Fyrirtækjaeigendur í nágrenni við Konukot í Ármúla í Reykjavík lýsa yfir ófremdarástandi í hluta götunnar vegna skjólstæðinga Konukots. Í samtali við DV segjast þeir allir hafa samúð með konunum sem eigi í ekkert annað skjól að venda, en húsnæðið í Ármúla henti engan veginn þeirra þörfum. Konurnar þurfi verulega aðstoð sem þær fái ekki í úrræði sem þessu.
„Mér finnst hræðilegt að sjá hvernig er komið fyrir þessum ungu konum, við verðum að hjálpa þeim. Við getum ekki látið þær vera hérna og látið dópsalana koma og selja þeim dóp. Við verðum að reyna að fá þær úr neyslu inn í samfélagið. Þetta er uppgjöf að mínu mati. Við vitum að þessar konur eru í neyslu, þær eru í vændi og við lokum bara augunum,“
segir einn viðmælanda DV sem reglulega hreinsar upp sprautunálar við húsnæði fyrirtækis síns, jafnvel alla leið að leikskólanum Brákarborg sem rekinn er í Ármúla 28-30. Allir óskuðu viðmælendur DV eftir að vera undir nafnleynd, eins og þessi tiltekni viðmælandi útskýrir:
„Ég tjáði mig áður undir nafni og þá hringdi í mig í tvígang maður sem hafði í hótunum við mig og mína fjölskyldu: að ef ég er að skipta mér af þá skuli ég hafa verra af hann viti hvar ég á heima. Þetta er mjög óþægilegt, maður er að ræða málefnalega og koma fram athugasemdum.“
Dagleg atvik við Konukot en mismörg og misalvarleg
Blaðamaður DV ræddi við nokkra fyrirtækjaeigendur sem næst eru Konukoti, sem er í Ármúla 34 og hafa þeir allir sömu sögu að segja, ónæðið sé mikið fyrir nágranna alla daga: lögregla og sjúkrabílar komi oft á dag, fíkniefnasalar sömuleiðis, óþrifnaður sé við húsnæðið og skemmdarverk hafi verið unnin á bílum og öðrum eignum. Atvik tengd Konukoti séu dagleg, mismörg og misalvarleg, en enginn dagur líði án þess að eitthvað komi upp á.
„Þetta er búið að vera skrautlegt síðan þær komu,“ sagði einn viðmælandi. „Þetta er svakalegt ástand á þessum konum og virðast þær í mikilli og harðri neyslu þarna inni. Fíkniefnasalar koma reglulega að húsnæðinu á bílum. Þetta eru aðallega þrír bílar, þær hlaupa niður og rétta pening inn um rúðuna, þeir fara í brjóstvasann og taka eitthvað og rétta þeim. Það liggja hér sprautur, tómar og fullar við dyrnar. Við fengum þau svör frá starfsfólkinu að það væri betra að þær fengju þetta heimsent heldur en að fara út í bæ af því þar væru þær barðar og rændar. Hér er sóðaskapur, öskur og læti. Þær reykja hass fyrir utan húsnæðið og það er skelfilegt ástand um mánaðamót þegar þær eiga pening.“
Segja viðmælendur DV að margar kvennanna séu til friðs, það sé hins vegar nöturlegt að sjá þær mæta á staðinn fyrir opnun Konukots í misjöfnu ástandi með örfáar eigur sínar í plastpokum. Aðrar konur sem dvelji á Konukoti og séu til mestra vandræða eigi frekar að dvelja á sjúkrastofnun en í slíku úrræði. Nokkrir lýsa úrræðinu sem geymslu og að konurnar séu hreinlega eins og dýr í búri til sýnis fyrir alla þá sem eiga leið um götuna.
