Yfirmaður loftslagsmála hjá Evrópusambandinu segir orkukrísuna vegna stríðsins í Mið-Austurlöndum undirstrika nauðsyn þess að hætta notkun jarðefnaeldsneytis út frá efnahagslegum og öryggissjónarmiðum.
„Við höfum nú þegar mjög góða ástæðu til að hætta notkun jarðefnaeldsneytis vegna loftslagsmála. Núna höfum við fleiri ástæður, í tengslum við viðskipti og sjálfstæði í orkumálum,“ segir Wopke Hoekstra, yfirmaður loftslagsmála hjá Evrópusambandinu. Hann er í Kólumbíu til að taka þátt í alþjóðlegum viðræðum um að hætta notkun jarðefnaeldsneytis.
Lokun Hormússunds hefur leitt til þess að mikið af olíubirgðum vantar á markaðinn. Um fimmtungur allrar olíu og jarðgass í heiminum er flutt um sundið. Olíuverð um allan heim hefur hækkað mikið. Flest ríki ESB reiða sig á innflutning olíu og jarðgass.
Sameinuðu arabísku furstadæmin sögðu sig úr OPEC, samtökum olíuframleiðsluríkja, í dag. Þau voru þriðji stærsti olíuframleiðandi samtakanna og með brotthvarfi þeirra missa samtökin um 15 prósent af framleiðslugetu sinni.
Í yfirlýsingu frá orkumálaráðuneyti furstadæmanna segir að útganga ríkisins úr OPEC veiti þeim sveigjanleika og hjálpi við að mæta vaxandi eftirspurn eftir orku í heiminum. Stjórnvöld þar hafa nýlega fjárfest til að auka framleiðslugetu sína.
Alþjóðabankinn telur orkuverð eiga eftir að hækka um fjórðung á þessu ári vegna stríðsins. Útganga furstadæmanna úr OPEC hefur þó ekki áhrif um leið vegna lokunar Hormússunds en gæti leitt til langtímaaukningar á framleiðslu olíu.
David Oxley, aðalhagfræðingur og sérfræðingur í loftslagsmálum hjá Capital Economics telur útgöngu furstadæmanna geta leitt til lægra olíuverðs en að meiri sveiflur verði á markaðnum næstu áratugi.
Þó að furstadæmin séu lítil gætu afleiðingarnar orðið miklar ef önnur aðildarríki yfirgefa samtökin líka eða þá ef ríki eins og Rússland og Sádi-Arabía ákveða að auka framleiðslu.
