Síðastliðið þriðjudagskvöld greindi DV frá baráttu Óðins Arnar Eybekks Valdimarssonar og fjölskyldu hans við að endurheimta hundinn Mosa úr pössun frá einstaklingi sem hafði áður tekið hann að sér. Umræddur einstaklingur er sagður vera í óreglu og fjölskyldan hefur því miklar áhyggjur af velferð Mosa. Fjölskyldunni hefur ekki enn tekist að endurheimta Mosa og getur í raun lítið annað gert nema að bíða eftir að lögreglan fái heimild til að sækja hann. Hefur málið kostað Óðinn atvinnuna.
DV rakti sögu málsins nokkuð ítarlega á þriðjudagskvöld en Mosi er fjögurra og hálfs árs gamall og er nokkuð stór en hann er blanda af tegundunum Bull Mastif og Boxer. Óðinn og fjölskylda hans fengu hann úr goti árið 2021 en faðir Mosa var í þeirra eigu og er enn. Vegna breyttra aðstæðna hjá fjölskyldunni þurfti hún að láta Mosa frá sér undir lok árs 2022. Maðurinn sem er með hann í vörslu sinni nú bauðst þá, ásamt þáverandi konu sinni, til að taka Mosa að sér. Var hann hjá þeim þar til á síðasta ári að þau slitu samvistum og óskuðu þau þá eftir að Óðinn og fjölskylda tækju aftur við Mosa og sú varð raunin.
Móðir Óðins veiktist síðan af krabbameini og áhrifin af meðferðinni urðu þau að hún átti bágt með að hafa Mosa á heimilinu, á meðan meðferðinni stendur, og þurfti því Mosi að fara aftur en áðurnefndur maður sem hafði áður haft hann hjá sér bauðst til að taka við honum aftur, tímabundið. Það samþykkti fjölskyldan en var þá ekki meðvituð um að maðurinn væri dottinn í óreglu og nú neitar hann að skila Mosa.
Skráning
Samkvæmt örmerkjaskráningu í gagnagrunninum Dýraauðkenni er Óðinn skráður eigandi Mosa.
Þar að auki greiðir hann öll tilskilin opinber gjöld vegna hundsins og einnig fyrir tryggingar hans vegna. Sem skráður eigandi ber hann einnig alla ábyrgð á hundinum og þá til að mynda ef eitthvert tjón skyldi verða af völdum hundsins.
Þetta bendir Inda Björk Eyrbekk Alexandersdóttir, móðir Óðins, á í samtali við DV:
„Þetta er bara þvílíka fíaskóið,“ segir hún.
„Ég hef bara aldrei lent í svona máli.“
Þegar DV ræddi við Óðinn á þriðjudaginn lá ekki fyllilega fyrir hvar Mosi var niðurkominn en umræddur maður sem tók við honum sagðist hafa sent hann í pössun hjá vini sínum en gaf litlar sem engar upplýsingar um það. Inda segir það nú hafa skýrst að maðurinn sé sjálfur með hundinn en hann neiti einfaldlega að skila honum.
Lögreglan
Inda segir manninn hafa verið með hundinn á heimili sínu í gær og þau fjölskyldan hafi farið þangað í fylgd lögreglu og bankað upp á en hann hafi ekki svarað neinu.
Óðinn lagði fram kæru gegn manninum á þriðjudaginn en á meðan kæran fer sína leið í kerfinu getur lögregla lítið annað gert en að biðja manninn að afhenda Mosa, sjálfviljugur. Það sama á við um Matvælastofnun, segir Inda:
„Eins og lögreglan sagði við okkur í gær: „eins og við myndum vilja brjótast hér inn og ná í hundinn þá megum við það ekki,““ segir Inda.
Hún segir hins vegar að þegar kæran sé komin sína leið í kerfinu þá muni lögreglan geta fengið heimild til að sækja Mosa með valdi, ef þörf krefur. Í millitíðinni muni þau fjölskyldan halda áfram að reyna að fá manninn til að afhenda þeim Mosa.
Ástand
Eins og Óðinn hefur Inda áhyggjur af velferð Mosa enda viti þau fjölskyldan lítið um í hvaða ástandi maðurinn, sem er með hann í sinni vörslu, er. Þau voru eins og áður segir ekki meðvituð um að hann væri dottinn í óreglu og væri í reglulegri fíkniefnaneyslu þegar þau sendu Mosa í pössun til hans. Það var ekki fyrr en fyrrverandi kona mannsins hafði samband og upplýsti þau að hann hefði fallið en maðurinn mun hafa áður glímt við fíknivanda en Inda segir hann hafa verið á beinu brautinni, á tímabilinu, frá árslokum 2022 og fram á síðasta ár, þegar hann og fyrri kona hans voru með Mosa hjá sér.