Sjá einnig: Vilja ekki sjá Konukot í sama húsi: Hóta því að fara fram á skaðabætur ef viðskiptavinir verða fyrir truflun
Tvo fíleflda karlmenn þurfti til að halda konu sem gekk berserksgang
Á þriðjudag í þessari viku kom einn skjólstæðinga Konukots kom æðandi og öskrandi inn í veitingastaðinn Smábitann sem er í sama húsi, reif þungt glerlok af samlokukæli í borðinu upp og þeytti því inn í salinn. Starfsfólk og nokkrir gestir voru á staðnum þegar atvikið átti sér stað og segja vitni að atvikinu, sem blaðamaður ræddi við, mildi að enginn hafi slasast. Hringt var á lögreglu og á myndböndum sem DV hefur undir höndum af atvikinu má sjá að tvo fíleflda karlmenn þurfti til að halda konunni niðri á gangstéttinni fyrir framan þar til lögregla mætti. Á sama tíma lá annar skjólstæðingur Konukots meðvitundarlaus í anddyrinu þar og starfsstúlka að stumra yfir henni.
„Við heyrum öskur hér fyrir utan, svo kemur hún inn á þvílíkum hraða og rífur í kælinn. Þetta er þungt, hún slítur lokið af, eyðileggur kælinn, grýtir lokinu inn í salinn. Svo hleypur hún út, skemmir bíl, og sparkar í annan bíl sem keyrði framhjá. Hún var stjórnlaus algjörlega.“
Eigendur Smábitans hafa þegar hringt í Reykjavíkurborg og spurt hvort borgin muni greiða fyrir skemmdirnar. Lítið var um svör og var þeim bent á að þau gætu reynt að kæra konuna.
„Það sem okkur finnst kannski verst er að borgin er að taka einhverja ábyrgð á þessum konum en svo firra þau sig ábyrgð. Og það er mjög skrýtið að sé hægt að reka eitthvað á þeim forsendum eins og að stúlka sem er heimilislaus og fær að vera þarna geti skemmt eigur og stuggað við fólki og ábyrgð borgarinnar er engin. Ástandið er orðið svakalegt hérna.
Þetta er vandamál sem er til staðar og verður alltaf, en þetta er engin lausn,“ segir einn viðmælenda.
„Það er lögregla og sjúkrabíll hér að meðaltali þrisvar sinnum á sólarhring. Það væri fróðlegt að vita hvað útköllin eru orðin mörg. Við höfum þrifið upp mannaskít, notuð dömubindi, hanska og sprautunálar hér í götunni. Eftir að við töluðum við starfsstúlkurnar og kvörtuðum þá eru þær duglegri að þrífa og sópa fyrir utan,“ segir annar.
Einn fyrirtækjaeiganda segist tvisvar hafa orðið fyrir því að kona kom inn i verslun hans og otaði að honum brotinni glerflösku. Hann segist einnig hafa í eitt skipti fylgt viðskiptavinum út í bíl þeirra, þar sem þeir þorðu ekki að ganga einir út. Hann rifjar einnig upp atvik fyrir stuttu síðan þegar lögreglan kom með nær meðvitundarlausa konu til að bíða eftir opnun Konukots, nefnir viðmælandi konuna með nafni og því ljóst að sumar konurnar koma ítrekað á staðinn og eru orðnar kunnar viðmælendum með nafni:
„Þrír lögregluþjónar komu með eina hálf meðvitundarlausa um daginn korter yfir fjögur, drösluðu henni út og settu hér á tröppurnar. Lögreglumennirnir þekkja þetta ástand hér, þeir þekkja konurnar með nafni og vita nákvæmlega um hvað þetta snýst. Eina sem hún passaði greyið var veskið sitt, ég reyndi að hringja og hafa samband við einhvern í Konukoti og fékk bara símsvara af því það opnar ekki fyrr en klukkan fimm. En það vildi svo til að ein starfsstúlkan mætti snemma og bjargaði konunni inn.“
Flutningur Konukots í Ármúla eftir margra mánaða leit
Konukot er neyðarskýli fyrir heimilislausar konur í Reykjavík, rekið af Rótinni samkvæmt þjónustusamningi við Reykjavíkurborg. Konukot var í Eskihlíð 4 frá árinu 2004 í litlu einbýlishúsi neðst í götunni þar sem garður var og gróður. Í fréttum í fyrra kom fram að eftir margra mánaða leit að nýju húsnæði væri það fundið í Ármúla. Unnið væri að standsetningu húsnæðisins og stæði til í að flytja inn í ágúst eða september, það þyrfti að huga að ýmsu varðandi aðbúnað og öryggi áður en hægt væri að flytja inn. Það var þó ekki fyrr en í byrjun janúar á þessu ári sem opnað var í Ármúla. Á 2. hæð er neyðarskýli þar sem allt að 12 konur geta dvalið í einu og er það opið frá kl. 17 á daginn til kl. 10 næsta morgun. Á 3. hæð er tímabundið húsnæðisúrræði fyrir allt að sex konur í einu með stuðningi fyrir konurnar sem þar dvelja allan sólarhringinn.
