Fangar og starfsfólk í fangelsinu á Hólmsheiði hafa fengið áfallahjálp á vegum Fangelsismálastofnunar í dag eftir að maður fannst látinn í fangaklefa í morgun.
Guðmundur Ingi Þóroddsson, formaður Afstöðu félags fanga, staðfestir að maðurinn hafi svipt sig lífi.
„Þetta er náttúrulega sjalfgæft, en því miður allt of algengt samt sem áður og sýnir og minnir á mikilvægi góðrar heilbrigðisþjónustu og sálfræðiþjónustu í fangelsum,“ segir Guðmundur.
„Við munum hitta Fangelsismálastofnun eftir helgi til að ræða enn frekari jafningjastuðning og ráðgjöf varðandi þetta mál.“
Hættan meiri í fangelsum
Þetta er ekki í fyrsta sinn sem fangi tekur eigið líf í íslensku fangelsi. Það gerðist síðast á Litla Hrauni fyrir rúmlega tveimur árum.
„Hættan við sjálfsvíg er töluvert meiri í fangelsiskerfinu en annars staðar. Auðvitað er þetta eitthvað sem þarf að fylgjast sérstaklega með.“
Guðmundur er vongóður um að þjónusta við fanga batni við að geðheilsuteymi fangelsa var fært til Landspítala 1. maí.
Markmiðið eigi að vera endurhæfing
Fangelsismálastofnun sé að vinna í sínum verkferlum en að mati Guðmundar er margt sem þarf að bæta til að efla forvarnir gegn sjálfsvígum.
„Það þarf auðvitað að bæta og fjölga fagfólki hjá Fangelsismálastofnun en það í raun og veru tilgangslaust fyrr en búið er að bæta kerfið í heild,“ segir Guðmundur.
„Við þurfum að taka upp sömu stefnu og Norðurlöndin hafa verið með og vinna í hverjum og einasta einstaklingi hverju sinni með það að markmiðið að endurhæfa manneskjuna. Það gerum við ekki í dag.“
Ragna Bjarnadóttir, forstjóri Fangelsismálastofnunar, sagði fyrir hádegi að ekki væri unnt að veita frekari upplýsingar um andlát mannsins. Samkvæmt heimildum fréttastofu var hann að afplána dóm vegna manndráps.
