Við segjum þessari fréttavakt af umræðum formanna stjórnmálaflokkanna, um niðurstöður þjóðaratkvæðagreiðslu um áframhald aðildarviðræðna við ESB, lokið.
Ég heiti Ástrós Signýjardóttir og þakka ykkur samfylgdina í kvöld.
Bergsteinn lýkur þættinum með því að hvetja formennina til að fara heim að hvíla sig.
Sigmundur Davíð segir stjórnarandstöðuna hafa lengi beðið ríkisstjórnina að ná tökum á efnahagsmálunum.
„Við erum að sjálfsögðu til í slaginn með þeim.“
Bergsteinn þurfti að stoppa skoðanaskipti formannanna af.
Lilja segir heimilin í landinu eigi það skilið að verðbólga og vextir lækki.
Hún segir ekki endalaust hægt að fara í gjaldskrárhækkanir og velta kostnaði yfir á heimilin.
Kjósendur vilji meiri áherslu á efnahagsmál og hún segir löngu tímabært að bregðast við því að forsendur kjarasamninga séu brostnar.
Mikið súrefni hafi farið í Evrópusambandsvegferðina á kostnað efnahagsmála.
Guðrún segir kosninguna í gær vera stöðumat á gengi ríkisstjórnarinnar.
Brostin loforð ríkisstjórnar Kristrúnar hafi verið mörgum ofarlega í huga. Hún hafi lofað að ná niður verðbólgu og vöxtum.
„Síðan hefur ekkert gengið nema til verri vegar.“
Hún segir árangur Sjálfstæðisflokksins á sveitarstjórnarstiginu varðandi fjárlög vera augljósan.
Kristrún segir það verða heljarinnar verkefni að draga úr verðtryggingu.
„Það verður ekki auðvelt að gera það, við erum orðin háð henni.“
Hún segir það ekki raunhæft að með afnámi verðtryggingar verði vextir lágir.
Ríkisstjórnin hafi tekið á fjölda mála á sama tíma og undirbúningur þjóðaratkvæðagreiðslunnar fór fram.
Hún segir niðurstöðu atkvæðagreiðslunnar vera þá að fólkið í landinu sé heilt yfir ánægt með stöðu mála á Íslandi.
Það vilja allir komast að í einu og Bergsteinn verður að grípa inn og biðja formennina um að sýna sjálfum sér og þjóðinni þá virðingu að halda áfram að ræða málefnin.
- Lilja segir nauðsynlegt að líta til Noregs þar sem umræður hafa undanfarið aukist um framtíð EES-samningsins. Í hennar huga er það alveg á hreinu að EES-samningurinn er lykilsamningur í utanríkisstefnu landsins. Samstarf Íslands og Noregs muni skipta miklu máli.
- Sigmundur Davíð segir Miðflokkinn hafa bent á að það styrki EES-samninginn að nýta þau ákvæði hans sem eru til þess ætluð að Ísland verji sína hagsmuni. Samningurinn þurfi að gagnast báðum aðilum. Miðflokkurinn segir það tvíhliða samstarf sem felist í EES-samningnum vera allt annað en full aðild að Evrópusambandinu. Hann segir samninginn hafa gert mikið gagn þrátt fyrir að hann hafi sína galla.
- Guðrún segir Já-hreyfinguna, og ríkisstjórnina, hafa mistekist að skýra út hvað felist í EES-samningnum.
- Þorgerður Katrín segir EES-samninginn ekki vera tollasamning. Aðspurð segir hún ekki víst að niðurstaða atkvæðagreiðslunnar geri ESB kaldara gagnvart EES-samstarfinu. Að hennar mati þarf að verja EES-samninginn en nýr veruleiki í heiminum sé sá að tollar, sem dæmi, séu notaðir sem vopn.
Inga segir niðurstöðuna vera í samræmi við stefnu Flokks fólksins, að vera andvígur aðild að Evrópusambandinu.
Á sama tíma sé hún fylgjandi auknu beinu lýðræði.
„Nú er þjóðin búin að tala.“
„Ég er sátt með mína nálgun í þessu máli. Ég treysti þjóðinni,“ segir Kristrún.