„Húsnæði okkar í Konukoti var komið til ára sinna, viðhaldsþörfin mikil og var ekki að halda þeim stöðlum sem við þurfum á að halda varðandi neyðarhúsnæði þannig við þurftum að horfa til nýs húsnæðis,“ segir Soffía Hjördís Ólafsdóttir, deildarstjóri málaflokks heimilislausra með miklar og flóknar þjónustuþarfir í viðtali við Vísi 8. júní 2025. Sagðist hún skilja áhyggjur nágranna, en vilja vera í góðu samstarfi við þá.
Í frétt Vísis kom fram að flutningurinn var kynntur í grenndarkynningu í febrúar og mars og samkvæmt fundargerð umhverfis- og skipulagsráðs Reykjavíkur bárust athugasemdir frá eiganda Smábitans sem rekur veitingastað í sama húsi, og Sameind og lögfræðistofunni Lagarökum fyrir hönd fyrirtækisins Krosshólma, sem bæði reka rannsóknarstofu í næsta húsi. Öll mótmæltu þau flutningi athvarfsins í Ármúla og lýstu yfir áhyggjum af umgengni, áreiti og mögulegri vímuefnaneyslu skjólstæðinga Konukots. Í umsögn Sameindar var jafnframt bent á að í næsta nágrenni, í Ármúla 28 til 30, er leikskólinn Brákarborg.
Haustið 2027 er stefnt að opnun unglingaskóla í Ármúla 28-30 fyrir 250 nemendur, eins og kom fram í frétt RÚV. Hinu megin götunnar er hverfi í mikilli uppbyggingu þar sem verið er að byggja fjölda íbúða á Orkureitnum, alls 436 íbúðir, og einnig er nýtt fjölbýlishús við Grensásveg og stefnt er að uppbyggingu í Skeifunni.
„Við erum iðulega að týna upp sprautunálar með blóði í og svo er barnaheimili hérna við hliðina á okkur og þetta bara fer ekki saman. Konurnar þurfa að vera í útjaðri hverfis í borginni hafa garð og vera í friði. Þær eru bara til sýnis hérna, það er ekki hægt að gera fólki með geðræn vandamál þetta, að þær séu bara til sýnis. Þetta er lifandi fólk, það á sinn rétt þó það hafi orðið undir í samfélaginu.“
Einn fyrirtækjaeigandanna sem DV ræddi við sagðist hafa heyrt af komu Konukots í götuna utan af sér, þegar ákvörðun hafði verið tekin um flutninginn. Sagðist hann vilja hætta rekstri og selja húsnæðið, en velti jafnframt fyrir sér hver myndi vilja kaupa.
