Aðstoðarskólastjóri segir fyrirætlanir menntamálaráðherra um að innleiða nýjan námskvarða í grunnskóla illa ígrundaðar. Tímasetning innleiðingar sé óraunhæf.
Innleiðing ógerleg á svo skömmum tíma
Nemendum í 10. bekk grunnskóla verður gefin lokaeinkunn í tölustöfum í stað bókstafa í vor, verði áætlanir menntamálaráðherra að veruleika. Það verður í fyrsta sinn í rúman áratug sem einkunnir í grunnskóla verða gefnar í tölustöfum, eða síðan bókstafseinkunnir voru teknar inn í aðalnámskrá 2011 og innleiddar að fullu 2015.
Margrét Lilja Pálsdóttir, aðstoðarskólastjóri Skarðshlíðarskóla, situr í innleiðingarhópi menntamálaráðuneytis. Hún segir þessar fyrirætlanir áhyggjuefni.
„Ég bara fer ekkert ofan af því að tímasetningin er óraunhæf og að ætlunin að innleiða þetta á svo skömmum tíma er ógerleg að mínu mati.“
100 umsagnir í samráðsgátt stjórnvalda
Drög að bráðabirgðaákvæði um notkun talnakvarða í námsmati við lok grunnskóla eru í samráðsgátt stjórnvalda og rennur frestur út í dag. Yfir hundrað umsagnir hafa borist.
Umsagnaraðilar benda margir hverjir á að óheppilegt sé að innleiða nýtt námsmat án þess að breyta aðalnámskrá og frestur til innleiðingar sé alltof stuttur, sem auki álag á skólastjórnendur og geri nemendur tíunda bekkjar að tilraunahópi.
„Það er mjög óskýrt í rauninni í hverju þetta felst. Það er eins og við séum að byrja á vitlausum enda. Það að breyta um einkunnakvarða breytir voðalega litlu þegar á heildina er litið, þetta er sama fyrirkomulag en bara tölur versus bókstafir. Tölurnar eru ekki að fara að þýða það sama og við gerum ráð fyrir, ef við erum að fara í þetta sama gamla fyrirkomulag og áður.“
Fór út af fundi með fleiri spurningar en inn
Margrét Lilja segir að ákvörðun hafi verið tekin í Skarðshlíðarskóla um að vinna ekkert í þessum málum á meðan drögin eru í samráðsgátt stjórnvalda.
„Við erum þrjú hér í mínum skóla búin að sitja í innleiðingarteyminu og erum búin að mæta samviskusamlega á fundi með Miðstöð menntunar og skólaþjónustu í held ég alveg fimm vikur í röð.“
Fundirnir hafi verið metnaðarfullir og segir Margrét Lilja að vel hafi verið haldið utan um fulltrúa skólasamfélagsins sem sátu þá.
„Ég viðurkenni nú samt að upplifunin var að það voru fleiri spurningar sem urðu til eftir hvern fund heldur en maður fór með inn á fund. Við tókum ákvörðun um að gera ekkert á meðan þetta er í samráðsgátt og bíðum eftir frekari niðurstöðum.“
Enginn sameiginlegur skilningur á matskvarðanum
Grunnskólarnir hafa til 10. janúar til að birta endurskoðaða skólanámskrá. Margrét Lilja segir langt í frá að þessi tímarammi sé raunhæfur.
„Það er bara ekki hægt að ætlast til þess að við þróum sameiginlegan skilning á þessum nýja matskvarða þegar það er enginn sameiginlegur skilningur á honum,“ segir hún.
„Við þurfum að endurskoða allt námsmat, það þarf að samræma vinnubrögð og það þarf að kynna breytingarnar fyrir kennurunum og starfsfólki í skólunum. Eins og staðan er núna erum við þrjú að reyna að kafa ofan í þetta og reyna að ná einhverjum skilningi, því á meðan við skiljum þetta ekki almennilega getum við heldur ekki kynnt þetta fyrir starfsfólkinu með faglegum hætti.“
Að innleiða slíkar breytingar á jafn knöppum tíma vegi að þeirri fagmennsku sem eigi að vera við lýði innan skólakerfisins.
„Samkvæmt fræðunum er talað um að innleiðingarferli geti tekið á bilinu þrjú til fimm ár,“ segir Margrét Lilja. Slíkt hefði verið vænlegra.
„Og fara þá í aðeins viðameiri breytingar samhliða þessu. Og það er þá bara endurskoðun á aðalnámskránni. Því að það að taka námsmatskvarðann og breyta honum rímar ekki við þá aðalnámskrá, eða Biblíuna, sem við erum að nota sem er okkar gagn til að skipuleggja okkar kennslu.“
„Það verður að minnsta kosti ekki faglegt“
Margrét Lilja segir að kennarar séu allir af vilja gerðir til þess að koma að breytingum skólakerfinu og nemendum í hag, en ekki með þessum hætti.
„Þetta snýst ekki um að viljinn sé ekki fyrir hendi. Ég var á stórri ráðstefnu skólastjórnenda og þar voru allir sammála um það og tilbúnir í samtal og vegferð um að fara í breytingar á menntakerfinu og gera það með skynsömum og faglegum hætti.“
Nauðsynlegt sé að tímarammi breytinganna sé endurskoðaður.
„Að minnsta kosti erum við ekki að upplifa þetta sanngjarnt, gagnsætt, faglegt eða bara gagnlegt fyrir námið eins og staðan er núna. Þetta snýst um nemendur en ekki að ráðherra hafi síðasta orðið,“ segir Margrét Lilja.
Telur þú raunhæft að þetta verði að veruleika í vor, að tíundu bekkingar verði útskrifaðir með tölustafi?
„Sko, raunhæft og ekki raunhæft. Það verður að minnsta kosti ekki faglegt.“