Hún segir Evrópusambandið í heild sinni ekki vera flokkspólitískt mál og það hafi sést í kosningunum hér. Innan allra flokka sé fólk með skiptar skoðanir á aðildarviðræðunum.
Þorgerður Katrín bregst við spurningu um hvort tímasetning atkvæðagreiðslunnar hafi verið mistök.
Hún svarar því til að það hafi verið með hagsmuni Íslands í forgrunni sem tímasetning hafi verið ákveðin.
Heimurinn er að breytast, segir Þorgerður.
Hún segir kosningabaráttuna hafa verið á jákvæðum nótum að hennar mati.
„Þetta þýðir ekki það að við neitum að tala við Evrópu,“ og bætir við að það skipti máli að stuðningurinn við EES-samninginn sé mikill.
Ísland þurfi að halda áfram að gera tvíhliða samninga bæði til austurs og vesturs.
Sigmundur Davíð Gunnlaugsson, formaður Miðflokksins, gleðst yfir því að stjórnmál á Íslandi verði ekki leiðinleg næstu árin með því að vera undirlögð af viðræðum við Evrópusambandið.
Hann segir niðurstöðuna vera áfall fyrir ríkisstjórnina.
„Ekki hægt að kalla það annað,“ segir hann.
Hann segir atkvæðagreiðsluna hafa snúist um sérhagsmuni Viðreisnar.
Inga Sæland, mennta- og barnamálaráðherra og formaður Flokks fólksins, segir ríkisstjórnina hafa brotið blað með þjóðaratkvæðagreiðslunni.
Þjóðaratkvæðagreiðslan hafi verið skýr og þjóðinni var gefið vald.
„Ég vona að þetta sé fordæmisgefandi fyrir það sem koma skal,“ segir Inga og bætir við að það eigi að treysta þjóðinni til að taka ákvarðanir um stór mál.
Lilja D. Alfreðsdóttir, formaður Framsóknarflokksins, segir kosningarnar hafa verið kosningar unga fólksins.
Hún segir það hafa verið fallegt að fylgjast með umræðum meðal yngri kynslóða sem hafa farið á dýptina varðandi stefnu Evrópusambandsins og hvar það er statt.
Hún telur niðurstöðurnar sýna það að það þurfi að treysta böndin bæði til austurs og vesturs.
Kristrún Frostadóttir, forsætisráðherra og formaður Samfylkingarinnar, segir ljóst miðað við kosningaþátttöku að þjóðin vildi segja sína skoðun á málinu.
Hún segir að átök um Evrópusambandið hafi litað stjórnmálaumræðu undanfarin ár og það hafi verið gott skref að leyfa þjóðinni að segja sína skoðun.
Umræðan muni sennilega hjaðna núna eftir þessar niðurstöður.
Hún gleðst yfir kosningaþátttökunni.
„Þetta er til fyrirmyndar að fólk hafi nýtt kosningarétt sinn.“
Guðrún Hafsteinsdóttir, formaður Sjálfstæðisflokksins, segir ljóst að ríkisstjórnin þurfi að virða niðurstöðu þjóðarinnar og draga aðildarumsóknina til baka.
Þorgerður Katrín Gunnarsdóttir, utanríkisráðherra og formaður Viðreisnar, vildi aðra niðurstöðu en þá sem kom upp úr kjörkössunum.
Hún segist stolt af því að tilheyra ríkisstjórn sem setti það í stjórnarsáttmála að leyfa þjóðinni að greiða atkvæði um áframhald aðildarviðræðna.
Þau eru sest.
Bergsteinn Sigurðsson stýrir þætti kvöldsins, sem hefst innan skamms.
Þjóðin sagði nei við því að hefja á ný aðildarviðræður við Evrópusambandið. Mjótt var á munum milli fylkinga en að lokum sögðu 52,8% landsmanna nei.
Kjörsókn var 82,5%.
Formenn þeirra stjórnmálaflokka sem eiga sæti á Alþingi eru gestir Silfursins strax að loknum fréttum í kvöld.
Þau Kristrún Frostadóttir, Þorgerður Katrín Gunnarsdóttir, Inga Sæland, Guðrún Hafsteinsdóttir, Sigmundur Davíð Gunnlaugsson og Lilja Alfreðsdóttir ræða niðurstöðu þjóðaratkvæðagreiðslunnar.