Hafa ekki misst viðskiptavini
Allir viðmælendur DV segja gott að reka verslun í Ármúla, reksturinn gangi vel og margar nýjar verslanir í götunni, sem og í Síðumúla. Flestir segjast ekki hafa misst viðskiptavini vegna ástandsins, enda margir viðskiptavinanna slíkir til margra ára, en bæði viðskiptavinir og starfsmenn veigri sér stundum við að fara í og úr bílum sínum. Sérstaklega þegar þeir eru einir á ferð. Það skyggi á í þessum hluta Ármúla að viðskiptavinir þurfi að taka á sig sveig vegna Konukots.
„Það er dagamunur á þessu, en þetta er búið að vera með ólíkindum. Ég var jákvæður fyrst og starfsstúlkurnar komu og ræddu við mig, gáfu mér símanúmerið sitt ef eitthvað kæmi upp á hjá mér. Þannig að maður gefur þessu séns, en þetta er orðið þannig að þetta passar ekki hérna, því miður. Ég kem oft á sunnudögum að gera upp og til dæmis á sunnudaginn var voru tveir sjúkrabílar og tveir lögreglubílar um hálf ellefu. Ég veit að stúlkurnar sem vinna þarna gera sitt besta og allt það, en svona starfsemi á ekki heima hér í verslunarhverfi. Ég tók strax á þessu þegar Konukot kom hingað, það komu nokkrar konur í upphafi, vildu koma inn, nota salernið og svona. Og ég sagði að þær væru ekki velkomnar hingað inn og þær hafa ekki reynt að koma hingað eftir það. Flestar konurnar eru í lagi, ég vil taka það fram,“ segir einn viðmælandi og bætir við: „Þetta er líka örugglega búið að kosta helling fyrir borgina. Ég skil ekki í borginni, þeir leigja þetta og það stendur autt í næstum því ár og borgin borgar fulla leigu. Mér var sagt að það hefðu komið 2-3 arkitektar að taka húsnæðið út. Það er staðið svo illa að þessu að hálfa væri nóg.“
Annar bætir við með leiguna: „Hún er 5.700 kr. á fermeter í húsnæði sem stenst ekki lágmarkskröfur, þetta er tvöfalt yfir markaðsverði.“
Læsir verslun sinni hluta dags til að halda skjólstæðingum Konukots frá
Fyrirtækjaeigandi neðar í götunni sem opnar kl. 11 segist oft mæta fyrr og segir konur úr Konukoti ganga framhjá eftir að þær þurfa að yfirgefa Konukot og oft reyna að opna dyrnar að fyrirtækinu. „Milli klukkan 16-17 þegar þær mæta aftur þá er ég með læst,“ segir eigandinn en verslun hans er opin til kl. 17.
„Ég stend bara hér við hurðina og opna fyrir viðskiptavinum. Ég hef fulla samkennd með því sem þessar konur hafa upplifað og get ekki sett mig í þeirra spor. En þær þurfa að bjarga sér með því að stela til að fjármagna sína neyslu og við erum ekki þjálfuð til að eiga við þetta. Að setja þær í verslunargötu þar sem þær eru eins og sýningargripir fyrir alla. Ég treysti mér ekki til að fá þær inn bara upp á öryggi mitt, skemmdir, stuld og líka upp á hreinlæti.“
Fárveikar konur sem þurfa skjól ekki að vera til sýnis
Enn og aftur ítreka viðmælendur DV samúð sína með konunum, sem einhvers staðar þurfi að hafa skjól, en það skjól sé ekki hentugt ekki á þessum stað eða öðrum sambærilegum stöðum.
