Silungsveiðin að taka vel við sér - MBL.IS

Silungsveiðin er komin á fullt og þá ekki síst vatnaveiðin. Örn Hjálmarsson, einn af þessum lengra komnu var í Elliðavatni í morgun og landaði tveimur gullfallegum bleikjum. Eins og myndin ber með sér er þetta einstaklega flottar bleikjur. Þá missti Örn dálaglegan urriða eftir hressilega baráttu og mikil heljarstökk. „Ég er búinn að fara nokkrum sinnum í Elliðavatnið í vor og fengið ótrúlega flotta fiska. Í morgun var svartur Buzzer með gular kinnar, númer sextán að virka,“ Upplýsti Örn í samtali við Sporðaköst.

Sérlega fallegt eintak. Þessa bleikju fékk Örn í morgun í Elliðavatni og tók hún svartan Buzzer með gulum kinnum númer sextán. Örn Hjálmarsson

Örn er ekki búinn að fara í Þingvallavatn í vor og telur að það gæti þurft viku í viðbót, áður en bleikjan fer að koma inn á grynnra vatn. En þessi Elliðavatnsbleikja sem Örn heldur á er stórglæsileg og færi vel á pönnu. „Ég sleppi öllum fiski sem ég veiði þarna. Kallarnir sem voru þarna og sáu til mín spurðu hvort ég væri að temja þær,“ hlær Örn. 

Rúrik Ívarsson búinn að setja í bleikju í Hlíðarvatni. Þeir feðgar lönduðu sjö fiskum en hafa verið að gera mun betri veiði fyrri ár. Hvað veldur? Dettur kannski í gang næstu daga. Ljósmynd/Ívar Bragason

Ívar Bragason sem einnig er duglegur í vorveiðinni og þá ekki síst í Hlíðarvatni í Selvogi er aðeins tvístígandi þegar hann er spurður um stöðuna á vatninu. „Ég veit ekki alveg hvað skal segja. Við feðgar vorum þarna nýlega og undanfarin ár hefur verið bullandi taka og við fengið einhverja tuttugu til þrjátíu fiska. Nú vorum við með sjö og menn voru ekki að gera veiði, allavega ekki þeir sem við hittum. Vatnsstaðan er lág og ég hitti konu þarna sem hefur veitt í Hlíðarvatni í fjölmörg ár og hún var líka að tala um þetta. Hundurinn hennar sem er vanur að drekka úr vatninu leit ekki við því núna,“ sagði Ívar í samtali við Sporðaköst.

Þessi fékk frelsi eftir að hafa tekið Gullið hjá Helgu Gísladóttur um klukkan átta í kvöld. Margir nýta tækifærið að skjótast í Elliðavatn eftir vinnu eða jafnvel fyrir vinnu. Það hefur gefist vel. Ljósmynd/Helga Gísla

Hann sagði greinilegt að ekkert klak hefði átt sér stað og þær bleikjur sem hann og Rúrik sonur hans lönduðu var fullar af kuðungi. „Við vorum að fá þessar bleikjur á svarta Buzzera og hefðbundið vinyl rib fjórtán og sextán. Svo veit maður aldrei og það getur kviknað á þessu einhvern næstu daga.“

Urriðinn í Elliðavatni er í góðu standi í vor og það fékk Helga Gísladóttir að reyna seinnipartinn. Hún skaust eftir vinnu og setti í og landaði flottum urriða. Sá tók Gullið, straumflugu og fékk líf.

Þeir feðgar Ívar og Rúrik tóku fjórar í soðið. Bleikja af þessari stærð er einstakur matur. Ljósmynd/Ívar Bragason

Hálendisveiðin er að byrja og fyrstu veiðimennirnir í Tungnaá og Köldukvísl hafa gert ágæta veiði og hafa bæði bleikjur og urriðar glatt veiðifólk.

Seinustu hundraðkallar sumarsins