Keir Starmer forsætisráðherra Bretland ávarpar í dag neðri málstofu breska þingsins vegna skipunar Peter Mandelson í embætti sendiherra Bretlands í Bandaríkjunum. Í síðustu viku var greint frá því að Mandelson hefði ekki staðist öryggisvottun eftir að Starmer hafði skipað hann í embættið, en utanríkismálaskrifstofan hefði eftir sem áður veitt honum vottunina. Starmer segist ekki hafa vitað af þessu, en nú eru komnar frekari upplýsingar sem koma honum illa – og nóg hefur verið af þeim hingað til.
Í skjölum sem stjórnvöld hafa birt vegna málsins kemur fram að Simon Case, einn af embættismönnum ríkisstjórnarinnar, hafi ráðlagt Starmer að skipa ekki Mandelson formlega fyrr en hann hefði lokið öryggisvottunarferlinu. Case sendi honum bréf 11. nóvember 2024 um skipunarferlið og þar gaf hann honum þessi ráð ef að skipunin yrði pólitísk: „Þú ættir að gefa okkur upp nafn þess sem þú vilt skipa og við gerum áætlun um að fá nauðsynlegar öryggisheimildir og gera könnun á hugsanlegum hagsmunaárekstrum eða öðru sem þú ættir að vera meðvitaður um áður en þú staðfestir val þitt.“
Tilkynnt var um skipun Mandelson rúmum mánuði síðar, eða 20. desember 2024. Öryggisvottunin fór fram eftir það.
Mandelson var rekinn úr embætti í haust eftir að upp komst að samband hans við kynferðisbrotamanninn Jeffrey Epstein var mun nánara en áður hafði verið talið. Breskir fjölmiðlar leiða líkum að því að Starmer muni fyrir þinginu í dag segjast óafvitandi hafa gefið því rangar upplýsingar, þar sem hann vissi ekki að Mandelson hafi ekki staðist öryggisvottun.
Blaðamenn sátu fyrir Mandelson þar sem hann var úti að ganga með hundinn sinn í morgun. Hann tjáði sig ekki við fjölmiðla.
