Íris Erlingsdóttir skrifar:
Sérkennileg árátta hefur gripið um sig í íslenskri þjóðfélagsumræðu – að svara pólitískum skoðunum með skítkasti í stað raka. Sérstaklega á þetta við um Donald Trump. Það sem er afar þreytandi við þetta hatur á Trump er hve lítið það á skylt við raunverulegar stjórnmálaskoðanir hans og stefnumál.
Ég velti því stundum fyrir mér hve margir af Trumps hörðustu höturum vita að hann var Demókrati (með D), eða að ýmis stefnumál sem nú eru fordæmd sem stórhættuleg öfga-hægristefna voru sjálfsögð meðal Demókrata fyrir 20 árum.
Þegar Demókratar töluðu eins og Trump
Bill Clinton, forseti Bandaríkjanna frá 1993–2001, beitti sér fyrir hertu landamæraeftirliti, brottvísun ólöglegra útlendinga, strangari löggæslu og aukinni einstaklingsábyrgð. Í stefnuskrá Demókrataflokksins árið 1996 var beinlínis lýst yfir að tími hins fyrirferðarmikla ríkisvalds væri liðinn. Um ólöglega útlendinga sagði Clinton: Bandaríkin eru réttarríki og við sættum okkur ekki við þá sem brjóta okkar lög. Það verður að stöðva ólöglegar komur fólks yfir landamærin. Þetta stóð í opinberri stefnuskrá Demókrataflokksins árið 1996, ekki á kosningaspjaldi fyrir Donald Trump.
Clinton lét ekki sitja við orðin tóm. Í forsetatíð hans var landamæragæslan efld og árið 1996 undirritaði hann lög sem hertu reglur um ólöglega útlendinga og brottvísanir þeirra. Barack Obama beitti sér einnig fyrir öflugu landamæraeftirliti og brottvísun ólöglegra útlendinga. Í forsetatíð Obama var fleiri einstaklingum formlega vísað úr landi en á fyrra kjörtímabili Donald Trump. Obama hlaut meira að segja viðurnefnið Deporter in Chief. Að brottvísun ólöglegra útlendinga sé einhver grimmileg sérviska Donald Trump stenst ekki sögulega skoðun.
Trump var skráður í Demókrataflokkinn á fyrsta áratug þessarar aldar, áður en hann gekk aftur til liðs við Repúblikanaflokkinn. Auðvitað eru Trump og Clinton ekki sammála um allt; Clinton var til dæmis mun eindregnari talsmaður frjálsra alþjóðaviðskipta en Trump, sem hefur beitt tollum til að vernda bandaríska framleiðslu.
Það er í fínu lagi að vera ósammála Trump (sem og öllum öðrum stjórnmálamönnum) og gagnrýna hann. En ef menn ætla að fordæma hann og stjórnmálastefnu hans væri ekki úr vegi að kynna sér fyrst hver hún er og hvernig hún er frábrugðin stefnu þeirra stjórnmálamanna sem sömu gagnrýnendur hafa sennilega dáð og virt.
Ég yfirgaf ekki vinstrið – vinstrið yfirgaf mig
Ég var Demókrati (og demókrati) alla mína ævi þar til ársins 2021 (þegar ég uppgötvaði að Demókrataflokkurinn studdi kynferðislegar limlestingar á börnum og ungmennum, sagði mér að konur væru með typpi og að tunglið væri úr osti). Ég studdi flokk sem lagði áherslu á málfrelsi, einstaklingsfrelsi, ábyrgð og jafnrétti fyrir lögum. Ég hef ekki skipt um skoðun á neinum þessara grundvallargilda, þótt ég sé ekki lengur D/demókrati.
Ég yfirgaf ekki vinstrið. Vinstrið yfirgaf mig.
Höfundur er fjölmiðlafræðingur.
