„Mig langar til að eiga gæludýr og þeir eru að mismuna fólki, eftir því hvort það býr á þriðju hæð eða jarðhæð. Fólk er bara mjög hvumsa yfir þessu og ég fullyrði að þetta er ekki í samræmi við breytingar á lögum um gæludýrahald í fjölbýlishúsum,“ segir kona sem leigir íbúð af Félagsbústöðum í húsi þar sem Bjarg íbúðafélag á mikinn meirihluta íbúða og setur eigin reglur um gæludýrahald í krafti mikils meirihluta í húsfélaginu.
Seint á síðasta ári samþykkti Alþingi frumvarp Ingu Sæland, þáverandi félags- og húsnæðismálaráðherra, um breytingu á lögum um fjöleignarhús. Við breytinguna er hunda- og kattahald núna leyft í fjölbýlishúsum og samþykki annarra eigenda er ekki lengur skilyrði fyrir dýrahaldinu, jafnvel þó að íbúðir deili sama stigagangi.
„Ég var himinlifandi með þessa breytingu því ég hef alltaf verið mikil hunda- og kattakona,“ segir þessi viðmælandi DV. „Félagsbústaðir leyfa dýrahald en Bjarg stoppar þetta með sínum sérreglum,“ bætir hún við og telur afstöðu Bjargs til dýrahalds ekki vera í samræmi við lagabreytinguna.
Björn Traustason, framkvæmdastjóri Bjargs, bendir hins vegar á að Bjarg leyfi vissulega gæludýrahald með ákveðnum skilyrðum og Bjarg sé jafnframt í fullum rétti til að setja skilyrði við dýrahaldi.
Fjölbýlishúsið sem hér er um rætt nær yfir nokkur húsnúmer við Hallgerðargötu við Laugardal. Bjarg á um 80% íbúða í húsinu en aðrar íbúðir eru ýmist í einkaeigu eða eigu Félagsbústaða. Konunni sem ræddi við DV þykir hart að hún, sem leigjandi hjá Félagsbústöðum, geti ekki fengið sér gæludýr vegna reglna sem annar en eigandi íbúðarinnar, þ.e. Bjarg, setur.
Fjallað er um lagabreytinguna hér og kemur meðal annars fram að húsfélög geta sett reglur um hunda- og kattahald, svo lengi sem þær eru málefnalegar, eðlilegar og byggðar á jafnræði.
Þurfa að sækja um íbúðir með sérinngangi
Björn Traustason hjá Bjargi segir að Bjarg leyfi vissulega dýrahald í íbúðum í sinni eigu en þær þurfi að vera með sérinngangi.
„Bjarg er með gæludýraíbúðir í öllum húsum félagsins. Þessar íbúðir eru almennt með sérinngang eða með aukainngang frá garði. Þannig eru gæludýraeigendur velkomnir til Bjargs en þeir verða að gæta þess að velja gæludýraíbúð þegar sótt er um. Í íbúðum sem eru eingöngu með inngang um sameiginlegt stigahús er hins vegar gæludýrahald óheimilt,“ segir Björn í svari við fyrirspurn DV.
Hann segir enn fremur:
„Bjarg á alltaf heilar húseignir og hefur þannig heimild til að setja reglur um gæludýrahald í húsum félagsins þar sem eingöngu eigendur íbúða eru með atkvæðisrétt. Þá er Bjargi sem eiganda íbúðar einnig heimilt að setja sérstakar reglur um umgengni í íbúðum félagsins en um samband Bjargs sem leigusala og leigutaka gilda húsaleigulög.“
Björn bendir á að túlkun Bjargs á lögunum sé studd ítarlegu lögfræðiáliti sem þeir hafi aflað sér.
DV benti Birni á að íbúum sem leigja hjá öðrum aðila en Bjargi, þ.e. Félagsbústöðum, sé meinað að halda hund eða kött. Björn svaraði:
„Húsfélögum er heimilt að leggja bann við dýrahaldi með samþykki 2/3 eigenda. Bjarg á 80% íbúða og því gilda reglur Bjargs fyrir allt húsið. Félagsbústaðir eru með gæludýraíbúðir í Bjargs húsunum og eru gæludýraeigendur velkomnir en þeir verða að gæta þess að velja gæludýraíbúð þegar sótt er um.“
Sitt kann hverjum að sýnast um þetta. Ljóst er hins vegar að leigjendur hjá Bjargi, eða leigjendur í fjölbýlishúsum þar sem Bjarg á 2/3 eða fleiri af íbúðum í húsinu, þurfa að búa í íbúð með sérinngangi til að fá að halda hund eða kött.
