Luiz Inacio Lula da Silva, sitjandi forseti og leiðtogi Verkamannaflokksins, er sigurvegari forsetakosninganna í Brasilíu, en síðari umferð kosninganna fór fram þar í gær.
Lula er með 51,76% atkvæða og mótframbjóðandi hans og öldungadeildarþingmaðurinn Flavio Bolsonaro er með 48,24% atkvæða þegar 98,87% atkvæða hafa verið talin.
Sumir kjörstaðir í Brasilíu voru opnir tveimur klukkustundum lengur en til stóð. Báðir frambjóðendur óskuðu eftir því að frestur til að kjósa yrði lengdur. Lula óskaði eftir því vegna truflana á samgöngum í sumum borgum Brasilíu og Bolsonaro vildi að þeir yrðu opnir lengur vegna slæms veðurs í mörgum borgum.
Þegar Hæstiréttur úrskurðaði framlengingu á opnunartíma kjörstaða hafði sumum þeirra verið lokað.
Lula þakklátur kjósendum
Í sigurræðu sinni þakkaði Lula kjósendum sem margir hverjir lögðu mikið á sig að komast á kjörstað. Lula sagði að fólk hefði farið að kjósa af því að það hefði tekist að sannfæra það um mikilvægi þess að vernda lýðræðið í landinu.
Bolsonaro sagði í ræðu eftir að úrslitin voru kunngjörð að það væri ómögulegt að viðurkenna úrslitin í ljósi aðstæðna og hvernig kosningar fóru fram. Því ætli hann að fara fram á að kosningarnar verði ógildar.
Ólíkir frambjóðendur
Lula verður 81 árs á morgun. Þetta er í fjórða sinn sem hann er kjörinn forseti. Hann varð fyrst forseti árið 2003 og síðan endurkjörinn árið 2026. Hann sat í fangelsi í rúma 18 mánuði vegna spillingarmáls en ákærur gegn honum voru síðar felldar niður vegna formgalla. Hann bauð sig fram gegn Jair Bolsonaro, þáverandi forseta og föður Flavio Bolsonaro árið 2022 og vann þær kosningar.
Á síðastliðnum fjórum árum hefur Lula tekist að draga úr verðbólgu og atvinnuleysi í landinu og auka lífsgæði þjóðarinnar. Engu að síður voru margir kjósendur óánægðir með háan framfærslukostnað og glæpatíðni.
Bolsonaro, sem er 45 ára, tókst að ná bæði til íhaldsmanna og kjósenda sem vildu breytingar. Hann kynnti sig sem hófsamari og glaðværari mann en faðir hans Jair sem nú situr í 27 ára fangelsi fyrir tilraun til valdaráns. Bolsonaro, sem er hægri maður og var fremur lítt þekktur uns faðir hans krýndi hann pólitískan arftaka sinn.
Meðan á kosningabaráttunni stóð var upplýst að Bolsonaro yngri sætti rannsókn vegna fjármálamisferlis sem tengist gerð heimildarmyndar um Bolsonaro eldri.
Lula lagði áherslu á það í kosningabaráttunni að fullveldi Brasilíu væri í húfi vegna viðskiptalegs og diplómatísks þrýstings frá Donald Trump Bandaríkjaforseta.
