Íbúar á Álftanesi mótmæla vegg sem hefur verið hlaðinn upp við golfvöllinn og strandlengjuna í Helguvík. Þeir saka forsvarsmenn golfklúbbsins og bæjaryfirvöld um skort á samráði við íbúa.
Veggurinn tók að rísa fyrir um hálfum mánuði.
Íbúar báðu um tafarlausan fund með bæjaryfirvöldum
Þorkell Helgason og Sigurður Magnússon búa við Höfðabraut, á Álftanesi.
Þeir segja að steypuhlunkarnir sem hefur verið komið fyrir við strandlengjuna hafi komið öllum á óvart.
Þorkell hafði samband við forsvarsmenn golfklúbbsins þegar hann sá vegginn rísa.
„Og hann viðurkenndi að þetta væri á þeirra vegum. Og ég spurði um framkvæmdaleyfi og hann kannaðist nú ekki við að það væri fyrir hendi en yrði eflaust fengið.“
Þorkell telur að bæjaryfirvöld hafi ekki vitað af framkvæmdinni.
„Þannig þetta er svona íslensk aðferð, framkvæma fyrst og spyrja svo,“ segir Þorkell.
Íbúar við Höfðabraut skrifuðu undir áskorun til bæjarstjórnar Garðabæjar um tafarlausan fund vegna veggjarins, sem þau segja að valdi meðal annars mikilli sjónmengun.
Þorkell og Sigurður efast einnig um notagildi veggjarins, sé honum ætlað að verja golfvöllinn fyrir öldugangi.
Sigurður segist hafa átt von á að sjóvarnargarðarnir við Helguvík yrðu hækkaðir vegna vaxandi öldu.
„Og þá gat maður ímyndað sér að þetta væri einhver bráðaaðgerð sem að ætti kannski að gera þangað til búið væri að hækka garðinn. En það virðist ekki vera tengt neitt,“ segir Sigurður.
Funda með bæjaryfirvöldum á mánudag
Íbúarnir funda með bæjarstjórninni á mánudag og vonast til að síðan verði grenndarkynning.
Þorkell telur framkvæmdina brjóta í bága við ákvæði reglugerðar um framkvæmdaleyfi. Í reglugerðinni er kveðið á um að grenndarkynning skuli fara fram í tilvikum sem þessum.
Ekki náðist í forsvarsmenn golfklúbbsins í dag.
Þorkell segir ljóst að mótmæli íbúanna hafi skilað einhverjum árangri því búið sé að fjarlægja helminginn af steypuhlunkunum og lækka garðinn, frá því hann var sem hæstur.
„Hann var orðinn 2 hæðir og þar með sást ekki lengur út á sjó.“
Þorkell segir íbúa ekki sætta sig við vegginn, sama í hvaða mynd hann yrði.
„Hann er hérna spjöll í náttúrunni. Sjóvarnargarðar eru falleg mannvirki, vel hlaðin. En þetta á ekki heima hérna.“
