Hildur Björnsdóttir, oddviti Sjálfstæðisflokksins, stóð sig best í kappræðum kvöldsins á RÚV að mati áhorfenda, sem greiddu atkvæði með smáforritinu RÚV-stjörnur. Hildur fékk 22,5% atkvæða og var með töluvert forskot á næstu oddvita.
Björg Magnúsdóttir úr Viðreisn fékk tæp 13% atkvæða og þau Ari Edwald, Einar Þorsteinsson, Pétur Marteinsson og Silja Sóley Birgisdóttir fylgdu í kjölfarið með 11-12%.
Atkvæðin í þessum samkvæmisleik voru þannig nokkuð dreifð og skeikaði aðeins örfáum prósentubrotum á röð frambjóðenda.
Að lokum fengu allir oddvitarnir 30 sekúndur til að ávarpa kjósendur. Við ljúkum þessari fréttavakt á lokaávörpum oddvitanna. Takk fyrir okkur.
Oddvitar flokkanna voru spurðir að því hver þeirra draumameirihluti væri í borgarstjórn. Sjálfstæðisflokkurinn hefur mælst með mest fylgi í kosningakönnunum síðustu vikur. Hildur Björnsdóttir oddviti flokksins segist ekki ætla að upplýsa um einkasamtöl en að þó lítist Sjálfstæðisflokknum best á samstarf við Framsókn, Viðreisn eða Miðflokkinn.
Pétur Marteinsson, oddviti Samfylkingarinnar, óttast meirihluta Sjálfstæðisflokks og Miðflokks, draumameirihluti Samfylkingarinnar væri ekki með Sjálfstæðisflokki né Miðflokki. Pétur segir flokkinn líklegri til þess að horfa nær miðju- og vinstrivængnum.
Ari segir ljóst að lengst sé á milli Miðflokks og Samfylkingarinnar, honum hafi litist ágætlega á samstarf með Sjálfstæðisflokki, Framsókn og Viðreisn en að gagnrýni Einars Þorsteinssonar oddvita Framsóknar í garð Miðflokksins hafi komið honum á óvart.
Sanna Magdalena, oddviti Vinstrisins, segir ljóst að flokkurinn vilji ekki hægri stjórn í Reykjavík. Vinstrið sé til dæmis opið fyrir samstarfi við Sósíalista en að ljóst sé að samstarf við ákveðna flokka gangi ekki upp, Vinstrið tali fyrir mannréttindum og að sumir flokkar styðji ekki þá sýn.
Útilokar allt samstarf við Miðflokk
Björg Magnúsdóttir, oddviti Viðreisnar, segir að pólitískur ómöguleiki sé á samstarfi milli Miðflokks og Viðreisnar, í raun hafni flokkurinn öllu samstarfi við Miðflokkinn.
Björg segir að góður möguleiki sé á samstarfi við Sjálfstæðisflokk, Framsókn og Pírata, hins vegar sé Samfylkingin öllu síðri kostur.
Einar Þorsteinsson, fyrrverandi borgarstjóri og oddviti Framsóknarflokksins, hefur alfarið útilokað samstarf við Samfylkinguna, ljóst sé að borgin þurfi nýtt upphaf. Sjálfstæðisflokkur og Viðreisn eru þeir flokkar sem Einar myndi helst vilja mynda meirihluta með.
Kristinn Jón Ólafsson, oddviti Pírata, útilokar alfarið samstarf við Miðflokkinn og Okkar Borg líkt og oddviti Sósíalista, Silja Sóley Birgisdóttir. Sósíalistar segjast vilja vinna með Vinstrinu, Pírötum og Samfylkingunni.
Guðmundur Ingi Þóroddsson oddviti Flokks fólksins segir flokkinn til í að vinna með öllum þeim flokkum sem hafa velferðarmál að leiðarljósi. Hann útilokar ekki samstarf við neina flokka.
Sigfús Aðalsteinsson, oddviti Okkar borgar, segir flokkinn hafa stórt hjarta, það sé þó ekki nægilega stórt til þess að vinna með „ákveðnum vinstri aðilum“. Flokkurinn sé klárlega til í að vinna með hægri flokki.
Oddviti Góðan daginn framboðsins, Ingimar Þór Friðriksson, útilokar ekki samstarf við neina flokka. Hann segir flokkinn hvorki vera til hægri né vinstri en að æskilegast sé að breytingar verði í borginni.
Hér kemur svo seinni lotan af spurningum oddvitanna hvorir til annars:
Sigfús spurði Hildi: hvað ætlarðu að gera í Græna gímaldinu?
