Gervigreind er að breyta hugbúnaðargerð úr sérhæfðu og kostnaðarsömu verkefni í tækni sem venjulegt fólk getur nýtt til að hrinda hugmyndum sínum í framkvæmd. Ólafur Andri Ragnarsson segir bilið milli hugmyndar og fullbúinnar lausnar hafa minnkað gríðarlega.
Ólafur Andri Ragnarsson fjallar um byltinguna í hugbúnaðargerð í nýrri grein á Substack-síðu sinni. Þar líkir hann þróuninni við það þegar Kodak gerði ljósmyndun aðgengilega almenningi undir lok nítjándu aldar.
Fram að því hafði ljósmyndun að mestu verið á færi sérfræðinga vegna þess hversu flókið og kostnaðarsamt ferlið var. Með einfaldari myndavélum gat almenningur hins vegar sjálfur tekið myndir án þess að búa yfir sérþekkingu.
Ólafur Andri segir svipaða þróun nú eiga sér stað í hugbúnaðargerð. Fólk þurfi ekki lengur að kunna hefðbundna forritun til þess að smíða einföld vefforrit eða öpp. Í staðinn geti notandinn lýst hugmyndinni á venjulegu máli og látið gervigreindina sjá um stóran hluta vinnunnar.
Milljón ný verkefni í hverri viku
Ólafur Andri tekur sænska fyrirtækið Lovable sem dæmi. Fyrirtækið var stofnað í Stokkhólmi árið 2023 og býður upp á kerfi þar sem notendur geta búið til hugbúnaðarlausnir með því að lýsa því sem þeir vilja fá.
Samkvæmt þeim tölum sem Ólafur Andri vísar til hafa um 50 milljónir verkefna verið búin til með kerfinu og um ein milljón nýrra verkefna bætist við í hverri viku.
Anton Osika, forstjóri Lovable, sagði á RAISE-gervigreindarráðstefnunni í París að aðeins um 20 prósent notenda kerfisins væru tæknifólk. Stór hluti notendanna væri því fólk úr öðrum starfsstéttum sem þekkir ákveðin vandamál og getur nú sjálft smíðað lausnir við þeim.
„Bestu hugmyndir heims eru fastar í huga fólks sem kann ekki að forrita,“ sagði Osika samkvæmt grein Ólafs Andra.
Þannig eru frumkvöðlar, hönnuðir, sölufólk og sérfræðingar úr öðrum atvinnugreinum orðnir að nýrri tegund forritara. Þeir þekkja vandamálin af eigin raun en þurfa ekki lengur að ráða stórt teymi hugbúnaðarsérfræðinga áður en hægt er að prófa hugmynd.
Gervigreindin skrifar eigin kóða
Gervigreind er ekki aðeins notuð af fólki sem kann lítið eða ekkert í forritun. Faglærðir hugbúnaðarfræðingar nýta tæknina einnig í auknum mæli til þess að hraða vinnu sinni.
Ólafur Andri nefnir bandaríska fyrirtækið Cognition, sem hefur þróað gervigreindarhugbúnaðarfræðinginn Devin. Kerfið getur tekið við verkefnum, skrifað kóða og unnið að lausnum með töluvert sjálfstæðum hætti.
Scott Wu, forstjóri Cognition, hefur sagt að notkun fyrirtækja á Devin hafi tífaldast frá janúar 2026. Þá sé Devin nú sagður skrifa 89 prósent af öllum kóða Cognition.
Ólafur Andri segir þetta geta verið dæmi um endurkvæma sjálfsbætingu, þar sem gervigreindarkerfi tekur þátt í að bæta kerfið sjálft.
Sérfræðingar enn nauðsynlegir
Þróunin er þó ekki áhættulaus. Gervigreind getur gert mistök, búið til öryggisholur eða notað úrelt forritasöfn. Kóðinn getur einnig reynst flókinn yfirferðar og erfitt getur verið fyrir aðra að skilja hvernig lausnin virkar.
Þegar hugbúnaðarlausnir stækka, geyma viðkvæm gögn eða þjóna mörgum notendum þarf áfram sérfræðiþekkingu til að tryggja rekstraröryggi og gagnavernd.
Ólafur Andri telur því ekki að gervigreindin muni útrýma störfum hugbúnaðarfræðinga. Hlutverk þeirra sé frekar að breytast. Í stað þess að verja mestum tíma í að skrifa hverja línu af kóða muni þeir í auknum mæli stýra vinnu gervigreindarinnar, skilgreina verkefni, yfirfara niðurstöðurnar og bera ábyrgð á endanlegri lausn.
Lægri kostnaður geri jafnframt mögulegt að smíða fjölmargar litlar og sérhæfðar lausnir sem áður þóttu ekki nægilega mikilvægar til að réttlæta kostnað við hugbúnaðargerð.
Greinar Ólafs Andra um gervigreind, nýsköpun og önnur tæknimál birtast á laugardagsmorgnum. Hægt er að gerast áskrifandi að Substack-síðu Ólafs Andra og fá nýjar greinar sendar beint þegar þær birtast.
