Suðurnesjabær hafnaði fyrir helgi beiðni Sólborga ehf. um milligöngu vegna afnota af Rockville-svæðinu vegna brottvísunarstöðvar stjórnvalda. Leit stendur yfir að bráðabirgðahúsnæði undir stöðina. Höfnunin felur ekki þó í sér afstöðu Suðurnesjabæjar til staðsetningarinnar.
Beiðninni var hafnað þar sem hún fól í sér að ráðast hefði þurft í breytingar á aðalskipulagi, það sé vandkvæðum bundið fyrir sveitarfélagið að vera í milligöngu varðandi leigusamning við stjórnvöld vegna stöðvarinnar og að ekki þótti mögulegt að veita einum bjóðanda vilyrði umfram aðra.
Sem stendur leitar dómsmálaráðuneytið að bráðabirgðahúsnæði undir brottvísunarstöðina og fjölskylduhúsnæðið sem verður aðgreint frá stöðinni. Stefnt er að opnun hennar 1. desember, þegar lög um stöðina taka gildi. Freyr Gígja Gunnarsson, upplýsingafulltrúi ráðuneytisins, segir ekki útilokað að bráðabirgðahúsnæðið gæti orðið varanlegt ef það hentar vel undir stöðina.
Telja Rockville-svæðið henta vel
Sólborgir ehf., sem er í eigu Reykjanes Investment ehf. og Þórukots ehf., sendi bæjarráði Suðurnesjabæjar beiðni um milligöngu vegna afnota af athafnasvæði á Rockville-svæðinu.
Í beiðninni segist félagið ætla að taka þátt í útboði um öflun upplýsinga vegna mögulegs húsnæðis fyrir brottfararstöðina. Sólborgir telja Rockville-svæðið sérlega vel til þess fallið að hýsa stöðina sökum þess að það er utan íbúabyggðar og skilgreint sem athafnasvæði í gildandi aðalskipulagi sem geri einfalt að breyta stöðu þess í skipulagi.
„Áform okkar eru að reisa húsnæðið úr gámaeiningum sem yrðu hannaðar og frágengnar á vandaðan og snyrtilegan hátt, í fullu samræmi við kröfur útboðsgagna um öryggi og aðbúnað. Svæðið yrði afgirt í heild og gæsla viðhöfð allan sólarhringinn, með aðgreindum útisvæðum fyrir vistfólk, eins og kveðið er á um í rýmislýsingu FSRE,“ segir í beiðninni.
Í auglýsingu óskar Framkvæmdasýslan – Ríkiseignir (FSRE) eftir upplýsingum um mögulegt húsnæði sem gæti hentað sem brottfararstöð, ýmist tímabundið eða til langs tíma.
„Tímabundna húsnæðið þarf að vera tilbúið fyrir 1. desember þegar lögin taka gildi. Kostur er ef langtímahúsnæðið verður tilbúið til afhendingar fyrir 30. september á næsta ári. Ekki er útilokað að tímabundna húsnæðið nýtist síðar sem framtíðarhúsnæði. Með tímabundnu húsnæði fæst ákveðin reynsla af því hvers konar húsnæði nýtist best og hversu mikil þörfin verður,“ segir í henni.
Krafa er gerð um að staðsetningin sé á Suðurnesjum og ekki í nálægð við íbúðarbyggð.
„Í auglýsingu þessari er óskað eftir upplýsingum frá markaðnum um framboð á húsnæði. Að könnun lokinni verður tekin ákvörðun hvort samið verði við tiltekinn aðila á grundvelli þessarar auglýsingar eða hafið verði annað leiguferli.“
Skilafrestur er til 5. ágúst.
Afstaða ekki tekin til Rockville sem staðsetningar
Beiðni Sólborga var hafnað á fundi bæjarráðs á miðvikudag. Árni Gísli Árnason, starfandi bæjarstjóri Suðurnesjabæjar, segir að með því hafi sveitarfélagið þó ekki tekið afstöðu til staðsetningar brottvísunarstöðvarinnar.
„Í ljósi þess að viðkomandi svæði, sem erindið snerist um, er ekki deiluskipulagt og að það þarf að fara í að minnsta kosti minni háttar breytingar á aðalskipulagi og einnig er ákveðnum vandkvæðum bundið að ganga í milligöngu varðandi þennan leigusamning sem er á þessu svæði, og líka það að sveitarfélagið veiti einum mögulegum bjóðanda eitthvert vilyrði umfram aðra mögulega bjóðendur, meira að segja áður en þessi frestur er liðinn, er kannski eitthvað sem ekki er hægt að verða við var ekki annað hægt en að hafna þessu erindi eins og það kom til sveitarfélagsins,“ segir Árni í viðtali við fréttastofu.
„Í afgreiðslu bæjarráðs felst engin afstaða Suðurnesjabæjar hvort sveitarfélagið sé fylgjandi eða andvígt því að brottfararstöð verði innan marka sveitarfélagsins eða ekki. Eins og staðan er núna þá munu áhugasamir aðilar sem geta boðið hentugt húsnæði á Suðurnesjum skila inn til Framkvæmdasýslunnar – Ríkiseigna sínum tilboðum eða hugmyndum núna í ágúst.“
Í kjölfarið muni FSR fara ásamt fulltrúum dómsmálaráðuneytisins yfir þær lausnir sem eru í boði.
„Fulltrúar ráðuneytisins hafa lýst því yfir að sveitarfélög á Suðurnesjum munu vera aðilar að þeirri rýni sem mun eiga sér stað á þessum kostum og teljum við mikilvægt að Suðurnesjabær verði hafður með í ráðum áður en ákvörðun er tekin um slíkt húsnæði eða að minnsta kosti næstu skref í þessum málum.“
„Það vill enginn fangelsi í bakgarðinum hjá sér“
Anton Kristinn Guðmundsson, bæjarfulltrúi Framsóknarflokksins sem er í minnihluta í sveitarfélaginu, segir staðsetninguna hafa sína kosti og galla.
„Það vill náttúrlega enginn hafa svona fangelsi í bakgarðinum hjá sér, þetta er ekkert annað en fangelsi en einhvers staðar verður þessi miðstöð að vera. Við erum svolítið brenndir eftir þetta flóttamannadæmi í Suðurnesjabæ þar sem fyrrverandi ráðherra, Guðmundur Ingi Guðbrandsson, kom á sínum tíma með búsetuúrræði í Suðurnesjabæ og móttöku fyrir flóttamenn. Það var ófriður af þessu í sveitarfélaginu,“ segir Anton Kristinn í viðtali við fréttastofu.
Fólk í bænum hafi slæma reynslu af því úrræði og því séu íbúar ekki spenntir fyrir því að fá brottvísunarstöðina í sveitarfélagið.
„En ef þetta á að koma þarna með einhverjum hætti þá væri náttúrlega skást að fá þetta þarna einhvers staðar uppi í heiði, fjarri íbúabyggð.“
Fréttastofa leitaði einnig viðbragða hjá bæjarfulltrúum meirihlutans, Samfylkingarinnar og óháðra og Sjálfstæðisflokksins, við hugsanlegri staðsetningu brottvísunarstöðvarinnar á Rockville-svæðinu. Þeir höfðu ýmist ekki tök á eða vildu ekki svara fyrirspurn fréttastofu.