Guðmundur Ingi spurði Hildi: ef til samstarfs kæmi við Flokk fólksins mynduð þið styðja kröfur okkar um að útrýma biðlistum eftir hjúkrunarrýmum, byggja fleiri þjónustuíbúðir og tryggja öllum 67 ára og eldri gjaldfrí bílastæði?
Einar spurði Hildi: af hverju þorir þú ekki að útiloka Samfylkinguna?
Björg spurði Einar: heldur þú að Reykvíkingar taki meirihluta Framsóknar, Sjálfstæðisflokks og Miðflokks fagnandi?
Sanna spurði Hildi: af hverju eiga rökin um að markaðurinn geti reki innviði betur ekki við um Orkuveituna, en eiga við um Landsnet, Rarik og Ljósleiðarinn, á hvaða sameiginlega grunni ákveður flokkurinn hvaða innviði á að selja?
Hildur spurði Björgu: hvort telur þú eftir kosningar að þið getið náð meiri árangri með ykkar mál í samstarfi við Sjálfsæðisflokknum eða Samfylkinguna?
Björg Magnúsdóttir oddviti Viðreisnar notaði sína spurningu til að spyrja Einar Þorsteinsson oddvita Framsóknar hvort hann teldi að borgarbúum myndi hugnast meirihluti Framsóknar, Sjálfstæðisflokks og Miðflokks, sem er einn af þeim möguleikum sem teiknuðust upp eftir niðurstöður fylgiskönnunar Gallups sem birt var í dag.
Einar sagðist miklu frekar myndu vilja meirihluta með Björgu og Hildi, oddvita Sjálfsæðisflokksins.
Hann sagði Ara ágætan en að hann væri með erfitt pólitískt bakland sem hefði lofað að taka róttækar ákvarðanir um samgöngusáttmálann og væri í bullandi vandræðum með hinseginmál og talaði inn í óttann í samfélaginu.
Reykjavíkurleiðin, lögfesting réttar til leikskóla, fyrirtækjaleikskólar og heimgreiðslur til foreldra voru meðal þess sem tekist var á um í umræðu um leikskólamál í kappræðunum. Flest voru sammála um að Reykjavíkurleiðin hafi verið skref í rétta átt og mörg voru sammála um að bæta þyrfti starfsaðstæður og kjör á leikskólum.
Ari Edwald, oddviti Miðflokksins, sagði að borgin ætti ekki að neita sér um neinar lausnir í þessum flókna málaflokki því eflaust hentuðu allar lausnirnar einhverjum.
Silja Sóley, oddviti Sósíalistaflokksins, sagði einu raunhæfu lausnina að lengja fæðingarorlofið og það þyrfti að setja þrýsting á það. Í leikskólanum þyrfti að leggja áherslu á hækkuð laun starfsfólks.
Sigfús Aðalsteinsson, oddviti Okkar borgar, tók undir þetta að það þyrfti að hækka laun leikskólastarfsfólks frekar en að verja fjármunum í dýra uppbyggingu eins og Brákarborg.
„Við verðum að borga þessu fólki mannsæmandi laun svo það komi aftur í vinnuna,“ sagði Sigfús. Hann sagði heimgreiðslurnar stórhættulegar og myndu bitna á þeim sem minnst mættu sín.
Guðmundur Ingi Þóroddsson, oddviti Flokks fólksins, segir að þrátt fyrir að flokkurinn hafi verið í meirihluta í borginni hafi hann fundið fyrir því að ekki væri nægur vilji, svo sem hjá Samfylkingunni, til að takast á við rót vandans.
Ingimar Þór Friðriksson, oddviti Góðan daginn framboðsins, sagði augljóst að leikskólamál væru ekki forgangsmál nema rétt fyrir kosningar.
„Ef þetta væri forgangsmál þá væri þetta leyst.“
Horfðu á alla umræðuna um leikskóla í spilaranum að neðan.
Í einum lið kappræðnanna fá oddvitarnir að spyrja hvern annan spurninga. Hver oddviti má spyrja einn annan oddvita einnar spurningar. Fimm oddvitar fengu að spyrja í fyrri umferðinni og þrír þeirra beindu spurningum sínum að Hildi, oddvita Sjálfstæðisflokksins. Sjáið spurningar og svör í spilurunum hér að neðan.
Ingimar hjá Góðan daginn spurði Kristinn hjá Pírötum: Hvernig stendur á að þið eruð ekki með opið bókhald á framboðinu og hvernig stendur á því að þið lokuðuð öllum íbúaráðum hverfanna í fyrra?
Kristinn spurði Hildi: Sjálfstæðismenn í minnihlutanum, þrjár óvinsælar ákvarðanir sem Sjálfstæðisflokkurinn myndi taka?