Inda segir einnig ljóst að hegðun og framganga mannsins í samskiptum við þau fjölskylduna ýti stoðum undir það að hann sé kominn í óreglu. Hún segir manninn einnig vera í reglulegum samskiptum við annað fólk í óreglu sem sé á „bólakafi í undirheimunum.“ Þar á meðal er vinkona mannsins sem fjölskyldan segir að hafi reynt að nýta Mosa til að krefja bróður Óðins um greiðslu skuldar sem eigi sér enga stoð í veruleikanum.
Móðir mannsins hefur hótað Óðni lögsókn. Inda segist ekki bera kala til hennar en ljóst sé að hún sé afar meðvirk með syni sínum. Inda segist vorkenna konunni:
„Hún er mamma í meðvirkni og í erfiðri stöðu.“
Inda segir það hins vegar ekki vera vandamál fjölskyldunnar. Hún hafi þó tjáð konunni að hennar framganga væri ekki að hjálpa syni hennar.
Eign
Inda segir að eftir á að hyggja hafi það líklega verið mistök, þegar aðstæður fjölskyldunnar breyttust undir lok árs 2022 og hún þurfti að láta Mosa frá sér að senda hann til mannsins og þáverandi konu hans. Þau hafi bæði áður átt við fíknivanda að stríða en Inda segist þau fjölskylduna ekki hafa vitað það þá en hún segist hins vegar ekki vilja dæma fólk fyrir fram vegna fortíðar þess og það eigi skilið að fá tækifæri þrátt fyrir að hafa brotið af sér í fortíðinni. Dæmi úr hennar fjölskyldu hafi kennt henni að dæma ekki fólk eftir gamalli hegðun.
Á þessum tíma hafi konan verið á beinu brautinni og maðurinn líka. Þau eigi börn saman og á þessum tíma verið bæði í vinnu. Samskiptin við þau hafi verið góð og þau fjölskyldan alltaf getað fengið að hitta Mosa ef þau hafi sóst eftir því. Eftir að parið sleit samsvistum hafi hins vegar allt farið til verri vegar.
Þegar það gerðist tók fjölskyldan eins og áður segir aftur við Mosa en þegar Inda veiktist þurfti hann að fara aftur út af heimilinu, tímabundið, maðurinn bauðst þá til að passa hann á meðan en þau höfðu ekki hugmynd um að maðurinn væri kominn á kaf í óreglu.
Inda segir að þegar parið hafi tekið við Mosa á sínum tíma hafi hann verið skráður á konuna en ekki manninn. Þegar fjölskyldan tók aftur við Mosa var hann skráður á Óðinn. Inda segir manninn halda því fram að hann sé skráður eigandi hundsins en örmerkið, á hundinum, sé skráð á Óðinn. Hafa ber í huga að örmerki hunda eru skráð á hinn skráða eiganda. Inda segir manninn þar af leiðandi aldrei hafa verið skráður eigandi Mosa.
Góður
Inda bætir því hins vegar við að þegar Mosi var hjá manninum og konu hans frá árslokum 2022 til 2025 hafi þau hugsað vel um hann og maðurinn hafi þá alltaf verið góður við Mosa.
Hegðun mannsins sé hins vegar breytt og þau fjölskyldan hafi fengið sendar myndir af Mosa í dópgrenum og frétt af því að annað óreglufólk sé í samneyti við hundinn. Mögulega hafi áðurnefnd vinkona mannsins, sem reyndi að hafa fé út úr bróður Óðins, eitthvað með það að gera að hundinum sé ekki skilað en Inda er ekki full viss um það. Þar af leiðandi sé manninum ekki lengur treystandi fyrir Mosa.
Inda segist þrátt fyrir allt treysta því að maðurinn sé ekki sjálfur vondur við Mosa en hún treysti því hins vegar ekki að hann muni ekki koma hundinum í slæmar aðstæður og jafnvel skilja hann eftir:
„Hann myndi sjálfur aldrei gera hundinum mein.“
Inda segir að aðalatriðið sé hins vegar að Mosi sé hundur Óðins og hans fjölskyldu og eigi heima hjá þeim.
Lítið annað sé hægt en að bíða eftir að lögreglan geti sótt Mosa en ef að gefist tækifæri til að endurheimta hann verði það nýtt.
Vinnan farin
Afleiðingarnar fyrir fjölskylduna hafa þó ekki eingöngu verið að fá ekki Mosa aftur, með tilheyrandi kvíða og áhyggjum, heldur hefur vinnuveitandi Óðins sagt honum upp störfum.
Inda rekur það til fyrri fréttar DV af málinu en var ekki tilbúin til að tjá sig nánar um atvinnumissi sonar síns sem sjálfur hafði ekki tök á því að ræða við DV að þessu sinni:
„Óðinn tekur á sig atvinnumissi frekar en að missa hundinn sinn.“
Eftir stendur að fjölskyldan hefur enn ekki fengið Mosa og Inda segist að lokum vona að það sé allt í lagi með hann.
