Breiðafjarðarferjan Baldur er á leið í slipp í byrjun október. Mikið rask hefur verið á siglingum ferjunnar en hún þurfti að sigla milli lands og Vestmannaeyja í sumar. Bæjarstjórinn í Stykkishólmi, Jakob Björgvin Sigríðarson Jakobsson, segir að ferðamönnum hafi fækkað sökum vandræða með siglingar.
„Þetta er umtalsvert högg sem að bæði rekstraraðilar hér, aðilar í ferðaþjónustu. Bara hafnargjöld og hafnarsjóður verður fyrir höggi vegna tekjutaps sem eru kannski einhverjar milljónir, fjórar milljónir,“ segir Jakob.
Óska eftir að ríkið komi til móts við tekjutap
Sveitarfélögin við Breiðafjörð óskuðu eftir því við innviðaráðherra að ríkið kæmi til móts við þau sökum tekjutapsins. Fjórar milljónir eru um 6% af tekjum hafnarsjóðs í Stykkishólmi.
„Innviðaráðherra tók ekki jákvætt í það á fundi með sveitarfélögum í sumar, ég veit ekki hvort honum hafi eitthvað snúist hugur. Hann orðaði það með mjög ákveðnum hætti.“
Í svari innviðaráðuneytisins við fyrirspurn RÚV um málið segir:
„Ábyrgð ríkisins felst fyrst og síðast í að tryggja grunnþjónustu og talsverðir fjármunir voru lagðir fram af hálfu ríkisins í sumar í því skyni. Þar af leiðandi stendur ekki til að bæta sveitarfélögum eða fyrirtækjum óbeint tekjutap vegna röskunar á samgöngum.“
Hvenær á Baldur að vera varaskip og hvenær ekki?
Þá greinir sveitarfélögin og ráðuneytið á um hvenær Baldur á að þjóna sem varaskip fyrir Herjólf. Samkvæmt Jakobi eru forsendurnar fyrir því að það sé samgöngurof og það sé skilningur sveitarfélaganna.
„Herjólfur var að sigla á sama tíma og Baldur var að sigla milli lands og eyja, þannig það var ekki rof,“ segir Jakob.
Innviðaráðuneytið segir í svari til fréttastofu að í vor hafi skapast slíkar óviðráðanlegar aðstæður að nauðsynlegt reyndist að nýta Baldur til að tryggja örugga og órofna þjónustu til Vestmannaeyja.
