Þjóðminjavörður sem sá um uppgröft á beinum Jónasar Hallgrímssonar árið 1946 skrifaði nákvæma skýrslu um verkið. Aðstoðarþjóðskjalavörður segir hann hafa verið vissan í sinni sök um að beinin væru Jónasar, en í grafreitnum voru fjórir að auki.
Hópur fólks vill grafa upp bein Jónasar Hallgrímssonar og fá úr því skorið hvort beinin séu raunverulega hans - í tengslum við gerð heimildarmyndar.
Skjöl um uppgröft líkamsleifa Jónasar er að finna í skjalasafni forsætisráðuneytisins á Þjóðskjalasafni Íslands. Frá því var greint á Facebook-reikningi Þjóðskjalasafnsins í dag. Jónas var upphaflega jarðsettur í Assistens-kirkjugarði í Kaupmannahöfn en er nú grafinn í þjóðargrafreitnum á Þingvöllum.
Líkamsleifar fjögurra annara í grafarreit Jónasar
Matthías Þórðarson, þjóðminjavörður, sá um uppgröft á beinum Jónasar, 30.-31. ágúst 1946. Njörður Sigurðsson aðstoðarþjóðskjalavörður segir Matthías hafa skrifað nákvæma skýrslu um verkið. Jónas var jarðsettur í Kaupmannahöfn 1845 og í grafreit hans voru síðar jarðsett hjón og feðgar.
„Það eru sem sagt fjórir einstaklingar auk hans einmitt og svo eru grafnir já sem voru grafnir 1875 1898 og 1907,“ segir Njörður.
Matthías hafi engu að síður verið viss í sinni sök um að beinin væru Jónasar út frá staðsetningu þeirra. Jafnframt eru í einkaskjalasafni Matthíasar, sem varðveitt er í Þjóðskjalasafni, vinnugögn hans frá uppgreftrinum, þar á meðal teikningar af legstaðnum, og má sjá sýnishorn þeirra vinnugagna hér.
„Hann er alla vega viss í sinni sök og lýsir þessu ágætlega og rannsakar út frá því hvernig beinin liggja í gröfinni hver geti verið bein Jónasar. Þannig að hann virðist vera mjög viss.“
