Elgir í norðurhluta Svíþjóðar hafa vor hvert í þúsundir ára gengið sömu leið til að komast í sumarhagana. Þetta ferðalag elganna er nú orðið mjög vinsælt sjónvarpsefni. Sérfræðingur telur að fólk horfi til að öðlast ró á vályndum tímum.
Útsending sænska ríkissjónvarpsins frá ferðum elganna í ár hófst í fyrradag. Það er að ýmsu að huga við útsendinguna. Fjarstýrðum myndavélum hefur verið komið upp, meðal annars í skógi og við ána Ångerman.
Håkan Lyktberg, myndatökumaður hjá SVT, er einn þeirra sem koma að útsendingunni og skipulagningu hennar. Hann segir virkilega spennandi og skemmtilegt að fylgjast með ferðum elganna. „Jú, maður vonast til að sjá þá hreyfa sig einhvers staðar. Við þekkjum myndrammana. Við sjáum strax ef eitthvað breytist.“
Þúsundir fylgjast með ferðum elganna í beinni útsendingu. Annette Hill, prófessor í fjölmiðla- og samskiptafræðum við háskólann í Jönköping, rannsakar hvers vegna það sé svo mikilvægt fyrir fólk að fá þetta sjónarhorn á náttúruna, að horfa á efni sem ekki er leikstýrt á neinn hátt og án allra auglýsinga. „Þetta er líka svo raunverulegt á sama tíma og mikið af gervigreind og fölsunum eru í umferð,“ segir hún. Þá sé útsendingin innspýting af yfirvegun á krísutímum í heiminum.
„Elgirnir hafa gengið sömu slóðir í mörg þúsund ár og halda því áfram þó að við mennirnir leggjum vegi og byggjum hús á leið þeirra; þeir halda áfram,“ segir Johan Erhag, verkefnastjóri hjá SVT. „Það er dásamlegt að sjá og skynja að náttúran heldur sínu striki, við þurfum ekki að hafa áhyggjur af öllu.“
