Bandaríski íslamski fræðimaðurinn og prédikarinn Yasir Qadhi heimsótti Ísland á dögunum og ávarpaði þar söfnuð múslima. Í ræðunni hvatti hann múslima hér á landi til að líta á sig sem frumkvöðla sem væru að leggja grunn að framtíð íslams á Íslandi.
Qadhi er fæddur í Houston í Texas árið 1975, sonur pakistanskra innflytjenda. Hann lauk námi í hadith-fræðum og íslamskri guðfræði við Íslamska háskólann í Medínu í Sádi-Arabíu og síðar doktorsprófi í íslömskum fræðum frá Yale-háskóla. Hann er nú deildarforseti við The Islamic Seminary of America og búsettur fræðimaður við East Plano Islamic Center í Texas. Qadhi er jafnframt einn þekktasti enskumælandi íslamski prédikari samtímans og fylgjendur hans á YouTube skipta hundruðum þúsunda. Nánar má lesa um bakgrunn hans á heimasíðu Qadhi.
Í upphafi ræðunnar sagði Qadhi að þótt hann þekkti ekki nákvæmlega þær áskoranir sem íslamskt samfélag á Íslandi stæði frammi fyrir gæti hann miðlað af reynslu sinni eftir að hafa heimsótt yfir 70 lönd og kynnst mörgum minnihlutasamfélögum múslima á Vesturlöndum.
„Gerið ykkur fyrst og fremst grein fyrir því að það dýrmætasta sem þú og ég eigum er trúin á íslam. Ekkert er dýrmætara en hún. Hvorki heilsa ykkar, auður né líf,“ sagði Qadhi.
Líkti stöðu múslima á Íslandi við upphaf íslams í Medínu
Qadhi sagði útbreiðslu íslams til Íslands staðfesta spádóm Múhameðs um að samfélag múslima, eða ummah, myndi festa rætur víða um heim.
Hann líkti stöðu múslima á Íslandi við stöðu fyrstu fylgjenda Múhameðs þegar hann kom til Medínu. Múslimar hefðu þá verið örlítill minnihluti og það hefði tekið mörg ár að fjölga í samfélaginu.
Qadhi sagði íslenska múslima bera ábyrgð á því að boða trúna meðal samstarfsfólks síns og annarra íbúa landsins:
„Þið eruð að sinna dawah gagnvart þeim og það er ábyrgð sem Allah hefur lagt á ykkur,“ sagði hann. Dawah merkir boðun eða að bjóða öðrum að kynnast og taka íslamstrú.
Hann hvatti viðstadda til að taka ábyrgðinni fagnandi og verða „táknmyndir og sendiherrar íslams“.
„Allah valdi ykkur“
Qadhi sagði núlifandi kynslóð múslima á Íslandi vera að skapa arfleifð sem komandi kynslóðir myndu minnast.
„Eftir margar kynslóðir munu barnabarnabörn ykkar í þessu landi minnast fórnanna sem þið færðuð,“ sagði hann.
„Þið skráðuð ykkur ekki til þess að byggja upp slíka arfleifð eða gera eitthvað stórfenglegt. En Allah valdi ykkur. Ykkar kynslóð er að leggja grunn að íslam í þessu landi.“
Hann bætti því við að ákvarðanir og athafnir múslima á Íslandi nú myndu hafa áhrif langt inn í framtíðina:
„Það sem þið gerið mun móta framtíð þessarar trúar næstu 300 árin. Verið því metnaðarfull. Hugsið skynsamlega. Gerið ykkur grein fyrir því að hvert og eitt ykkar gegnir mikilvægu hlutverki.“
Ræðunni lauk Qadhi með þeirri von að íslam myndi „blómstra í þessu landi, eins og trúin blómstrar nú þegar í svo mörgum öðrum löndum“.
