Skemmtistaðurinn Broadway var opnaður við Álfabakka í Mjódd í Reykjavík 26. nóvember 1981.
Broadway var vinsæll samkomustaður um árabil, sérstaklega um áramót. RÚV sendi beint út frá áramótafagnaði þar 1986-1987. Þá var staðurinn fluttur í Ármúla, á jarðhæð Hótels Íslands. Umsjónarmenn voru Arnþrúður Karlsdóttir, Valgeir Guðjónsson og Þorgeir Ástvaldsson.
Í myndskeiðinu hér fyrir ofan má sjá brot úr útsendingunni. Þarna ræðir Valgeir Guðjónsson við Jón Pál Sigmarsson, sterkasta mann í heimi, og hrósar honum meðal annars fyrir góða takta á dansgólfinu. Við hlið Jóns Páls situr Ólafur Ragnar Grímsson, síðar forseti Íslands.
Færri kvöld til skemmtana
Ólafur Sigurðsson fréttamaður fjallaði um breytingar á skemmtanahaldi í borginni í Kastljósi árið 1988. Þar kom fram að stærri skemmtistaðir væru ekki lengur opnir á fimmtudögum og sunnudögum. Flestir færu því að skemmta sér á laugardagskvöldum. Nokkrir voru teknir tali úti á lífinu og spurðir álits.
Ólafur Laufdal, eigandi Broadway, sagði í þættinum að hann væri ósammála því að aðgangseyririnn væri of hár. Meira væri um að hljómsveitir spiluðu á böllum í stað diskóteks. Framboðið væri því vandaðra en áður.
Á staðnum voru líka haldnar fegurðarsamkeppnir sem voru vinsælt sjónvarpsefni á þessum tíma. Rauða dreglinum var rennt út fyrir utan Broadway í Mjódd fyrir fegurðardrottningarnar.
Reykjavíkurborg festi kaup á húsi skemmtistaðarins Broadway í Mjódd sumarið 1989. Í fréttum var rætt við Davíð Oddsson þáverandi borgarstjóra sem lýsti því að í húsinu ætlaði borgin að reka skemmtistað fyrir unglinga. Það hafi fengist á góðu verði og lítið þyrfti að gera við það til þess að hefja starfsemi.
Þar sem Broadway var áður við Álfabakka var síðar um langa hríð rekið kvikmyndahús Sambíóanna. Því var lokað í byrjun þessa árs. Þarna stendur til að opna höfuðstöðvar Nova, sem stærir sig af því að vera stærsti skemmtistaður í heimi.
Hótel Ísland er ekki heldur í Ármúla lengur. Þar er nú Klíníkin til húsa.
