„Þyrla á Akureyri er öryggismál fyrir allt landið. Það er löngu tímabært að ein af þyrlum Landhelgisgæslunnar verði staðsett á Akureyrarflugvelli.“
Þetta segir Njáll Trausti Friðbertsson, þingmaður Sjálfstæðisflokksins fyrir Norðausturkjördæmi, í samtali við mbl.is.
Hann hefur lagt fram þingsályktunartillögu ásamt fleiri þingmönnum, þess efnis að fela dómsmálaráðherra að beita sér fyrir fastri starfsstöð fyrir eina af þyrlum Landhelgisgæslunnar á Akureyri.
„Rökin fyrir því eru skýr. Akureyri er miðsvæðis á landinu, þar er sjúkraflugið þegar staðsett og þar er til staðar þekking, mannafli og innviðir sem geta stutt við slíka starfsemi.“
„Með þyrlur bæði í Reykjavík og á Akureyri mætti ná til allra landshluta á innan við 90 mínútum á venjulegum degi og viðbragð á miðunum norðan- og austan við land myndi styrkjast verulega,“ segir Njáll.
Óskynsamlegt að hafa allar þyrlur á sama stað
Njáll er öllum hnútum kunnugur þegar kemur að flugrekstri en áður en hann tók sæti á þingi, starfaði hann sem flugumferðarstjóri á Akureyri.
Hann segir því staðsetningu þyrlunnar á Akureyri snúast um áhættudreifingu sem varði ekki aðeins Norðurland, heldur landið allt.
„Það er ekki skynsamlegt að hafa allar þyrlur þjóðarinnar á sama stað eða á sama veðurfarssvæði. Landhelgisgæslan ber ábyrgð á gríðarstóru svæði í kringum Ísland, um 1,9 milljón ferkílómetrum. Staðsetning þyrlu á Akureyri er því ekki aðeins hagsmunamál Norðurlands. Hún er hagsmunamál landsins alls. Stórt og mikilvægt þjóðaröryggismál,“ segir Njáll.
Hluti af skuldbindingum Íslands hjá NATO
Líkt og fram hefur komið hefur Landhelgisgæslan aðeins yfir þremur þyrlum að ráða en Njáll bendir á að viðbótarþyrla geti rúmast innan skuldbindinga Íslands til varnarmála, sem eru nú aðeins 0,92% en eiga að ná 1,5% af landsframleiðslu árið 2035 samkvæmt viðmiðum NATO.
„Við skulum hafa í huga í þessu sambandi að fram í september 2006 þegar bandaríski flotinn yfirgaf Keflavíkurflugvöll þá höfðu verið fimm öflugar björgunarþyrlur á flugvellinum.“
„Núna 20 árum síðar höfum við ekki náð þeirri getu sem herinn hafði á þeim tíma staðsettan á Íslandi. Það er kominn tími til að styrkja okkur á þessu mikilvæga sviði sem leit og björgun í Norður Atlantshafi er.“
„Slíkt verkefni rúmast vel innan þeirra hugmynda sem nú er unnið eftir af hálfu Atlantshafsbandalagsins og þar með íslenskra stjórnvalda að 1,5% af landsframleiðslu sé varið til varnar- og öryggismála sem aftur getur nýst íslensku samfélagi. Starfsemi Landhelgisgæslunnar og efling hennar rúmast vel innan þeirra hugmynda þar með talið að staðsetja eina af þyrlum Gæslunnar á Akureyri,“ segir Njáll að lokum.
