Leigubílstjórar við Alicante flugvöll krefjast aukins eftirlits með farþegaakstri eftir átök um helgina. Málið gæti einnig skipt Íslendinga á Costa Blanca máli, þar sem mikið er um auglýsingar um „skutl“ til og frá flugvellinum í íslenskum samfélagsmiðlahópum.
Félag leigubílstjóra í Elche segir að fólk án tilskilinna leyfa leiti sér farþega inni í flugstöðinni og aki þeim þaðan í einkabílum. Að sögn félagsins urðu átök á laugardagskvöld þegar tveir einstaklingar hindruðu leigubíla í að komast að biðstöð sinni. Félagið vill að lögregla sé til staðar við flugvöllinn allan sólarhringinn til að kanna leyfi og bregðast strax við kvörtunum.
Segja vandann hafa aukist
Leigubílstjórarnir segjast hafa kvartað undan ólöglegum akstri við flugvöllinn í um tvö ár. Þeir deila einnig við ökumenn bíla sem hægt er að bóka fyrirfram og telja suma þeirra starfa án heimilda. Samkvæmt félaginu hættu um 150 leigubílar akstri um helgina meðan beðið var eftir því að lögregla kannaði gögn slíkra bíla.
Borgaryfirvöld í Elche segja að virkt eftirlit sé við flugvöllinn, en félagið telur það ekki nægja, einkum á kvöldin og næturnar.
Sektir geta numið þúsundum evra
Íslenskir hópar á Spáni eru meðal þeirra staða þar sem auglýstar eru ferðir til og frá Alicante flugvelli gegn gjaldi. Ef eftirlit verður aukið gæti það komið þeim illa sem flytja farþega reglulega gegn gjaldi án tilskilinna leyfa. Ekkert bendir þó til að íslenskir skutlarar tengist þeim atvikum sem leigubílstjórarnir lýsa.
Farþegaflutningur án leyfis gegn greiðslu getur varðað allt að 6.000 evru sekt samkvæmt spænskum reglum. Yfirvöld í Elche hafa áður sagt frá máli við Alicante flugvöll þar sem ökumaður viðurkenndi að hafa tekið 15 evrur á mann fyrir ferðir til Torrevieja. Þá var lögð til 4.001 evru sekt vegna aksturs án tilskilinna leyfa.
Reglurnar gera skýran greinarmun á slíkri þjónustu og ferð þar sem fólk deilir aðeins kostnaði af ferð sem það fer saman.
