Veðurblíðu hefur sjaldan verið meira misskipt á milli landshluta í júlímánuði og nú í ár. Veðurstofan segir að júlímánuður hafi verið einn sá blautasti frá upphafi mælinga á Suðvestur og Vesturlandi.
Á austanverðu landinu var mánuðurinn víða á meðal hlýjustu og þurrustu júlímánuða sem vitað er um. Á Teigarhorni var júlí hlýjasti mánuður frá upphafi mælinga, en þar hefur hiti verið mældur í hundrað fimmtíu og fjögur ár. Meðalhiti var 11,6 stig en fyrra met var 11 stig, það var í júlí árið 1926. Methiti mældist einnig á Dalatanga og á flestum sjálfvirku veðurstöðunum á Austfjörðum.
Annar handleggur á sunnanverðu landinu
Ekki var sama uppi á teningnum í Reykjavík en þar var júlí töluvert kaldari og úrkomusamari. Meðalhiti í Reykjavík var 10,9 stig sem er 0,7 stigum undir meðallagi síðustu 10 ára. Á Suðvestur- og Vesturlandi raðar mánuðurinn sér á meðal blautustu júlímánaða frá upphafi mælinga. Veðurlag breyttist í lok mánaðar þegar norðan- og norðvestanáttir tóku yfir. Þá kólnaði á Norður- og Austurlandi og þurrara og sólríkara veður tók við sunnan- og vestanlands.
Á Akureyri var júlí hlýr en meðalhiti þar var 13,3 stig sem er einni og hálfri gráðu yfir meðallagi síðustu 10 ára. Í Stykkishólmi var meðalhiti mánaðarins 11,0 stig og 11,4 stig á Höfn í Hornafirði.
