Þegar sólin lætur sjá sig fyllast sundlaugar, ylstrendur, göngustígar og garðar af fólki á öllum aldri. Reykjavíkurborg býður upp á fjölbreytta afþreyingu yfir sumarmánuðina og samkvæmt Línu Petru Þórarinsdóttur, forstöðumanni markaðsmála hjá Menningar- og íþróttasviði Reykjavíkur, er markmiðið að sem flestir finni eitthvað við sitt hæfi, hvort sem áhuginn liggur í sjósundi, útivist, menningu eða fjölskylduskemmtun.
„Borgin er náttúrulega lifandi allt árið en hún verður sérstaklega lifandi yfir sumartímann,“ segir Lína. „Margir tengja sumarið fyrst og fremst við Fjölskyldu- og húsdýragarðinn, sundlaugarnar og Ylströndina í Nauthólsvík og þetta eru staðir sem njóta sívaxandi vinsælda ár frá ári.“
Ylströndin vinsæl allt árið
Nauthólsvík hefur á síðustu árum orðið einn vinsælasti útivistarstaður borgarinnar. Þar safnast fólk saman við fyrsta sólargeisla vorsins og yfir hásumarið er oft líf og fjör frá morgni til kvölds.
„Ef það fréttist af sól í höfuðborginni þá er fólk mætt á Ylströndina,“ segir Lína og hlær. „En það er gaman að sjá að Ylströndin er farin að blómstra allt árið því það eru alltaf fleiri og fleiri sem stunda sjósund. Ströndin sjálf er opin öllum án endurgjalds en gestir geta keypt aðgang að heitum potti, sturtum og annarri aðstöðu eða fjárfest í árskorti.“
Nýverið tóku gildi lægri gjaldskrár hjá Reykjavíkurborg og lækkaði meðal annars verð á árskortum í sundlaugar, Fjölskyldu- og húsdýragarðinn og Ylströndina.
„Það er líka nýtt að fólk getur verið í áskrift og greitt ársgjaldið mánaðarlega. Það gerir þetta aðgengilegra fyrir fleiri,“ segir Lína. „Á sama tíma hefur Reykjavíkurborg innleitt rafræna útgáfu af Reykjavíkurkortinu þannig að nú geta notendur haft kortið í símanum sínum í stað plastkorts.“
Sundlaugar eru samkomustaðir borgarinnar
Sundlaugar skipa sérstakan sess í lífi Íslendinga og í vetur fékk sundlaugamenning landsmanna viðurkenningu UNESCO sem hluti af óáþreifanlegum menningararfi mannkyns.
„Þetta eru náttúrulega samkomustaðirnir okkar, torgið okkar eða breski pöbbinn, ef svo má segja. Fólk kemur ekki bara til að synda heldur líka til að hitta fólk, ræða málin og njóta félagsskapar,“ segir Lína og bætir við að flestir eigi sína hverfislaug eða uppáhaldslaug.
„Ég hvet fólk hiklaust til að prófa fleiri laugar í Reykjavík því hver hefur sína sérstöðu, hvort sem það eru ólíkar sánur og gufuböð, heitir og kaldir pottar eða fjölbreytt aðstaða fyrir fjölskyldufólk.“
Sérstaklega nefnir Lína Klébergslaug á Kjalarnesi sem „falda perlu“.
„Þar finnur maður svolítið sveitalaugarstemningu með útsýni yfir borgina og sterk tengsl við náttúruna. Þar er líka gott aðgengi að ströndinni og á veturna getur fólk notið norðurljósanna úr pottinum.“
Útivistarsvæðin fá aukna athygli
Útivist innan borgarmarkanna hefur einnig fengið aukið vægi undanfarin ár. Göngu- og hjólaleiðir liggja um alla borg og sífellt fleiri nýta sér græn svæði eins og Elliðaárdalinn, Öskjuhlíðina og strandstígana.
„Það er svo auðvelt að sameina hreyfingu, útiveru og menningu í Reykjavík,“ segir Lína og bendir á upplýsingavefinn, Utumallt.is, sem gefur yfirsýn um fjölbreytta möguleika til útivistar á höfuðborgarsvæðinu.
„Þarna eru gönguleiðir, hjólaleiðir, garðar og alls konar útivistarsvæði tekin saman á einum stað. Þetta er rosalega góður byrjunarreitur fyrir fólk sem vill uppgötva meira af borginni.“
Fjölskyldu- og húsdýragarðurinn með viðburðaríkt sumar
Fjölskyldu- og húsdýragarðurinn verður sem fyrr einn af vinsælustu áfangastöðum sumarsins hjá fjölskyldufólki. Tækin í garðinum eru komin í gang og í sumar verður aukin dagskrá með fjölbreyttum viðburðum.
