Bókin Vertu þú, sem notuð er í kennslu í Vesturbæjarskóla, hefur vakið athygli eftir að annar höfunda hennar, Ingileif Friðriksdóttir, gagnrýndi opinberlega Atla Heiðar Gunnlaugsson fyrir að óska eftir undanþágu frá hinseginfræðslu fyrir barn sitt í skólanum.
Meðhöfundur Ingileifar að bókinni er María Rut Kristinsdóttir, þingmaður Viðreisnar.
Fjallar um kynvitund og fjölbreytileika
Samkvæmt kynningu útgefanda er Vertu þú safn af „litríkum sögum af fjölbreytileikanum“. Í bókinni er meðal annars fjallað um að „ekki skipti máli í hvaða kyni við upplifum okkur í“.
Höfundarnir, Ingileif og María Rut, standa einnig að fræðsluvettvanginum Hinseginleikinn.
Samkvæmt upplýsingum frá útgefanda er bókin ætluð tveimur aldurshópum; annars vegar börnum frá fæðingu til fimm ára og hins vegar börnum á aldrinum sex til tólf ára.
Tengsl við stjórnmál og ráðuneyti
Á heimasíðu Alþingis kemur fram að Ingileif og María Rut séu makar og eigi saman þrjú börn.
María Rut var kjörin á Alþingi fyrir Viðreisn í síðustu kosningum. Áður starfaði hún sem aðstoðarmaður Þorgerðar Katrínar Gunnarsdóttur, formanns Viðreisnar. Ingileif gegnir nú því starfi.
Umræða um hagsmunatengsl
Töluverð umræða skapaðist á samfélagsmiðlum eftir að Nútíminn greindi frá því að Vertu þú væri meðal kennsluefnis í Vesturbæjarskóla.
Gagnrýnendur hafa bent á að þegar Ingileif gagnrýndi afstöðu Atla Heiðars hafi hún ekki tekið fram að bók sem hún skrifaði ásamt maka sínum væri hluti af því kennsluefni sem deilan snerist um.
Skólastjóri Vesturbæjarskóla staðfestir loks að bókin „Vertu þú“ er notuð í kennslu í skólanum
Gagnrýni á samfélagsumræðuna
Meðal þeirra sem tjáðu sig um málið er Ragnhildur Kolka, sem skrifaði athugasemd við færslu á blogginu Tilfallandi athugasemdir.
Ragnhildur setti málið í samhengi við það sem hún kallar „týpíska stelpugleði“ í íslensku samfélagi og sagði slíka menningu einkennast af „fláræði, pískri og launráðum bak við tjöldin“.
Ummælin hafa, líkt og málið sjálft, vakið nokkra umræðu á samfélagsmiðlum.
