Georgios Ntentes, sem er ákærður fyrir að hafa orðið félaga sínum að bana á heimili hans á Kársnesi í Kópavogi, segist hafa verið að aðstoða hann við að gera upp íbúðina. Hann hafi verið þar á hverjum degi í langan tíma og oft verið með sár á höndum vegna vinnu sinnar sem kokkur. Það skýri blóð úr honum á vettvangi.
Þetta kom fram í skýrslutöku yfir Georgios við aðalmeðferð fyrir Héraðsdómi Reykjaness í dag. Honum er gefið að sök að hafa orðið félaga sínum að bana á heimili hans á Kársnesi í Kópavogi í 28. nóvember 2025. Hann neitar sök.
Maðurinn fannst látinn á heimili sínu í hádeginu 30. nóvember. Upphaflega var talið að hinn látni hefði veitt sér áverkana sjálfur en Georgios var handtekinn nokkrum dögum síðar. Hann sat í gæsluvarðhaldi um tíma, var sleppt en hnepptur aftur í varðhald þegar nýjar vendingar urðu í rannsókninni.
Georgios er gefið að sök að hafa stungið manninn þrisvar sinnum í kviðinn með hníf, skorið hann, stungið með egghvössu áhaldi í hálsinn og slegið hann með þeim afleiðingum að hann lést.
Verjandi Georgios hefur lagt fram gögn frá tveimur réttarlæknum frá Svíþjóð sem lögðu mat á mögulega dánarorsök hins látna. Við skýrslutökuna gaf Georgios til kynna að þeir hefðu komist að annarri niðurstöðu en íslenskir réttarlæknar.
Georgios neitar að það hafi komið til átaka milli þeirra umrætt kvöld 28. nóvember. Hann segir að hinn látni, portúgali á fertugsaldri, hafi verið illa fyrir kallaður, hafi notað fíkniefni þrjá daga í röð og ekki sofið því kærasta hans hefði sagt honum upp. Hann hefði þó ekki lýst sjálsvígshugsunum. Þá sagði Georgios að hinn látni hefði selt eiturlyf og haft tengsl við undirheima.
Blóð hafi verið úr sárum á höndum
Saksóknari sýndi fjölda sönnunargagna frá vettvangi þar sem blóð úr Georgios fannst. Í nokkrum blóðsýnanna fannst bæði blóð úr Georgios og hinum látna. Það var meðal annars á hníf sem fannst vettvangi.
Blóðið skýrði hann með því að hann hefði unnið sem kokkur í fjöldamörg ár og væri alltaf með sár á höndunum.
Hann hefði verið á heimili hins látna nánast alla daga því þeir hafi verið góðir vinir. Þar hefði hann m.a. aðstoðað hann við að gera upp íbúðina, svo sem eldhúsið, og sárin hefðu getað opnast við það. Þá væri eðlilegt að blóð úr íbúa íbúðarinnar hefði fundist þar. Hann hefði verið að vinna við að gera upp íbúðina og getað slasað sig þannig. Hann mundi þó ekki eftir sérstöku atviki sem hinn látni hefði skorið sig.
Blóð á buxum mögulega gamalt
Það fannst einnig blóð úr sakborningi á buxunum sem hinn látni var í þegar hann fannst. Hann sagði það geta hafa verið gamalt blóð. Hann hefði hugsanlega notað buxurnar sjálfur því hinn látni hafi oft lánað honum föt þegar þeir voru að vinna í íbúðinni.
Skór sem Georgios var í áður en hann fór til hins látna þetta kvöld fundust ekki við rannsókn málsins. Hann kveðst hafa hent þeim ásamt fjölmörgum öðrum hlutum af heimilinu, þar sem hann og fjölskylda hans hafi verið að tæma íbúðina því þau hafi ætlað að flytja aftur til Grikklands eftir mánuð. Georgios kveðst hafa boðist til að fara með lögreglunni í Sorpu til að reyna að endurheimta skóna.
Skipti um skó vegna rigningar
Þegar hann fór heim frá hinum látna þetta kvöld segist hann hafa skipt um skó því það hafi verið rigning. Hann hafi svo farið að reykja gras við Sundlaug Kópavogs og verið þar í 40 mínútur. Lögregla og saksóknari telja að hann hafi skilið bílinn og símann eftir þar og farið aftur heim til hins látna, sem bjó skammt frá sundlauginni.
Blóðug skóför úr skóm svipuðum þeim sem hann var í eftir að hann fór heim að skipta um skó fundust á vettvangi. Rannsókn lögreglu á skónum sem hann fór í þegar hann skipti um föt gaf til kynna að það hefði einhvern tímann verið blóð á skónum. Georgios sagði það hafa verið úr honum sjálfum eftir að hann hefði skorið sig í vinnunni.
