Donald Trump Bandaríkjaforseti kallaði mótmælanda feitan og sagði hann þurfa að fara í megrun þegar lögreglumenn fylgdu viðkomandi út af samkomu forsetans í Youngstown í Ohio í gærkvöldi. Til átaka hafði komið í áhorfendastúkunni áður en mótmælandanum var fylgt út.
Atvikið varð í Covelli Centre mánudaginn 12. október og náðist í sjónvarpsútsendingu Newsmax. Mótmælandinn var í bol með áletruninni „Release the Epstein Files“, þar sem þess var krafist að gögn tengd Jeffrey Epstein yrðu birt.
Gerði gys að holdafari mótmælandans
Trump gerði hlé á ræðu sinni og beindi athyglinni að mótmælandanum meðan lögreglumenn færðu viðkomandi í átt að útganginum. Forsetinn gerði meðal annars gys að holdafari hans.
„Ó, hann þarf að fara í megrun! Hann er feitur. Vá. Vá. Hann þarf að fara í megrun strax. Við þurfum það öll,“ sagði svo forsetinn og brosti.
Trump lýsti jafnframt ánægju með lögregluna og sagði mótmælandann vera á leið aftur heim til mömmu sinnar.
Sagði mótmælendur fá greitt frá vinstrimönnum
Forsetinn fullyrti einnig að mótmælandinn fengi greitt fyrir að trufla samkomuna og sakaði pólitíska andstæðinga sína um að fjármagna slíkar aðgerðir.
„Þetta er launaður mótmælandi. Þeir eru allir launaðir. Þeir fá borgað frá vinstrimönnum til að eyðileggja landið okkar.“
Trump kallaði mótmælendurna jafnframt úrhrök og hélt síðan áfram að tala um foreldra þess sem lögreglan fylgdi út.
„Það sem hann veit ekki er að mamma hans og pabbi kusu mig. Og þau eru alveg brjáluð.“
