftir hentisemi. Ritstjórn Vísis rennir í grun hvaða mann utanríkisráðherra hefur að geyma og birtir skáletrað orðrétt eftir ráðherranum:

mína kollega, hvort sem það er frá Þýskalandi, Spáni, Írlandi, Slóvakíu og ég get nefnt þá miklu, miklu fleiri.

Þorgerður Katrín nefnir engin nöfn en talar um ,,kollega“ sína. Eðlilegur skilningur á orðum hennar er að utanríkisráðherrar, þ.e. starfsbræður og systur Þorgerðar Katrínar, í mörgum ESB-ríkjum séu sammála túlkun hennar að hægt sé að kíkja í pakkann, sjá hvað er í boði. Með ,,miklu, miklu fleiri“ hlýtur Þorgerður Katrín að eiga við flesta ef ekki alla utanríkisráðherra ESB-ríkja. Þeir eru 27. En enginn þeirra hefur sagt opinberlega það sem íslenski utanríkisráðherrann segist hafa heyrt frá þeim í einkasamtölum.

Yrði gengið á Þorgerði Katrínu og hún krafin um nöfn ,,kollega“ sinna mun hún segja að hún hafi átt við starfsmenn ESB í Brussel. Rétt eins og embættismaður þar (líka ónafngreindur) varð að forsætisráðherra Hollands – af því það hentaði málóðum utanríkisráðherra Íslands.

Á læknamáli ber hegðun Þorgerðar Katrínar sérstakt nafn, Pseudologia fantastica.