Mikil fagnaðarlæti voru vítt og breitt um Serbíu í gær og nótt eftir að fjöldahreyfing stúdenta vann stórsigur í þingkosningum sem fram fóru í landinu í gær.
Talningu atkvæða er ekki lokið en bráðabirgðatölur benda til þess að fjöldahreyfing stúdenta fái 138 þingsæti og geti því myndað meirihluta. 250 þingsæti eru á serbneska þinginu og því þarf 126 sæti til að ná meirihluta.
Aleksandar Vučić, fyrrverandi forseti Serbíu og leiðtogi Serbneska framfaraflokksins, viðurkenndi ósigur sinn í gærkvöld þegar ljóst var í hvað. Hann gagnrýndi hreyfinguna og sagði hana studda áfram af fjölmörgum Evrópulöndum og bandaríska djúpríkinu, sem einnig væri á móti Donald Trump Bandaríkjaforseta.
Vučić rauf þing í september og boðaði til kosninga eftir mikil mótmæli sem hafa staðið yfir síðan 2024 eftir að 16 létust þegar steinsteypt þak á lestarstöð hrundi niður í borginni Novi Sad í nóvember 2024.
Stúdentar hafa leitt mótmælin og kölluðu upphaflega eftir því að gerð yrði ítarleg rannsókn á slysinu. Með tímanum hafa mótmælin beinst meira gegn forsetanum og margir vildu að Vučić viki úr embætti.
Frambjóðendur með fjölbreyttan bakgrunn
Upp úr mótmælunum spratt svo fjöldahreyfing stúdenta. Flestir þeirra 250 frambjóðenda á lista fjöldahreyfingarinnar eru með litla reynslu í stjórnmálum. Á listanum eru læknar, leikarar, fræða- og listafólk en í kosningabaráttunni náðu þau eyrum margra kjósenda sem voru andvígir ríkisstjórninni.
Kjörsókn í kosningunum er sú mesta í þrjátíu ár en um 65 prósent kjósenda höfðu kosið tveimur klukkustundum áður en kjörstöðum var lokað.
Niðurstaða kosninganna er sögð geta ráðið miklu um framtíð lýðræðisumbóta og tengsl Serbíu við Evrópusambandið, Rússland og Kína.
Árnaðaróskir eru farnar að berast til fjöldahreyfingarinnar, en bæði Ursula von der Leyen framkvæmdastjóri Evrópusambandsins, Marta Kos stækkunarstjóri Evrópusambandsins og Péter Magyar forsætisráðherra Ungverjalands hafa óskað hreyfingunni til hamingju með sigurinn.
