Sex flugferðum Icelandair hefur verið aflýst í dag þar sem ekki hefur tekist að manna áhöfn vélanna.
Flugferðirnar voru til og frá Róm, London Gatwick og Glasgow. Fyrsta flugið átti að taka á loft rétt fyrir klukkan átta í morgun.
Ásdís Ýr Pétursdóttir, forstöðumaður samskipta hjá Icelandair, staðfestir í samtali við mbl.is að aflýsa hafi þurft ferðunum þar sem ekki hafi tekist að manna flugstjórnarklefa vélanna.
Hún segir að að verið sé að finna leiðir til að koma farþegum sem áttu bókað flug til og frá þessum stöðum í önnur flug.
Reka raskanir til samstilltra aðgerða
Icelandair og Félag íslenskra atvinnuflugmanna eiga í kjaradeilu og hefur lítið þokast í viðræðum síðastliðna daga.
Síðasti fundur deiluaðila var á föstudag en ekki hefur verið boðað til fundar að nýju.
Flugfélagið hefur þurft að aflýsa fjölda flugferða að undanförnu sem félagið rekur til „samstilltra aðgerða“ flugmanna. Félagið segir flugmennina hafa skyndilega hætt að selja frídaga sína eins og tíðkast hefur og er hluti af kjarasamningum þeirra.
Formaður Félags íslenskra atvinnuflugmanna hefur hafnað þessum skýringum Icelandair og segir flugfélagið bera ábyrgð á mönnun.
