Málið hefur verið eitt umdeildasta dýravelferðarmál landsins síðustu árin, ásamt hvalveiðum. Alþjóðleg dýraverndarsamtök hafa birt myndbönd af starfseminni sem hafa vakið heimsathygli.
EFTA-dómstóllinn hefur komist að þeirri niðurstöðu að blóðtaka úr fylfullum hryssum teljist tilraun á dýrum. Í hryssublóðinu er hormón sem Ísteka notar til að framleiða lyf sem eykur frjósemi og stillir gangmál annarra spendýra, sérstaklega í iðnaðarbúskap.
Á Íslandi eru 4000 blóðmerar á 90 bæjum. Úr hverri meri eru teknir allt að 40 lítrar af blóði á hverju ári yfir 8 vikna tímabil.
Ísteka byggði málflutning sinn á því að um hefðbundna landbúnaðarstarfsemi væri að ræða og líkti henni við ostagerð eftir umfjöllun Kveiks um blóðmerahald.
Ísteka hefur einnig haldið því fram að blóðtakan væri svo væg að hún félli undir undanþáguákvæði. EFTA-dómstóllinn hafnaði öllum þessum rökum. Þótt framleiðsluferlið hefði verið stundað á Íslandi í nærri fjóra áratugi breytti það ekki því að notkun hryssanna félli undir gildissvið reglna um vernd dýra sem eru notuð í vísindaskyni og benti á að blóðtaka úr fylfullum hryssum væri aðeins stunduð á Íslandi innan Evrópska efnahagssvæðisins og gæti því ekki talist venjuleg eða dæmigerð aðferð í landbúnaði eða dýrahaldi.
Kristinn Hugason, talsmaður Ísteka vildi ekki veita fréttastofu viðtal en sagði að niðurstöður EFTA-dómstólsins breyttu engu um starfsemi fyrirtækisins. Hún héldi áfram á grundvelli starfsleyfis sem Matvælastofnun hefði þegar veitt.
Málið fer nú aftur fyrir Héraðsdóm Suðurlands, sem mun taka endanlega afstöðu til ágreiningsins í ljósi ráðgefandi álits EFTA.