„Þarna er um fárveika einstaklinga að ræða sem eiga að vera inn á sjúkrastofnun og þetta er til skammar að það sé fundið 70 ára geymsluhúsnæði sem stenst ekki brunavarnir, stenst engar kröfur og konunum er bara troðið þar inn eins og í einhverja geymslu. Þær þurfa að komast undir hendur lækna, þetta eru fárveikir einstaklingar og það er bara ekki hægt að horfa upp á þetta. Að mínu mati þarf þetta að vera ígildi heilbrigðisstofnunar sem þær dvelja á, þetta er ekki að gera sig.“
Annar bætir við: „Það fylgir þessu líka að það eru karlar í mismunandi ástandi að elta þær uppi. Starfsstúlkurnar hafa ekkert í svona fíleflda stóra karla sem eru urrandi fullir. Mér finnst þetta ofsalega leiðinlegt, ég vil ekki vera í stríði við þessar konur, þær eiga bágt og maður hefur samúð með þeim, en borgin getur ekki gert þetta svona. Þær verða að fá þá þjónustu sem þær þurfa og þær eru ekki að fá hana hér.“
Einn þeirra segir að best væri ef borgin gæti komið húsnæðinu í Eskihlíð í búsetuhæft horf eða keypt eða leigt einbýlishús með garði og gróðri, þar sem konurnar eigi skjól vilji þær fara út úr húsi.Við húsnæðið í Ármúla er ekkert slíkt skjól. Konur sem bíða eftir að Konukot opni og konur sem fara út að reykja standi einfaldlega á gangstéttinni öllum til sýnis. Viðmælendur segja þó margar kvennanna einfaldlega brjóta reykingabannið sem er í húsnæðinu, reykja inni og henda stubbunum út um gluggana.
„Það er yndislegt að eitthvað sé gert fyrir þessar konur, en þetta er ekki staðurinn. Hérna hafa þær ekkert skjól, einu staðirnir sem þær geta setið á eru inngangarnir í verslanirnar. Þær eru bara hérna á götunni, ráfandi um. Þetta er ömurlegt fyrir þær, þær eru bara hérna til sýnis. Þetta er svo ömurlegt fyrir konurnar, þær eru svo veikar. Þær eru kannski orðnar þreyttar eftir daginn og koma hingað og setjast inn í anddyrið. Og það er bara skelfilegt að þurfa sífellt að vera að reka þær út. Og að setja okkur í þetta ástand.“
„Okkur er sagt að það þýði ekki að opna svona úrræði fyrir utan borgarmörkin, þar sem fólkið sækir í miðbæinn. Við sjáum það bara með úrræðið sem var opnað í Gufunesi, þangað gekk ekki strætó,“ tekur annar undir.
Á meðan Konukot er lokað, frá kl. 10-17 á daginn, fara margar kvennanna í Grensáskirkju þar sem þær geta og mega dvelja yfir daginn. Segist einn viðmælanda ekki skilja af hverju það kemur ekki bíll frá borginni sem keyrir þær frá Konukoti og í kirkjuna, og aftur til baka seinni partinn. Í staðinn gangi konurnar margar eða taki strætó á milli í hvaða veðri sem er.
Telja húsnæðið ekki uppfylla öryggi og brunavarnir
Fyrirtækjaeigendur í nágrenni Konukots hafa margir rætt saman og hafa bent á að húsnæðið sé að þeirra mati fyrir neðan allar hellur.
„Við sendum erindi á úrskurðarnefnd umhverfis- og auðlindamála og úrskurðurinn frá þeim var ósköp rýr. Við fengum í kjölfarið viðurkennda verkfræðistofu, Inspectionem, til að gera úttekt á þessum málum. Skýrslan frá þeim er mjög svört og mikil áfellisdómur yfir vinnubrögðum þessarar nefndar og hvernig menn vinna. Það er alveg ljóst við lestur skýrslunnar að þetta er bara eins og á Stuðlum, menn vita að unglingar mega ekki vera þar en gera ekkert í því.