„Það verður enn meira um að vera í garðinum í sumar en oft áður,“ segir Lína. „Það verða tónleikar, fjölskylduviðburðir og alls konar skemmtun.“
Meðal annars verða reglulegir tónleikar í garðinum og viðburðir á borð við Brúðubílinn og skemmtun fyrir yngstu gestina. Dagskráin verður birt á vefnum mu.is.
Lína talar um að Laugardalurinn hafi einnig ákveðið forskot þegar kemur að íslensku sumri.
„Það er alltaf gott veður í Laugardalnum. Það er svo skjólgott þarna inni í dalnum. Garðurinn er þó langt í frá eingöngu skemmtigarður heldur einnig vettvangur fræðslu um íslensk húsdýr og náttúru.“
Söfnin og menningin lifna við
Mikil dagskrá verður einnig á söfnum borgarinnar í sumar. Borgarsögusafn stendur fyrir fjölbreyttum viðburðum á stöðum á borð við Árbæjarsafn, Sjóminjasafnið og í Viðey.
„Á Árbæjarsafni verða fjölskylduviðburðir, kvöldgöngur og vinsælir dagar eins og fornbíladagurinn og viðburðir í kringum heyannir,“ segir Lína. „Listasafn Reykjavíkur verður sömuleiðis með öfluga sumardagskrá, meðal annars í tengslum við Listahátíð í Reykjavík en í Hafnarhúsi verður glæsileg og yfirgripsmikil sýning á verkum Karin Sander og á Kjarvalsstöðum verður sýningin Smáborg, háborg – Reykjavík í mynd sem fjallar um ásýnd Reykjavíkur í gegnum tíðina.Það er mikill áhugi núna á þróun borgarmyndarinnar og þessi sýning talar mjög vel inn í það.
Í Ásmundarsafni er opin smiðja fyrir börn og fjölskyldur alla daga frá kl. 13-17 í tengslum við sýninguna Undraland. Söfnin bjóða einnig upp á vinsælar kvöldgöngur þar sem gestir geta gengið með leiðsögumönnum um borgina, skoðað útilistaverk og fræðst um sögu Reykjavíkur.“
Lína bendir á að alls kyns skemmtilegir og ókeypis viðburðir verði í boði fyrir alla aldurshópa á Borgarbókasafninu í sumar, sögu- og föndurstundir, sýningar og margt fleira. Í því samhengi nefnir hún sérstaklega sýninguna Draumar og veruleiki: TINNA sem er á dagskrá Listahátíðar í Reykjavík.
„Í ár afhenti Borgarbókasafnið öllum börnum í 1. til 6. bekk í Reykjavík sumarlestursvegabréfið hans Gúnda geithafurs og vonum við að það hvetji alla krakka til að lesa af kappi í sumar,“ segir Lína.
Hún getur þess að sumarkvöldgöngurnar sívinsælu verði á sínum stað eins og fyrri ár. „Þetta er frábært samstarfsverkefni Borgarbókasafns, Borgarsögusafns og Listasafns Reykjavíkur.“
Í ár verður meðal annars boðið upp á Laxness-bókmenntagöngu með Halldóri Guðmundssyni, kvennabókmennta- og ljóðagöngu með Vigdísi Hafliðadóttur og bókmenntagöngu á pólsku með Ewu Marcinek.
„Svo minnum við á að það er tilvalið að grípa með sér góða bók af safninu áður en brunað er af stað í fríið,“ segir Lína.
„Það er eitthvað fyrir alla“
Þrátt fyrir að dagskráin sé fjölbreytt segir Lína það vera stærsta styrkleika Reykjavíkur hvað borgin bjóði upp á ólíka upplifun á litlu svæði.
„Á einum degi geturðu farið í göngu, farið í sund, heimsótt safn, farið í sjósund eða í Fjölskyldu- og húsdýragarðinn. Það er eiginlega sama hvaða áhugasvið fólk hefur, það er eitthvað fyrir alla.“
Og þegar hún er spurð hvort Reykjavík sé kannski einfaldlega besti staðurinn til að vera á í sumar kemur svarið án umhugsunar:
„Ég held alveg klárlega að þetta sé skemmtilegasta borgin til að vera í í sumar.“
