Samsæriskenningar og vænisýki einkenndu málflutning Sigmundar Davíðs Gunnlaugssonar í viðtali á Sprengisandi í gær. Þar hélt hann því fram að viss öfl ynnu að því að útiloka Miðflokkinn frá meirihlutasamstarfi í sveitarstjórnum þar sem hann fékk menn kjörna. Það hefur að vísu þegar gerst og beðið er niðurstöðu um myndun meirihluta í Reykjavík. Sigmundur Davíð telur að áhrifamenn í Sjálfstæðisflokknum vinni gegn því að flokkurinn efni til meirihlutasamstarfs við Miðflokkinn í borginni þótt hann telji sig vita að meirihluti flokksmanna vilji samstarf við Miðflokkinn. Hvaðan hann hefur það er vandséð því sennilega veit enginn hver er vilji almennra flokksmanna. Kjósendur hafa valið og nú er framhaldið hjá kjörnum fulltrúum. Sigmundur Davíð virtist mjög órólegur og æstur í viðtalinu á Sprengisandi.
Orðið á götunni er að Míðflokksmenn ættu að líta sér nær og velta því fyrir sér hvers vegna aðrir flokkar hika þegar kemur að mögulegu samstarfi, eða beinlínis velja aðra kosti. Það eru ríkar ástæður fyrir því að hik er á öðrum flokkum að efna til samstarfs við öfgamennina í Miðflokknum.
Þegar liggur fyrir að aðrir flokkar sneiða hjá samstarfi við Miðflokkinn. Á Akureyri var Miðflokknum ýtt út úr samstarfi sem gilti allt síðasta kjörtímabil en nú var Framsóknarflokkurinn tekinn inn í staðinn. Í Hafnarfirði hafa Sjálfstæðisflokkur, Viðreisn og Samfylking hafið formlegar meirihlutaviðræður án þess að bjóða Miðflokknum með. Eins er í Mosfellsbæ. Þar hefur Sjálfstæðisflokkurinn boðið Viðreisn til meirihlutaviðræðna þótt Miðflokkur hafi fengið bæjarfulltrúa kjörinn. Á Ísafirði standa yfir meirihlutaviðræður milli Framsóknarflokksins og Viðreisnar en Miðflokkurinn náði ekki kjörnum fulltrúa þar.
Það þarf því ekki að koma á óvart þó að formaður Miðflokksins sé argur vegna stöðunnar í þeim meirihlutaviðræðum sem nú standa yfir í Reykjavík. Eina von þeirra til að komast í samstarf með öðrum flokkum í mikilvægu sveitarfélagi er í Reykjavík. Sjálfstæðisflokkurinn þarf nú að gera upp hug sinn um það hvort hann velur samstarf við öfgahægriflokkinn hans Sigmundar Davíðs eða hvort hann myndar hægri meirihluta með samstarfi inn á miðjuna ásamt Viðreisn og eins borgarfulltrúa Framsóknarflokksins.
Orðið á götunni er að margir andstæðingar Sjálfstæðisflokksins voni að flokkurinn myndi meirihluta með Miðflokknum þannig að borgarbúar fái harðskeytta hægri, öfgahægri borgarstjórn þar sem mannúð og mildi verði lögð til hliðar og ekki látin trufla harðskeytta uppstokkun í starfsmannahaldi og þjónustu við íbúa höfuðborgarinnar. Markmið þessara flokka í samstarfi gæti þá orðið að draga úr þjónustu við borgarana, selja eignir og lækka skatta á þá efnamestu í borginni. Slík vegferð yrði fljótt dæmd af kjósendum og það er vitanlega það sem andstæðingar Sjálfstæðisflokksins vonast eftir.
Miðflokkurinn talaði í kosningabaráttunni mjög skýrt um harðar aðgerðir á komandi kjörtímabili í erfiðum málaflokkum. Þeir hafa ítrekað kröfur sínar eftir kosningar og sagst munu standa við kosningaloforð sín. Þótt Sjálfstæðisflokkurinn hafi í kosningabaráttunni lofað kjósendum gríðarlega mörgu STRAX eftir kosningar þá rímar fæst af því við harðlínustefnu Miðflokksins. Því yrði samstarf þessara flokka vægast sagt snúið og því ekki við öðru að búast en að oddviti Sjálfstæðisflokksins sé nú hikandi.
Orðið á götunni er að ástandið í borgarstjórnmálunum sé eldfimt og verði það áfram hvernig sem næsti meirihluti muni líta út.
