Friður virðist ekki í augsýn milli Írana og Bandaríkjamanna. 100 dagar eru síðan Bandaríkin og Ísrael hófu loftárásir á Íran.
Vöknuðu við sprengjugný 28. febrúar
Íranar vöknuðu við sprengjugný að morgni 28. febrúar. Hundruð almennra borgara létust, meðal annars yfir hundrað nemendur í stúlknaskóla.
Auk almennra borgara féll fjöldi háttsettra embættismanna. Árásir voru gerðar á heimili æðstaklerksins Alis Khamenei. Fyrst var talið að hann hefði lifað af en nokkrum dögum síðar var andlátið staðfest. Sonur hans, Mojtaba Khamenei, var útnefndur æðstiklerkur en hann hefur ekki sést opinberlega síðan.
Íranar svöruðu með umfangsmiklum loftárásum á Ísrael og nágrannalönd sín en þar eru Bandaríkin með margar herstöðvar. Lofthelgi margra þeirra var lokað og Íslendingar áttu erfitt með að komast burt.
Íranar lokuðu einnig Hormússundi, einni mikilvægustu skipaleið heims, þegar stríðið hófst. Á friðartímum fer um fimmtungur allrar olíu og jarðgass heims þar um og lokunin hefur valdið hækkun olíuverðs um allan heim. Orkuskortur er yfirvofandi og flugfélög hafa brugðið á það ráð að fella niður ferðir.
Í byrjun mars skutu Hezbollah-samtökin í Líbanon eldflaugum á Ísrael en þau eru hliðholl klerkastjórninni í Íran. Síðan þá hefur Ísrael hafið landhernað í Suður-Líbanon og samkvæmt heilbrigðisyfirvöldum í Líbanon hafa yfir þrjú þúsund og sex hundruð verið drepnir og yfir ellefu þúsund verið særðir.
Báðar þjóðir gefið í skyn að þær vilji ekki frekari átök
Bandaríkjamenn og Íranar náðu samkomulagi um vopnahlé í byrjun apríl. Síðan hafa ekki verið hörð átök milli þjóðanna en þær hafa skipst á einstaka árásum. Hormússund er enn svo gott sem lokað fyrir skipaumferð og Bandaríkin hafa einnig verið með íranskar hafnir í herkví.
Samninganefndir þjóðanna hafa fundað með milligöngu Pakistana en enn virðist langt í að samið verði um frið.
Jeremy Bowen, alþjóðaritstjóri hjá BBC, segir að bæði Bandaríkin og Íran hafi gefið í skyn að þjóðirnar vilji ekki frekari átök. Hvorki stjórnvöld í Bandaríkjunum né Íran hafi leyft árásum síðustu vikna að stöðva viðræður um vopnahlé.
Aðalmarkmið Bandaríkjaforseta virðist vera að koma í veg fyrir að Íranar eignist kjarnorkuvopn. Stjórnvöld þar reyni að þrýsta á klerkastjórnina til að gefa eftir með því að sýna mátt sinn og að herinn sé nálægt og geti valdið miklum skaða.
Íranar vilja að yfirráð þeirra yfir Hormússundi verði viðurkennd og að Ísraelar hætti árásum á Hezbollah í Líbanon en fyrst og fremst tryggja tilvist klerkastjórnarinnar. Þeir minni Bandaríkin á að þeir séu staðráðnir í að veita mótspyrnu. Þeir ráðist á bandarískar herstöðvar og aðra innviði í heimshlutanum ef þörf sé á.
Bowen segir fyrsta markmið í átt að víðtækara samkomulagi þjóðanna vera framhald vopnahlésins og samkomulag um yfirlýsingu um áframhaldandi viðræður.
„Það reynist erfitt að ná því markmiði,“ segir Bowen.