Grundvöllurinn eru þessir notkunarflokkar 4 og 5, munurinn er að í flokki 5 geta einstaklingar ekki bjargað sér út sjálfir. Og einstaklingar í geðrofi, einstaklingar undir áhrifum gríðarlega sterkra lyfja, þeir vita ekkert hvar þeir eru. Það er ekkert hægt að láta eins og þær gætu bjargað sér sjálfar.“
Úrskurðurinn sem viðmælandi vísar til snerist um kæru á ákvörðun byggingarfulltrúans í Reykjavík frá 13. maí 2025 um að samþykkja umsókn um leyfi til að innrétta Konukot fyrir 12 skjólstæðinga á annarri hæð og tímabundið búsetuúrræði fyrir sex skjólstæðinga á þriðju hæð í húsi á lóð nr. 34 við Ármúla. Óskaði kærandi eftir að ákvörðunin yrði felld úr gildi á þeim forsendum að byggingarleyfið ætti ekki að falla undir notkunarflokk 4 samkvæmt byggingarreglugerð heldur notkunarflokk 5, þar sem að mati kæranda gæti fólk í neyslu, sem ætlað væri að gista í Konukoti, ekki á nokkurn hátt bjargað sér út úr mannvirkinu ef til bruna kæmi.
Sjá einnig: Segja það geta verið lífshættulegt að hafa Konukot í Ármúla 34
Rök Reykjavíkurborgar voru að ekki væri um kæranlega ákvörðun að ræða. Konukot félli auk þess ekki undir notkunarflokk 5 þar sem um sé að ræða húsnæði þar sem boðin sé tilfallandi gisting eða gert sé ráð fyrir að fólk gisti sem almennt sé fært um að bjarga sér sjálft út úr mannvirkinu eða á öruggt svæði við eldsvoða.
Nefndin hafnaði kröfu kæranda um ógildingu á ákvörðun byggingarfulltrúa borgarinnar um samþykkt á leyfi til að innrétta húsnæðið undir Konukot og búsetuúrræði. Byggðist höfnunin á þeim forsendum að Ármúli 34 væri á svæði sem ekki hefur verið deiliskipulagt, svæði væri skilgreint miðsvæði og því byggingarleyfi fyrir neyðarúrræði, tímabundið húsaskjól fyrir heimilislausa, ekki bundið deiliskipulagi. Vísaði nefndin einnig til munar á notkunarflokki 4 og 5 samkvæmt byggingarreglugerð og taldi Konukot falla undir notkunarflokk 4:
„Í hinu kærða byggingarleyfi kemur fram að um sé að ræða gistiheimili í notkunarflokki 4. Sá flokkur er skilgreindur í gr. 9.1.3. byggingarreglugerðar sem mannvirki eða rými þar sem gert sé ráð fyrir að fólk gisti. Fólk sem sé í mannvirkinu sé ekki allt nægjanlega kunnugt umhverfinu til að þekkja flóttaleiðir, en sé almennt fært um að bjarga sér sjálft út úr mannvirkinu eða á öruggt svæði við eldsvoða. Í töflu 9.01 reglugerðarinnar eru svo tekin dæmi um notkun.“
Um flokk 4 segir: „Mannvirki þar sem gisting er boðin, s.s. hótel og aðrir gististaðir, frístundahús til útleigu og skálar til útleigu og húsnæði þar sem boðin er tilfallandi gisting, þ.m.t. í skólum og vinnubúðum.“
Sjá einnig: Kæru Sameindar hafnað – Konukot fær að rísa í Ármúla
Í skýrslu verkfræðistofunnar Inspectionem sem fyrirtækjaeigendur fengu til að gera úttekt á úrskurði nefndarinnar kemur fram að í „umsögn borgarinnar megi sjá að við meðferð hjá byggingarfulltrúa hafi nær ekkert verið fjallað um notkunarflokk hússins en gengið út frá því að miða ætti við notkunarflokk 4 sem var sá flokkur sem miðað var við í fyrri umfjöllun um húsið þegar því var breytt úr dagvist fyrir aldraða í almennt gistihús í flokki 3.“
„Þessi afgreiðsla byggingarfulltrúa bendir til þess að við meðferð málsins hafi ekki verið gerður neinn greinarmunur á almennri færni skjólstæðinga Konukots og færni almennra ferðamanna til þess að bregðast við hættum meðal annars af völdum elds og að starfsemi í húsinu megi því flokka sem almenna gistingu. Litið er framhjá því að „markhópur“ fyrir gistingu í húsinu er ekki hefðbundinn (það er almennir ferðamenn) fyrir gististaði heldur einstaklingar sem þurfa vissan stuðning til daglegra athafna sem er í raun grundvöllur fyrir tilvist úrræðisins í Ármúla 34.“
Í skýrslunni er fjallað um mannvirki sem hanna og byggja á á grundvelli algildrar hönnunar samkvæmt byggingarreglugerð, Ármúli 34 falli þar undir.
