„Við teljum þetta jákvæðar aðgerðir og höfum um nokkurt skeið beðið eftir því að stjórnvöld nýti ríkislóðir með þessum hætti. Það jákvæða er að það er hægt að hrinda einhverju af þessum verkefnum hratt af stað og einmitt á þann hátt að það mætir þörfum markaðarins um þessar mundir sem eru fyrir smærri og hagkvæmari eignir,“ segir Róbert Farestveit, sviðsstjóri greiningar- og hagfræðisviðs ASÍ. Ríkið og Reykjavíkurborg undirrituðu í dag samkomulag um uppbyggingu 12-14 hundruð íbúða á ríkislóðum á næstu árum.
Uppbygging þarf að vera til langtíma
Róbert segir það langtímaverkefni að ná jafnvægi á húsnæðismarkaðinn og margþættar aðgerðir þurfi til.
„Í þessu tilfelli er gert ráð fyrir að um 20-30% af byggingarmagninu verði hagkvæmar íbúðir en til samanburðar eru um 4000 fjölskyldur á biðlista eftir íbúðum hjá Bjargi. Þannig að í okkar huga þarf uppbyggingin að vera til langtíma en hún þarf líka að eiga sér stað í fleiri sveitarfélögum heldur en eingöngu í Reykjavík.“
Sveitarfélögin þurfi að koma sterkar að borðinu
ASÍ kynnti í morgun ásamt BSRB greiningu á stöðunni á almenna íbúðarkerfinu. Þar var raunveruleiki þeirra tekjulægstu á húsnæðismarkaði dreginn saman, þar sem stór hópur býr við lítið húsnæðisöryggi og íþyngjandi leigu á leigumarkaði.
„Vandinn sem þessi hópur glímir við um þessar mundir er að húsnæðiskaup eru mjög illviðráðanleg og eini valkosturinn er í sjálfu sér leiga á markaðslegum forsendum,“ tekur Róbert fram.
„Við vorum líka að benda á það að þrátt fyrir að við höfum samið um stofnframlag fyrir um 7000 íbúðum á síðustu tíu árum í kjarasamningum hefur okkur eingöngu tekist að reisa um 4000 íbúðir inn í kerfið og þar af einungis um þúsund fyrir tekjulágt vinnandi fólk. Þannig að við teljum að meira þurfi til og við teljum að sveitarfélögin þurfi að koma sterkar að borðinu.“
Róbert segir að til þess að tryggja húsnæðisöryggi fólks almennt sé best að reyna að tryggja framboð af húsnæði sem er með viðráðanlega leigu.