Silja Sóley spurð Hildi: útvistun starfa, hvernig ætla þau að tryggja að starfsfólk sem sinnir grunnþjónustu nái endum saman?
Ari spurðir Hildi: getum við treyst því ef við náum að mynda meirihluta að Sjálfstæðisflokkurinn komi með Miðflokknum í þær breytingar sem þarf að gera?
Pétur spurði Ara: hvernig hann vilji taka utan um börn í grunnskólum með annað tungumál en íslensku sem móðurmál?
Hraðaspurning: Ef þú mættir ráða af hverjum myndirðu láta reisa styttu í miðborginni?
Einar: Kennarinn
Björg: Guðrúnu Helgadóttur barnabókahöfundi
Sanna: Stytta til heiðurs láglaunakvenna
Hildur: Hallgerður Fróðadóttir landnámskona
Pétur: Vigdís Finnbogadóttir
Ari: Séra Friðrik
Silja: Venus
Kristinn: Móðir hans
Ingimar: Selur
Sigfús: Séra Friðrik
Guðmundur Ingi: Inga Sæland
Húsnæðis- og skipulagsmál hafa verið borgarbúum ofarlega í huga fyrir komandi kosningar.
Pétur Marteinsson, oddviti Samfylkingarinnar, segist hlynntur þéttingarstefnu byggðar í Reykjavík en segir að þó hafi margt betur mátt fara. Pétur telur að skilgreina þurfi þéttingarstefnuna betur, margt hafi verið vel gert en að hlusta þurfi á íbúa betur en áður hefur verið gert.
Silja Sóley Birgisdóttir oddviti Sósíalistaflokksins segir að þéttingarstefnan sé að mörgu leyti vanhugsuð, til að mynda stemmi ekki uppbygging hverfa og skóla innan þeirra. Sósíalistar hafa lagt til að Reykjavíkurborg stofni sitt eigið byggingarfélag og þar með geti sveitarfélagið sjálft séð um uppbyggingu íbúða, þannig geti borgin stigið beint inn í ferlið.
Kristinn, oddviti Pírata í borginni, telur mikilvægt að flokkurinn hlusti betur á íbúa og að koma þurfi á borgarhönnunarstefnu sem tekur tillit til hljóðvistar og birtu í hverfum, áhersla sé lögð á gæði og að lykilgrunnurinn sé að vera í samtali og tryggja hönnun og gæði.
Björg Magnúsdóttir, oddviti Viðreisnar, segir flokkinn hafa áhyggjur af unga fólkinu, það kjósi með fótunum og fari í önnur sveitarfélög. Þá skipti miklu máli að íbúar fái að ráða sjálfir hvernig þeir vilji búa.
Hildur Björnsdóttir, oddviti Sjálfstæðisflokksins, gagnrýndi sömuleiðis fyrirhugaða uppbyggingu í Keldnalandi og sagði Sjálfstæðismenn vera ósátta við núverandi fyrirkomulag.
Eins og við var að búast sköpuðust líflegar umræður um samgöngusáttmálann og borgarlínu í kappræðunum.
Hildur Björnsdóttir, oddviti Sjálfstæðisflokksins, sagði Sjálfstæðisflokkinn í borginni aldrei hafa haft aðkomu að hluta borgarinnar í samgöngusáttmálanum þó flokkurinn sé í meirihluta í öllum hinum sveitarfélögunum sem standa að sáttmálanum, og hann hafi verið í ríkisstjórn þegar hann var undirritaður. Hún sagðist ósátt við að borgarlínan hafi fengið allan forgang.
Einar Þorsteinsson, oddviti Framsóknarflokksins, sagði samgöngusáttmálann góðan en það væri áhyggjuefni að framboðin væru á öndverðum meiði um hann: annars vegar vildu þeir setja algjört stopp á borgarlínu, eða vildu ekki hlusta á neina gagnrýni. Hann sagði að það yrði að bregðast við gagnrýni og breyta útfærslu borgarlínunnar.
Pétur Marteinsson, oddviti Samfylkingarinnar, sagði að ekkert myndi gerast í samgöngumálum ef samgöngusáttmálinn yrði rifinn upp á tveggja ára fresti eftir hverjar Alþingis- og sveitarstjórnarkosningar. Hann sagði óábyrgt að skipta um hest úti í miðri á.
Björg Magnúsdóttir, oddviti Viðreisnar, tók undir þetta og sagði Reykvíkinga ekki geta beðið lengur. Hún benti á að samgöngubætur eins og Hvalfjarðargöngin hefðu mætt mjög mikilli andstöðu, allt að 70%, þar til þau voru komin í gagnið og farin að virka.