„Sé horft til þess hóps sem úrræðið er ætlað fyrir og það að húsnæðið fellur undir kröfu um algilda hönnum má ætla að líkur séu á að aukinn hluti fólks í gistingunni/úrræðinu geti átt erfiðara með að bjarga sér út og að rýming geti því tekið lengri tíma en eðlilegt er.“
Telur skýrsluhöfundur þannig að horfa eigi til notkunarflokks 5 enda hafi komið fram að í húsinu sé aðstaða fyrir heilbrigðisþjónustu sem er styrkt af heilbrigðisráðuneytinu.
„Notkunarflokkur mannvirkis ræðst þannig fyrst og fremst af öryggi fólks.“
„Sé húsnæðið hannað á þann hátt að allir eigi að geta komist inn í húsið skal þess jafnframt gætt að allir eigi að geta bjargast út af eigin rammleik.“
Í niðurstöðu skýrslunnar segir að svo virðist sem „hönnuðir og húsbyggjandi hafi meðvitað valið lægri notkunarflokkinn fyrir húsið og horft framhjá því að hanna húsið í samræmi við kröfur um algilda hönnun og þær ákvarðanir leiða til þess að gerðar eru minni kröfur til öryggis fólks í húsinu.“
„Leyfisveitendur virðar ekki hafa gert sjálfstæða athugun á því hvort það val falli að fyrirhugaðri starfi í húsinu eða tekið tillit til þess að skjólstæðingar Konukots geta verið með mjög mismunandi færni til þess að bregðast við hættum sem koma upp í húsinu og að bjarga sér undan þeim.“
Telur skýrsluhöfundur svar úrskurðarnefndarinnar bera með sér að vera unnið upp úr umsögn borgarinnar, en einnig benda til að nefndin telji að gera þurfi endurmat á starfsemi Konukots þegar hún er hafin og afla nýs byggingarleyfis ef ljóst er að starfsemin samrýmist ekki hönnun þess og völdum notkunarflokki. Telur skýrsluhöfundur að uppfæra ætti hönnun hússins þannig að litið sé til notkunar flokks 5, auk þess að taka tillit til krafna um algilda hönnun hússins og afla í framhaldi nýs byggingarleyfis.
Ætla lengra með málið og fá dómkvaddan matsmann
Fyrirtækjaeigendur hafa tekið sig saman og ætla lengra með málið. Þeir hafa ráðið sér lögmann og í vinnslu er að fara með beiðni fyrir héraðsdóm um dómkvaddan matsmann:
„til að kveða á um það í eitt skipti fyrir öll hvort húsnæðið standist lágmarkskröfur, sérstaklega með tilliti til brunavarna og hvort þessi starfsemi og konur megi vera þarna. Það er alveg ljóst samkvæmt skýrslu Inspectionem að húsnæðið kolfellur. Við viljum bara klára þetta og þá er kominn dómkvaddur matsmaður sem segir hvort húsnæðið sé í lagi eða ekki. Og ef það telst ekki í lagi þá er staðan orðin þannig að ef borgin gerir ekkert og það kæmi upp eldur þarna og það yrði mannsbani þá erum við komin í sömu stöðu og með Stuðla. Menn vissu af vandanum en gerðu ekkert. Og ætla menn að hafa þetta þannig að þeir vita að að eru alvarlegar brotalamir, en þeir gera ekkert?“
