Hún var ein 17 nemenda sem brautskráðust sl. laugardag með BS-próf í reiðmennsku og -kennslu frá Háskólanum á Hólum í Hjaltadal – Hólaskóla. Þar fékk hún meðal annars Morgunblaðshnakkinn, sem blaðið hefur um árabil veitt þeim nema sem náð hefur bestum samanlögðum árangri í reiðmennsku yfir skólaárin þrjú. Þórey gerði sér svo lítið fyrir og vann einnig verðlaun þau sem Félag tamningamanna veitir fyrir hæstu einkunn á lokaprófi í reiðmennsku.
Tamningar, kennsla og járningar
Nemendur á Hólum voru sem fyrr segir brautskráðir úr námi í reiðmennsku og reiðkennslu. Einnig einn nemandi með MS-próf í hestafræðum og svo fyrsti hópurinn, sex nemendur, úr nýju sérhæfðu námi í járningum hesta. Sú námslína hefur lengi verið í þróun í Hólaskóla, en mikil þörf hefur þótt vera á að bjóða menntun í járningum.
Nemendurnir munu, að loknu eins árs námi, fara út á akurinn til starfa með sérþekkingu á járningum og hófhirðu og geta orðið leiðandi í þróun járninga og faglegrar þekkingar úti í hinu stóra samfélagi sem tengist íslenska hestinum. Af kunnugum er járningum lýst sem svo að þær séu mikil kúnst. Þegar skeifa er lögð á hóf og fest með fjöður er hún aðeins millimetra frá kvikunni. Fyrir innan hófbeinið er blóðflæði og taugar sem ekki mega raskast. Eimitt þess vegna þarf að vanda mjög til verka eins og kennt er á Hólum.
„Hestamennskan á Íslandi er í mikilli sókn og ungt fólk kemur þar inn í talsverðum mæli nú. Sá stuðningur sem hestamannafélögin veita krökkum sem kannski hafa ekkert bakland í sportinu en langar að leggja þetta fyrir sig hefur þar mikið að segja,“ segir handhafi Morgunblaðshnakksins, Þórey Þula, sem er frá bænum Hvammi í Hrunamannahreppi skammt frá Flúðum.
„Mér fannst frábært að fara á Hóla; aðstaðan þar er góð og kennararnir frábærir. Ég er eftir þetta komin með ágæta þekkingu til þess að takast á við ný verkefni í hestamennskunni. Ég hef fengist við bæði tamningar og reiðkennnslu, til dæmis meðal ungmenna hér í uppsveitum Árnessýslu. Vonandi verða verkefnin fleiri í framtíðinni, en vettvangur þeirra sem starfa með íslenska hestinn er ekki síst erlendis.“
Fallegur dagur
Dagskráin á Hólum síðasta laugardag byrjaði með glæsilegri reiðsýningu reiðkennaranema sem náði hámarki þegar varaformaður Félags tamningamanna klæddi þá í bláan einkennisjakka félagsins. Samkvæmt langri hefð fóru nemendur á hestum sínum í beinu framhaldi af reiðsýningunni upp að Hóladómkirkju í myndatöku. Prúðbúnir knapar og glæstir gæðingar í umgjörð sem á tæpast sinn líka.
Brautskráningarathöfnin fór fram í þéttskipuðum íþróttasal skólans þar sem prófskírteini og verðlaun fyrir úrvals námsárangur voru afhent. Hera Sól Hafsteinsdóttir fékk verðlaun fyrir hæstu einkunn á BS-prófi og þau Charlotta Börgmann og Kristófer Darri Sigurðsson verðlaun fyrir frábæran námsárangur í kennslufræði og reiðkennslu.
„Brautskráningardagurinn var bjartur og fallegur, sem vekur góðar vonir um framtíð hestamennskunnar á Íslandi,“ segir Hólmfríður Sveinsdóttir, rektor Háskólans á Hólum. Alls voru 65 nemendur við hestafræðideild skólans; þar af 58 í reiðmennsku og tamningum. Brautskráning nemenda frá ferðamála- og fiskeldisdeildum verður svo á næstu dögum.
Dýr og fatlað fólk
„Járninganámið við hestafræðideild kemur vel út og er nauðsynlegt. Það er sérhannað fyrir ganghesta eins og þá íslensku, sem eru tugir þúsunda víða um lönd,“ segir rektorinn og bætir við:
„Hér er margvíslegt starf tengt íslenska hestinum í þróun. Núna er í undirbúningi að setja upp námslínu í dýrastuddri þjónustu við fatlað fólk. Reynsla og rannsóknir sýna að fólk sem glímir við einhvers konar hömlun, hvort sem hún er andleg eða líkamleg, getur notið þess mjög að vera með dýrum, til dæmis hestum. Þetta er starf sem sálfræðingar, geðlæknar, iðjuþjálfar, kennarar og fleiri tengdar stéttir koma að. Um þessi efni var fjallað á ráðstefnu hér á Hólum nýlega og væntanlega verðum við með einhver námskeið þessu tengd næsta vetur. Hugsanlega verður svo námslína á þessu sviði sett upp á allra næstu árum.“