Silja Sóley Birgisdóttir, oddviti Sósíalistaflokksins, tók undir með Björgu og sagði að sýna þyrfti ábyrgð og keyra málið áfram. Hún sagði flokkinn hins vegar algerlega á móti allri gjaldtöku en að borgarstjórn þyrfti að treysta þinginu til að finna leiðir til að fjármagna verkefnið.
Horfið á alla umræðuna um samgöngumál hér að neðan.
Frambjóðendur voru beðnir um að svara hvaða borg Reykjavík ætti að taka sér til fyrirmyndar. Svona svöruðu oddvitar flokkanna:
Sigfús Aðalsteinsson: Vancouver
Guðmundur Ingi Þóroddsson: Osló
Einar Þorsteinsson: Reykjavík á að vera Reykjavík
Sanna Magdalena Mörtudóttir: Vínarborg
Björg Magnúsdóttir: Kaupmannahöfn
Hildur Björnsdóttir: Ósló
Pétur Marteinsson: Stokkhólmur
Ari Edwald: Reykjavík á að vera Reykjavík
Silja Sóley Birgisdóttir: Vínarborg og Helsinki
Kristinn Jón Ólafsson: Oulu í Finnlandi
Ingimar Þór Friðriksson: Uppsalir
Oddvitakappræðurnar hófust á umræðu um traust og hvernig mætti vinna traust borgarbúa á borgarstjórn aftur, en traust til borgarstjórnar mælist almennt lágt.
Oddvitarnir voru flestir sammála um að bæta þyrfti tengsl borgarstjórnar við borgarbúa því þar hefði orðið ákveðið rof.
Pétur Marteinsson, oddviti Samfylkingarinnar sem hefur verið í meirihluta í borginni í áraraðir, sagði að borgin glímdi við vaxtaverki og kerfin næðu ekki að fylgja eftir fólksfjölgun og uppbyggingu sem hann sagði auka líkur á mistökum eins og Græna gímaldinu, sem sýndi rof milli borgarbúa og borgarstjórnar.
Sanna Magdalena Mörtudóttir, oddviti Vinstrisins, sagði framboðið svara ákalli íbúa um að vinstrimenn sýndu samstöðu og einblýndu á það sem skipti mestu máli. Þá þakkaði hún borgarbúum traustið til sín.
Í umræðum um traust var Ari Edwald, oddviti Miðflokksins, spurður út í umdeildar skoðanir flokksmanna hans á regnbogafánanum og umdeildan gest sem ungliðahreyfingin fékk til að ávarpa samkomu. Hann sagði flokkinn ekki bera ábyrgð á skoðunum eins manns og að það hefði orðið útúrsnúningur á orðræðunni.
Hægt er að horfa á alla umræðuna um traust í spilaranum hér að neðan.
Sjálfstæðisflokkurinn er með mest fylgi flokka í Reykjavík samkvæmt lokakönnun Gallups. Flokkurinn mælist með 31,3% fylgi.
Þau sem horfa á oddvitakappræðurnar á RÚV geta valið þá sem standa sig best í RÚV-stjörnur appinu. Sigurvegarar í RÚV-stjörnukeppninni fyrir síðustu alþingiskosningar mynduðu ríkisstjórn.
Nánari upplýsingar í fréttinni hér að neðan.
Samfélagsmiðlateymið okkar ætlar að fylgjast með oddvitaumræðunum. Þau Ingunn Lára Kristjánsdóttir og Sebastian Óli Guðmundsson eru mætt að ræða við oddvitana, eins og sjá má á þessum ljósmyndum sem Ragnar Visage tók.
Fréttastofa RÚV er Instagram og Tiktok undir notandanafninu @ruvfrettir.
Þau sem ekki hafa ákveðið hvar þeir ætla að setja x-ið í kjörklefum borgarinnar á morgun verða vonandi einhverju nær eftir kappræður kvöldsins.
Kjósendur í öllum sveitarfélögum geta líka tekið kosningapróf RÚV til að máta sig við framboðin.
Oddvitar framboðanna í Reykjavík hafa staðið í ströngu þessa vikuna. Kappræðurnar í kvöld eru þær fjórðu sem oddvitar stærstu framboðanna taka hafa tekið þátt í síðan á þriðjudag.
Þá mættust oddvitar allra ellefu framboða í kappræðum hjá Heimildinni. Á miðvikudag mættust oddvitar efstu níu framboða í kappræðum hjá Sýn og í dag tókust oddvitar sex efstu framboðanna í kappræðum hjá mbl.is.
Gott kvöld. Það líður að oddvitakappræðum fyrir borgarstjórnarkosningar á morgun. Undirbúningur er í fullum gangi og fyrstu oddvitar mættir í smink.
