Umboðsmaður Alþingis hefur lokið meðferð sinni á kvörtun ónefnds viðburðahaldara yfir starfsháttum Heilbrigðiseftirlits Reykjavíkur, Lögreglunnar á höfuðborgarsvæðinu og Sýslumannsins á höfuðborgarsvæðinu. Vildi viðkomandi meina að vegna misvísandi upplýsingagjafar þessara stofnana hafi hann þurft að hætta við við viðburð á vegum fyrirtækis síns með tilheyrandi tjóni.
Kvörtunin var lögð fram í apríl síðastliðnum. Til stóð að halda viðburð á vegum fyrirtækis kvartandans á ónefndum stað í Reykjavík. Í kvörtuninni kom fram að hann hafi í aðdraganda viðburðarins fengið misvísandi upplýsingar um starfsleyfi staðarins, en að mati heilbrigðiseftirlitsins hafi verið um viðburð að ræða sem rúmist ekki innan leyfisins. Fullyrti kvartandinn hins vegar að hann hafi fengið þær upplýsingar frá sýslumanni að ekki þyrfti að sækja um sérstakt tækifærisleyfi vegna viðburðarins, enda næði starfsleyfi staðarins yfir viðburði í húsinu á opnunartíma þess. Þar sem þessi breytta afstaða stjórnvalda hafi einungis legið fyrir með nokkra daga fyrirvara hafi honum í reynd verið ókleift að halda viðburðinn sem hafi meðal annars leitt til fjárhagslegs tjóns og skaða á rekstri og orðspori fyrirtækisins.
Segir í bréfi umboðsmanns til kvartandans að því leyti sem kvörtunin beinist að Heilbrigðiseftirliti Reykjavíkur og málsmeðferð þess í aðdraganda umrædds viðburðar verði ekki betur séð en að erindi þar að lútandi hafi verið til beint eftirlitsins, í formi tölvupósta, sem virðist enn vera ósvarað. Þar sé þess meðal annars óskað að Heilbrigðiseftirlitið afhendi afrit af öllum gögnum málsins og veiti auk þess nánari skýringar á málsmeðferðinni.
Ljúka fyrst svo kvarta
Umboðsmaður segir að þar af leiðandi sé ekki hægt að taka þann lið kvörtunarinnar er snúi að Heilbrigðiseftirliti Reykjavíkur til meðferðar fyrr en málsmeðferð þess ljúki. Gefa verði eftirlitinu tækifæri til að ljúka meðferð erindisins og svara því áður en umboðsmaður geti tekið málið til meðferðar.
Bendir umboðsmaður kvartandanum þó á að hann geti kært stjórnvaldsákvarðanir sem fjalli um starfsleyfi fyrir atvinnurekstri og byggi á lögum um hollustuhætti og mengunarvarnir til úrskurðarnefndar umhverfis- og auðlindamála. Hægt sé að kæra ákvörðun Heilbrigðiseftirlitsins, þegar hún liggi fyrir, til nefndarinnar. Í þessari ábendingu sé þó ekki fólgin nein afstaða til þess hvernig meðferð slík kæra ætti að fá hjá nefndinni. Áréttar umboðsmaður einnig við kvartandann að embættið fjalli ekki um rétt til skaðabóta og að því leyti sem kvörtunin snúi að að bótaskyldu Heilbrigðiseftirlits Reykjavíkur og eftir atvikum annarra stjórnvalda sé um að ræða ágreining þess eðlis að eðlilegt sé að dómstólar leysi úr.
Hvað varðar þann lið kvörtunarinnar er snýr að Lögreglunni á höfuðborgarsvæðinu segir umboðsmaður að ekki verði annað séð en að lögreglan hafi svarað fyrirspurn kvartandans og því sé ekki tilefni til þess að embættið aðhafist frekar varðandi þátt lögreglunnar. Bendir umboðsmaður einnig á að lögreglan hafi í svari sínu til kvartandans bent honum á að hafa aftur samband ef einhverjar frekari spurningar vöknuðu.
Skrifleg
Þegar kemur að þriðju stofnuninni sem kvartað var yfir, Sýslumanninum á höfuðborgarsvæðinu, segir í bréfi umboðsmanns til kvartandans að í kvörtuninni komi fram að hann hafi ekki fengið neina raunhæfa afgreiðslu eða niðurstöðu frá embættinu varðandi leyfismálin. Segi hann sýslumann hafa upplýst sig um, nokkrum vikum fyrir umræddan viðburð, að ekki væri þörf á sækja um sérstakt tækifærisleyfi vegna hans, enda hefði umræddur staður gilt leyfi sem næði yfir viðburði í húsinu á opnunartíma.
Umboðsmaður segir hins vegar að af þeim gögnum sem fylgt hafi kvörtuninni verði ekki séð að fyrir liggi skrifleg samskipti þar sem fyrrgreind afstaða sýslumanns komi fram. Þá virðist ekki heldur liggja fyrir önnur gögn sem varpað gætu nánara ljósi á þennan lið kvörtunarinnar. Samkvæmt lögum sé það skilyrði að öll tiltæk sönnunargögn um málsatvik skuli fylgja kvörtun til umboðsmanns svo unnt sé að taka kvörtun til meðferðar. Starfsmaður embættisins hafi áður sérstaklega óskað eftir því að kvartandinn legði fram afrit af samskiptum sínum við sýslumann. Þar sem slík gögn hafi ekki borist sé ekki mögulegt að fjalla nánar um hlut sýslumanns í málinu.
Umboðsmaður hefur þar af leiðandi lokið meðferð sinni á kvörtuninni en bendir kvartandanum á að hann geti snúið sér aftur til embættisins þegar endanleg úrlausn stjórnvalda liggi fyrir í málinu, telji hann tilefni til þess.
