Um 30 þúsund manns komu saman á dómkirkjutorginu í miðborg Vilniusar, höfuðborgar Litáen, á laugardaginn til stuðnings tjáningarfrelsinu og til að mótmæla fyrirhuguðum lagabreytingum ríkisstjórnarinnar á lögum um LRT, ríkisútvarp og sjónvarp Litáen. LRT greinir frá mótmælunum í frétt á vef sínum.
Frumvarp um breytingar á lögum um LRT hefur verið til umræðu í litáíska þinginu Seimas undanfarið. Fyrirhugaðar lagabreytingar fela meðal annars í sér að stofnuð verði eftirlitsnefnd með LRT, fjölgað verði í útvarpsráði LRT um fjóra einstaklinga og útvarpsráðið fær meira svigrúm til að segja upp forstjóra en áður. Þá er gert ráð fyrir að LRT fái einungis opinbert fé til að sinna þjónustu sem ekki er veitt af öðrum fjölmiðlum og samkeppnisaðilum á fjölmiðlamarkaði.
Frumvarpið hefur verið harðlega gagnrýnt bæði af fjölmiðlafólki og almenningi í Litáen en þetta voru sjöttu mótmælin sem skipulögð voru gegn frumvarpinu. Helsta gagnrýni mótmælenda er að lagabreytingarnar séu af pólitískum toga og þær muni svipta ríkisútvarpið ritstjórnarlegu sjálfstæði, nái þær fram að ganga.
Framkvæmdastjórn EBU lýsir yfir þungum áhyggjum af frumvarpinu
En það er ekki bara almenningur og fjölmiðlafólk í Litáen sem hefur mótmælt frumvarpinu. Framkvæmdastjórn EBU, samtaka evrópskra sjónvarpsstöðva, sendi frá sér tilkynningu 30. mars þar sem lýst var yfir þungum áhyggjum af frumvarpinu. Framkvæmdastjórnin sagði að hætta væri á að fyrirhugaðar lagabreytingar myndu gera LRT viðkvæmari fyrir pólitískum þrýstingi. Verið væri að grafa undan sjálfstæði LRT og gæti hamlað ríkisfjölmiðlinum til að sinna þjónustuhlutverki sínu sem ríkisfjölmiðill í almannaþágu.
Framkvæmdastjórnin skoraði á litáíska þingið að draga lagafrumvarpið til baka.
